Read Hrangkhol TÎRTÔNHAI SINTHO 6 Bible Online

TÎRTÔNHAI SINTHO 6 - Hrangkhol bible

TÎRTÔNHAI SINTHO 6

¹Kha zoroa khan irchutirhai an pung mai lai khan, a nitin an thil sema khan an meithâihai an uksak ngai no sikin Grik chong hmang ngai Judahai kha Hebrai chong hmang Judahai chunga an chiara.

²Sômhleihnihai khan irchutir danghai murdi kha an koi buk zita, “Pathian thuhril mâksana a nitin sumpuan zêka ei changin chu dik no ni.

³Khanchu, urênghaio, nin laia mi irhming sa, Irtha Irthianga sip, mi pasal sari inthang unglân, an kuang hi sin hi inhlan kin ti.

⁴Keini chu chongchai le thu’nsîrin om kin ti,” an tia.

⁵Kha thu khan mipui murdi an lômtirhaia; khanchu, Stefana, iamtu det tak le Irtha Irthianga sip le Filipa, Prokora, Nikanora, Timona, Parmena, Nikola, Juda saphun, Antiokei khuaa mihai an inthanghaia.

⁶Kha mihai kha tîrtônhai makunga an inngîrtirhaia, tîrtônhai khan an lu chunga kut irnghatin an chongchaia.

⁷Khanchu, Pathian thu chu an darh zêl tâka, Jerusalema irchutir a sân an hong punga, Ochaihai laia mi tamtak khomin Iamna kha an pom sa tâka.

⁸Stefana chu Pathian lungkhamna le sinthotheina’n a sipa, mi laia sinirkhêl le thilirkhêl roiinpui tak a tho ngaia.

⁹Khannisianlân, Kurini khua le Alexandria khua ata Juda senkhat, “Mi’ntâng suak pâl,” Sinagok an itia kop sa ngaihai le Kilikia ram le Asia rama Judahai an hong irpâla, Stefana kha an hong irsêlpuia.

¹⁰A vârna le an sîrtirtu Irtha kha, sêl inhnê thei mahai.

¹¹Khanchu, “Mosia leh Pathian a hril insiat kin inhriat” ti hrangin mi an inphûta.

¹²Mipuihai, upahai le Dân irchutirtuhai kha an inthorhaia, Stefana kha an beia, an chela, Sanhedrin roirêltuhai kuang an hruai zôi tâka.

¹³Inhriatpuitu milak an siama, khahai khan, “Hi pa hin ei Tempil irthiang le ei Dân hi a hrilinsiat ngai.

¹⁴Nazaret Jisua’n ei tempil hi insiat a ta, Mosia Dân ni pêkhai hi indanglamtir zit a ti, a iti kin inhriat a ni,” an tia.

¹⁵Roirêl buala om murdi’n Stefana kha an en chuta, a hmêl kha vântîrtôn hmêl angin an hmua.