Read Hrangkhol TÎRTÔNHAI SINTHO 5 Bible Online

TÎRTÔNHAI SINTHO 5 - Hrangkhol bible

TÎRTÔNHAI SINTHO 5

¹Mi inkhat, a’rhming Anania a oma, a dôngma chu Sapfiri a ni. Anania’n ram a zuara,

²a man kha a dôngma inhriatpuiin anni ta hrangin an khâia, a chimrip vai hong chôiin tîrtônhai kuang an hong inhlana.

³Khannisianlân Petera’n, “Anani, Irtha Irthiang huangin ram man a chimrip thup hrangin ithoa mo Setana’n ni milunga ircham ni inneitir?

⁴Ni zuar mâna khom khan ni ta a nia, ni zuar hnunga khom a man chu nir cham tak mo ni ma? Ithoa mo, hianga thil tho hrangin milung nin inchong? Mihriam huang ni itum ni maka, Pathian kêng huang ni itum,” a tia.

⁵Anania’n kha thu kha an hriatin chu an rîl zôi zel tâka, a thi ta. An hriat murdi’n a sân an chi tâka.

⁶Ruathartehai kha hongin, an tuama, irzôn suakin, an phûm ta.

⁷Dârkâr thum zoia chu a dôngma khom thil omzia inhre loiin a hong lûta.

⁸Petera’n a kuang, “Nin hril roh, ram kha hiang dôr vaiin mo nin izuar?” a tia. Sapfiri khan, “O! kha dôr khan” a tia.

⁹Petera’n, “Ithoa mo Rengpa Irtha fia tumin nin inthurual? Irngai ta, ni pasal phûmtuhai khom mikot kôl an hong tung nôk tâk so, nang khom nang irzôn suak an ti,” a tia.

¹⁰Khanchu irningloiin a ke kôla khan an rîla, a thi zôi zel tâka, ruathartehai kha an hong lûta, ama kha a thiin an hong hmua, an irzôn suaka, a pasal kôla an phûm sa tâka.

¹¹Koiindang mi murdihai le kha thu inhriat murdi’n chu a sân an chi tâka.

¹²Tîrtônhai chu mipui laia thilirkhêl le sinirkhêl tamtak an tho thiaia. An rêngin lungrual takin bokropa an inkhôm ngaia.

¹³An kuanga khan tûte mi dang kop ngam mahaia chu, a sân an irngaisânghai tak tak a ni.

¹⁴Rengpa iamtuhai chu, nupang, pasal, an kuanga kopin an pung thiai mai.

¹⁵Khanchu dam loihai khom kholâihaia an irzôn suaka, zâlhmun haia, puanthâ haia an inzâltirhaia. Petera hong inlôi va inlôi khan ar hlîmin senkhat lua ar hli theina hrangin an iti a ni.

¹⁶Jerusalem kôlvêl ata khomin mi an honga, dam loihai, ramilhli ichelhai an hruaia, khahai murdi khom kha an hong dam thiai tâka.

¹⁷Khan, Ochai inlaltak le a changpui murdihaiin; Sadukai pâla mihai kha, an hong irthoka; tîrtônhai kha an hnarsa hai tak taka, dengintheitirhai an nuam tâka.

¹⁸Khaang khan, tîrtônhai kha an chelhaia, vântâng intângna ina an khumhai tâka.

¹⁹Khannisianlân, zâna Rengpa itîr vântîrtôn inkhatin intângna in mikot kha a hong inhonga, a hruai suakhaia, an kuang,

²⁰“Fe ta unglân, Tempila va ngîr unglân, mipuihai kuang hi hringna thu le a omzia murdi hi van sîr ta roi,” a tia.

²¹Kha thu kha an inhriatin chu an fe tâka, zînga chu Tempila an lûta, mi an irchutirhai ta. Ochai inlaltak le a chanpuihai khan Israel upahai Sanhedrin-ah mi murdi an koi bukhaia, tîrtônhai kha va hruai hrangin intângna ina mi an tîra.

²²An mi tîrhai kha an va fea, khannisian, intângna ina khan va hmu mahai, an hong kîr nôka,

²³“Intângna in kha sataka irkhârin kin hmua, khannisianlân kin hong inhonga, a sûnga tûte hmu ma ung,” tiin an hong insîra.

²⁴Tempil hruaitu le Ochai inlalhaiin an inhriatin chu, “Itina mani ta ngai?” tiin a sân an buai tâka.

²⁵Kha zoro lai khan mi inkhat a honga, an kuang, “Irngai u ta, intângna ina mi nin ikhumhai khan tempila mi an irchutirhai,” a hong tia.

²⁶Khanchu, tempil hruaitu kha a chanpuihai leh an honga tîrtônhai kha nakhrât song loiin an hong hruaihaia, nakhrât an songin chu mipuiin lungin dênghai an tih ti an chi sikin.

²⁷An hong hruai intunghaiin chu Sanhedrin-ah khan an inngîrtirhaia, Ochai inlaltak khan an kuang,

²⁸“Hi Jisua irhminga thu insîr viat ta loi hrangin thu nangni kin pêka; irngai u ta, nin thu irchutir Jerusalem pumpui nin insip zit tâk hi te; hi mi thina hi keini chunga nin ni intum a ni hi te,” tiin a sâmhaia.

²⁹Petera le tîrtônhai khan “Mihriam thu nêkin Pathian thu kin izôm hrang a ni.

³⁰Ei irchibulhai Pathian khan, krosa hembea nin ithat tâk Jisua kha, a kaithoi nôk tâka.

³¹Israelhai sual irlettira ngaidam an ni theina hrangin. Ama ngei kha Pathianin rêng le saninhringtu ni hrangin a chang tiang a chôiindôm ta.

³²A thu zômtuhai kuang Pathian ipêk Irtha Irthiang le keini hi kha thu’nhretuhai kha kin ni,” tiin an sâma.

³³Kha an thu kha an inhriatin chu a sân an ning an mur tâka, tîrtônhai kha thatpai an tum tâka.

³⁴Khannisianlân, Farisai inkhat; ar hming Gamaliela, Dân irchutirtu, mi murdi irngaisâng tak kha Sanhedrin-ah khan a ngîra, tîrtônhai kha insuahai viat hrangin enkoltuhai kha a hrila.

³⁵Roirêltuhai kuang khan, “Israel mihaio, hi mihai chunga nin sintho tuma khan irdîn roi.

³⁶Kha mân khan Theuda kha, mi roiinpui tak nia irbe’n a honga, mi irza minli vêlin an zuia. Ama kha an thata, ama zuituhai murdi kha an indarh zita, ite ni ta mahai.

³⁷Kha zoi hnung chu, irteppui lai khan Galili rama om Juda kha a hong nôka, ama khomin mipui a sân an hnêhaia. Khannisianlân, ama khom an thata, ama zuitu murdi khom an indarh nôk zit sa ta.

³⁸Khasikin, atûn hin nangni ki ti, hi mihai hi tônhai no roi, inomtirhai chian roi. Hi an sintho tum le an sinthohai hi mihriam tho suakna vai a ni’n chu mong nôk zôi a ti.

³⁹Khannisian Pathiana irthoka suak a ni’n chu that theihai no chin ni; Pathian doi hong nina nin ti,” a tia.

⁴⁰Khanchu, a thu kha an zôma, tîrtônhai kha an koia, an khaphaia, Jisua irhminga thu’nsîr viat ta loi hrangin thu an pêkhaia, an insuahai tâka.

⁴¹Khanchu Jisua irhming sika mualphoi tuang hranga inruk an ni sikin, lôm takin Sanhedrin ata an suak ta.

⁴²A nitin, Tempila le in tiang “Jisua kha Mesia a ni,” iti insîr le irchutir mong ual mahai.