Read Hrangkhol TÎRTÔNHAI SINTHO 3 Bible Online

TÎRTÔNHAI SINTHO 3 - Hrangkhol bible

TÎRTÔNHAI SINTHO 3

¹Chohnung dâr thum chongchai zoro anga khan Petera le Johana kha tempila an hong fea.

²Pa inkhat, a suak lai ata ke’nbâi hi an hong irzôna, Tempila fehai kuang kut lei do hrangin mikot “Enhoi” an iti kôla a nitin an sia ngaia.

³Kha pa khan Petera le Johana tempila lût hrang kha a hmuhaia, kut a lei doa.

⁴Khan Petera le Johana khan an en chiana, Petera khan a kuang, “Ni hong en ta,” a tia.

⁵Khanchu ama khan imo khat dong hrang anga sabeiin a ena,

⁶Khannisianlân Petera’n, “Sum le rângachak ite nei ma ung, nikhomsian, ki ineisun nang pe ki ti. Nazaret Jisua Krista irhmingin ke’n fe ta roh,” a tia.

⁷A kut chang tiang a chela, a kaithoia, voikhat rengin a ke le a ke ârtui ruhai kha a hong hrât zôi zel tâka.

⁸Khanchu kha pa kha irchôm zokin a ngîra, ke’n a fe tâka, kea fe’n, irchôma Pathian inpâk pumin Tempila khan a lût sa tâka.

⁹Mipui murdi’n kea a ife le Pathian a inpâk kha an hmu’n chu,

¹⁰Tempil mikot Enhoi kôla kutdo toi ngai kha a nih ti an inhriata, a chunga thil tung kha ar khêl an ti tak taka, a’rngaina lam chang inhre mahai.

¹¹Khan, kutdo khan Petera le Johana kha a la chel mai laiin mipuihai kha Solomona bokrop an itia khan an lei intân irbuka ar khêl an ti tak taka.

¹²Khan, Petera’n mipuihai kuang, “Nangni Israel mihaio, ithoa mo hi hi ar khêl nin iti? Pathian kin ngaisak bîk sika kin sinthotheinaa hi pa hi infetir angin ithoa mo nin ni en mai?

¹³Abrahama, Isaka le Jakoba Pathian, ei irchibulhai Pathian khan a tîrtôn Jisua kha a ichôiindôm tâk a ni. Ama kha nin incheltira, Pilata’n insua a tum khomin nin sêl ngot kha a ni.

¹⁴Mi Irthiang le Fel tak kha nin hnôla, mi thatpa kha insua pe hrangin nin ngêna.

¹⁵Hringna pêktu kha nin thata, khannisianlân, Pathianin ama kha mithi lai ata a kaithoi tâka, kha thu’nhretuhai kha kin ni.

¹⁶Jisua irhminga sinthotheina le ar hming iamna khan nin ihmu le nin inhriat ngai pa hi an damtir tâka; ama iamna sikin a ni, hi pa hi, nin rênga nin ihmu angin a idam tâk a ni.

¹⁷Khannisianlân, atûn hin urênghaio, nangni le nin hruaituhai khomin Jisua chunga nin sintho kha nin inhriat tak tak loi a nih ti ki inhriat a ni.

¹⁸Pathianin a deipu murdihai hmanga Krista khan a ituang hrang a nih ti a lei insîr kha a zuang itung a ni ta.

¹⁹Khasikin nin sualhai irlet unglân, Pathian tiang hong kîr nôk roi.

²⁰Khanchu Rengpa kuang ata hartharna zoro hong tung a ta, nin ta hranga Mesia a inkung Jisua kha, zuang tîr a ti.

²¹Aniachu, itinrêng siamthar zoro a tung mâka chu irvânin ama kha lan sua no ni; kha siamtharna thu kha Pathianin a deipu irthianghai bâia tianlai ata a insîr tâk kha.

²²Mosia khom khan, “Rengpa nin Pathianin keima anga nin urênghai laia mi, deipu inkhat nangni inding pe a ti, i khom nin kuanga a insîr murdi chu nin la izôm hrang a ni.

²³Kha deipu thu irngai loi murdi chu ‘Pathian mihai lai ata inhnotsuakin that irhmang hrang a ni’ a iti kha.

²⁴Samuela le a hnunga deipu murdihaiin atûnlai thurchi hi an lei insîr sa ngai a ni.

²⁵“Deipuhai le nin irchibulhai kuanga thuthung a ipêk khom kha nin idong sa tâk a ni. Pathianin Abra-hama kuang, “Ni’rchihai sikin rammuala mi murdi satvur ki ti,” a lei iti ang khan.

²⁶Pathianin a nâi kha an thanga, nin sualhai irheisantir zit hrang le sat nangni vur hrangin nin kuang a zuang itîr masa a ni hi,” a tia.