Read Hrangkhol TÎRTÔNHAI SINTHO 7 Bible Online

TÎRTÔNHAI SINTHO 7 - Hrangkhol bible

TÎRTÔNHAI SINTHO 7

¹Ochai inlaltak khan, “Hi thu hi a dik mo?” a tia.

²Khan, Stefana’n, “Ki urênghai le ka pahaio, irngaitua roi. Ei irchibul Abrahama kha Haran khuaa a om mân, Mesopotamia rama a om lai khan, Roiinpuina Pathian kha a kuang an lâra,

³‘Ni ram le ni sûngsuakhai hi masanhaiin lân, ram nang ki la inhmutirna hrang tiang fe roh,’ a zuang tia.

⁴Khanchu, Kaldai ram ata a suaka, Harana om hmun a siama. A pa thi zoiin chu khataka irthokin atûn nin omna rama hin Pathianin nangni a irthontir a ni.

⁵Pathianin ram lua hrang ite ke sirna hmun khom pe maka; khannisian, Abrahama kha nâi nei loi a ni khomin, ama le ar chihai kuang hi ram hi pêk an kung tâka.

⁶Pathianin hiang hin a ti, ‘Ni’rchihai chu mi rama mikhual la ni an ti, kum irza minli mi suaka omin denginthei ni an ti.

⁷Khannisian suaka siamtu hrang nam chu keima ngeiin la ngaitua ki ta, kha zoi hnunga suak an ta, hi hmuna hin ki sin la tho an ti,’ a tia.

⁸Khanchu, Pathianin Abrahama kuang sertan thu a thung tâka, khanchu Abrahama’n Isaka a neia, sûn riat nia a ser a tan pea. Isaka’n Jakoba a neia, Jakoba’n nâipasal, sômhleihnihai kha a neia.

⁹“Khan, irchibulhaiin Josefa kha an hnarsaa, Aigupta ram tiang an zuara; khannisianlân Pathianin a kuang a om,

¹⁰intak a ituang murdi ata kha a sansuak zêl a ni. Aigupta rama rêng Faroa mit hmua mi vâr tak le inditom tak an nitira; Faroa khan Aigupta ram le a sûngkuahai chunga hruaitua a siam tâka.

¹¹Khan, Aigupta le Kanaan ram pumpuia châm a hong tâka, a sân intak an tuanga; ei irchibulhai khan fâk hrang nei ta mahai.

¹²Jakoba’n Aigupta rama bu a om tih an hriatin chu, ei irchibulhai kha a tîr suakhaia, kha kha an fe phutna masa tak a ni.

¹³An voihni fenaa khan Josefa’n a urênghai kuang hmêl inhriatna a siama, Faroa khomin Josefa in sûng mihai kha an hriathai tâka.

¹⁴Khanchu, Josefa khan a pa Jakoba le a urênghai murdi an koitirhaia, an rêngin sômsari ringa an ni.

¹⁵Jakoba hai kha Aigupta rama an fea, kha rama khan ama le ei irchibulhai kha an thi tâka.

¹⁶An ruak kha Sekem kho dênin an hong irzôna, Abrahama’n Sekem khuaa Harmora nâihai kuanga suma a ilâk thâna khan an phûm tâka.

¹⁷Abrahama kuang Pathian chonginkung kha a tung hrang zoro anai tika chu ei mihai kha Aigupta-a khan a sân an punga, an tam tâka.

¹⁸Aigupta rama khan rêng dang, Josefa inhre loi, a hong inlal tâka.

¹⁹Kha pa khan ei irchibulhai kha fing irfia takin a beihaia, ei irchibulhai deng an theitira, an nâitesenhai thi hrangin an paitirhai ngaia.

²⁰Kha zoro lai khan Mosia a zuang suaka, nâitesen inditom tak a nia, an ina tha thum an ompuia.

²¹An in ata an pai suak zoiin chu Faroa nâinu’n a lâka, a nâi hrangin a don tâka.

²²Mosia kha Aigupta rama vârna murdi ar chutira, khanchu, thu insîr thei tak le sinthothei tak a hong ni tâka.

²³Mosia kha kum sômminli a ni kum khan, a urêng Israel nâihai kha hro a nangin an hriat tâka.

²⁴A va hro’n chu an laia inkhat kha Aigupta mi’n deng a hong intheitir lai kha a hmua, a sana, dengtheina tuangtu phuba kha a lâka, Aigupta mi kha a that tâka.

²⁵Mosia khan ama kutin Pathianin anni saninzôk a ti, ti a urênghaiin an inhriat mani a tia; khannisianlân, inhre ta mahai.

²⁶A tûka chu mi inhni irsual lai a hong hmua, selhai tumin, ‘Irngai u ta, urêngkhat kêng nin ini, ithoa mo nin irsual?’ tiin irngei a tuma.

²⁷A pualoi masa pu khan Mosia kha a nampaia, ‘Kin chunga hruaitu le roirêltua tu’n mo nang siam?

²⁸Mizâna Aigupta mi ni ithatpai ang khan ni thatpai ni itum ma ni?’ a tia.

²⁹Kha thu sika khan Mosia kha a rota, Midian rama a va om tâka, kha khan nâipasal inhni a nei tâka.

³⁰“Khan, kum sômminli a hong ni zoiin Sinai tânga ramchâra chînribuka meichok kâra vân vântîrtôn a kuang an lâra.

³¹Mosia’n a thil hmu kha ar khêl a ti tak taka; fia tumin a va nâia, Rengpa hnuk irhâiin,

³²‘Kei hi ni puhai Pathian, Abrahama, Isaka, Jakoba hai Pathian kha ki ni’ a lei tia. Khanchu Mosia kha a chia, fia ngam ta maka.

³³Rengpa khan a kuang, ‘Ni kekok kha khek roh, ni ngîrna kha hmun irthiang a ni.

³⁴Aigupta rama ki mihai deng an intheizia ki hmu maia, an khêk irhâi khom kin hriata, anni hruai suak hrangin ki zuang ichum ta a ni. Hong ta, Aigupta rama nang tîr ki ti,’ a tia.

³⁵“Kha Mosia ‘hruaitu le roirêltua tu mo nang siam’ tia an isêl kha chînribuka vântîrtôn an laia inlârtu khan a changpuia, Pathianin ama ngei kha hruaitu le sansuaktu ni hrangin a itîr a ni.

³⁶Ama khan anni kha a hruai suaka, Aigupta rama, Tuipui Sena, ramchâra kum sômminli sûng dênin sinirkhêl le thilirkhêlhai tho’n Aigupta ram ata mipuihai a hruai suak tâka.

³⁷Kha Mosia kha Israel nâihai kuang, ‘Pathianin keima angin nin urênghai laia om deipu nangni la siam pe a ti’ titu kha a ni.

³⁸Ama kha a ni ramchâra pungkhôm laia, Sinai tânga ama chongpuitu vântîrtôn laia khom oma, eini ni pe hranga Pathian thu hring latu kha a ni.

³⁹Khannisianlân, ei irchibulhai khan a thu zôm nuam mahaia, an sêla, Aigupta ram tianga kîr nôk an nuama.

⁴⁰Arona kuang, ‘Kin mahruaitu hrangin pathianhai ni siam pe roh, Mosia, Aigupta ram ata ni hruai suaktu lak a thurchi reng inhre ta ma ung’ an tia.

⁴¹Kha hnung chu, khahai khan sehrât irlim an sina, a’rlim kha satakin an biaka, an kut suaka khan an lôm tâka.

⁴²“Khanchu, Pathianin anni kha ar heisanhaia, irvâna ârsihai an biak theina hrangin a rotsanhaia, deipu lekhabua: ‘Israel in sûng mihaio, kum sômminli sûngin ramchâra khan irbôlna sa thatin nin inhlan ma ni?

⁴³Moleka puan in le nin pathian Refana ârsi millimhai kha chubai nin mûka, khasikin Babulon khêl tiang nangni intângtir ki ti,’ ti irziak ang khan.

⁴⁴Ei puhaiin chu ramchâra khan Pathian omna puan in an neia, Mosia kuang Pathianin siam hrang lam a hril laia, a dûr an entir ang taka siam a ni.

⁴⁵Kha ngêt kha ei irchibul irchihai khomin an nei maia, Pathianin ei puhai makunga Jentailhai an hnot suaka, Josua hai Kanaan ram an lûta khan an lûtpuia, Davida zoro dên khan a om tâka.

⁴⁶Davida khan Pathian changpuina a donga, Jakoba Pathian ta hrangin in sin phalna a ngên tâka.

⁴⁷Khannisianlân, Solomona’n in kha a sin pe tâka.

⁴⁸Aniachu, Anchungtaka kuta sin inhaia om ngai mah, deipu’n:

⁴⁹Rengpa’n, ‘Irvân ki toihmun a nia, Irnêng hi ki ke irnghatna a ni. In i ang mo nin ni isin pe hranga, ki’rngamna hmun te khôn mo?

⁵⁰Hi thil murdi hi ki kuta ki isiam a ini loi ma ni?’ a ti: tia a insîr ang khan.

⁵¹“Mi pualoihai, sertanloi mi ang, milung le beng ngarhaio; Irtha Irthiang nin doi maia, nin puhai ang dênin nangni khomin nin tho ngaia.

⁵²Nin puhaiin deipuhai laia tu mo deng an inthei loi? Mi fel Tak, hong hranga thu lei hriltuhai kha an thathaia, atûn nangnihai hi, kha Mi fel tak incheltirtu le thatpuhai kha nin ni.

⁵³Nangni hi Pathian Dân, Vântîrtônhai zuang inchoi hmu chaka, zôm loihai nin ni,” a tia.

⁵⁴Kha thu kha an inhriattin a sân an ninginmurin Stefana chunga an irkam an nôia.

⁵⁵Khannisianlân, Stefana chu Irtha Irthiangin a sipa, irvân tiang a thîr chiana, Pathian roiinpuina le Pathian chang tianga Jisua ngîr a hmua.

⁵⁶“Irngai u ta, irvân irhong ki hmua, Pathian chang tiang Mihriam Nâipa ngîr khom ki hmu,” a tia.

⁵⁷Khanchu, inring takin an khêka, an mikuar an hîpa, Stefana kha an hong bei tâka,

⁵⁸khua ata kha an nam suaka, lungin an dêng tâka. Thu’nhretuhai khan an puanhai kha ruatharte inkhat ar hming Saula an iti ke bula khan an siaa.

⁵⁹Stefana’n “Rengpa Jisua, ki’rtha la roh,” tia Rengpa a koi laia lungin an dêng sup supa.

⁶⁰Khûksadelin, inring takin “Rengpa, hi an sintho insual hi inhre pehai mai no roh,” a tia. Kha thu kha an sîr zoiin chu a hrang a chat tâka. Saula khomin an ithat kha a pompuihaia.