Read Hrangkhol TÎRTÔNHAI SINTHO 4 Bible Online

TÎRTÔNHAI SINTHO 4 - Hrangkhol bible

TÎRTÔNHAI SINTHO 4

¹Khaanga Petera le Johana’n mipuihai kuang thu an insîr lai khan, Ochaihai kha tempil pulis hruaitupa le Sadukaihai an kuang an honga.

²Jisua thoinôkna thu hrilin mipuihai kha mithi thoinôkna thu an irchutirhai sikin a sân an ning an mur tak taka.

³Khanchu an chelhaia, khohloi tiang a ni sikin a tûk dênin intângna ina an khumhai tâka.

⁴Khannisianlân, an thu irngaituhai laia tamtakin an iam sa tâka, an tam lam chu pasal ulian ringot khom sângringa vêl an ni.

⁵A tûka chu Juda hruaituhai, Upahai, Dân irchutirtuhai Jerusalema an inkhôma.

⁶Kha kha Ochai inlaltak Anna, Kaiafa, Johana, Alexander hai Ochai inlal irchihai leh an inkhôm a ni.

⁷Petera le Johana kha an laia an inngîrtirhaia, “Itina an indam thei ma ni, tu irhmingin mo hi thil hi nin itho,” tiin an irdonhaia.

⁸Khanchu Petera kha Irtha Irthiangin a sipa, an kuang, “Mipui hruaituhai le upahaio,

⁹a vuan hin ke’nbâi indam thua itina indam mo a ini nin ni irdona,

¹⁰nangnihai le Israel mi murdi’n inhre ri sehai; Nazaret Jisua Krista, nin ihembe, Pathianin mithi lai ata a ikaithoi tâk irhming khan indam a nia; atûn hin nin makunga dam vangin a ingîr tâk a ni.

¹¹Jisua hi a ni, Pathian Thu bu’n, ‘Ama hi kêng nangni in sintuhaiin nin inuamloi lung nin ipai kha, a kila lung poimo tak a hong ni ta,’ a tia.

¹²“Tu dang kuang khom saninhringna om mah, irvân hnuaia mihriam irhming iphua laia ni saninhring thei irhming dang rêng rêng om mahai,” a tia.

¹³Petera le Johana hai an ihâi lam kha an hmua, lekha thiam no le mi’nmôl mai mai an nih ti an inhriattin, a sân a’rkhêl an tia; Jisua kuanga om ngai an nih ti an inhriat ta.

¹⁴Khan, an mi indam, an kuanga ngîr kha an enin ite dem hrang lak om maka.

¹⁵Khanchu Sanhedrin ata kha an insuaktirhai zoiin chu an chonga.

¹⁶“Hi mihai hi itin mo ei ithohai ta hrang? An sinirkhêl tho hi Jerusalema om murdi’n an inhriat tâk hi; eini khomin ei isêl thei loi hi.

¹⁷Aniachu, mi’n an inhriat irzat ual nona hrangin tu kuang khom Jisua irhminga thu’nsîr nôk ta loi hrangin lei insîhai rei,” an tia.

¹⁸Khanchu anni kha an koihai nôka, Jisua irhminga thu insîr loi hrangin le irchutirhai ta loi hrangin thu an pêkhaia.

¹⁹Khannisianlân, Petera le Johana’n an kuang, “Pathian mithmua, Pathian thu zôm nêkin nangni thu zôm mo a idik ual, ngaitua roi.

²⁰Keini chu thil kin ihmu le kin inhriat hi insîr loiin om thei ma ung,” an tia.

²¹Khan, anni khan a sate’n an insîhaia, an insuahai tâka. An thiltho sika mi murdi’n Pathian an chôiindôm sikin hremna zoro’nchum an ihmu loi a ni.

²²Irkhêl taka an indam kha kum sômminli nêka ulian a ni.

²³Petera hai kha an suaka, an rualhai kuang an va fea, Ochai inlalhai le upahaiin an kuang an insîr kha an hrilhai zita.

²⁴An thu irngaituhai khan irrualin inring takin Pathian an insama, “O inlaltak, Nangma, irvân, irnêng, tuikhanglianhai le a sûnga thil om murdi siamtu ni ni;

²⁵Nangma’n Irtha Irthiangin kin irchibulhai ni siahlo Davida bâiin hi thu hi nin sîra, ‘Jentailhai ithoa mo an ninginmur? Mipuiin ithoa mo thil chanlamboi an ingaitua?

²⁶Irnêng rênghaiin an irsiam irfôk tâka, Hruaituhai khom a chungchânga an insîr irhlôma, Rengpa le a Krista doi hrang,’ tiin.

²⁷“Khaang tak khan hi khuaa hin ni siahlo irthiang, Jisua sahriak ni ipoltu chunga khan, Heroda le Pontia Pilata hai kha Jentailhai, Judahai leh an inthurual tâka.

²⁸Nangin ni lei inkung anga intungtir ni itum kha, hlo inchuktir hrangin an ipungkhôm a ni.

²⁹Rengpa, atûna an ni ikhap lam hi irngai ta, ni thu hril ngam hrangin ni suakhai hi huaisenna ni pe ro.

³⁰Mihai indam hrangin ni sinthotheina inlangin lân, ni siahlo irthiang Jisua irhmingin irsinsianahai le thilirkhêlhai inthotir sa roh,” an tia.

³¹Khaanga an chongchai zoiin chu an omkhômna hmun kha a hong inhnînga, an rêngin Irtha Irthiangin an sipa, hâi takin Pathian thu an hril tâka.

³²Iamtuhai kha milung hmunkhat le lungrîl hmunkhat irputin an oma, an laia tukhomin an thil neihai kha ‘Ki ta bîk a ni,’ ti mahai; itinrêng an irkopirhlôm ta.

³³tîrtônhai khan a sinthotheina lian tak neiin Rengpa Jisua thoinôkna thu an hril ngaia, an rêngin Pathian satvurna an dong senga.

³⁴An laia tukhom irsam om mahai, in mani, ram mani, an ineihai kha an zuara, a man kha an hong chôia.

³⁵tîrtônhai kuang an inhlana, an intak lam ang takin kha sum kha an sem ngai.

³⁶Khan, Josefa, tîrtônhaiin Barnaba an iti (Kha kha “Irtharngamna nâi” tihna a ni) Levia irchi, Kupra chômbunga omtu khom khan,

³⁷ram a neia, a zuara, a man kha hong chôiin tîrtônhai kuang an hlan ta.