Read Hrangkhol TÎRTÔNHAI SINTHO 8 Bible Online

TÎRTÔNHAI SINTHO 8 - Hrangkhol bible

TÎRTÔNHAI SINTHO 8

¹Saula khom khan Stefana thi kha a sa a ti saa. Kha nikhua ata khan Jerusalem-a Koiindang kha deng an theitirhai tâka. Khanchu, tîrtônhai vai no chu Juda le Samari ram kho tina an indarh zit tâka.

²Pathian ngaisak senkhathaiin Stefana kha an phûma, a sân an châ tâka.

³Saula chu Koiindang inboipai tumin in tina a lûta, nupang pasal a kaisuakhaia, intângna ina a khumhai ta.

⁴Khan, iamtu kho tina irthekhai kha hmun tina an fea, Thurchi Sa an hril thiaia.

⁵Filipa chu Samari khopuia a chuma, an kuang Krista Thu a hrila.

⁶Mipuihaiin Filipa thu’nsîr an inhriata, a sintho irkhêl thohai an hmu’n chu a thu’nsîrhai kha a sân an irngaia.

⁷Ramilhli kha inring taka khêkin mi tamtak sûng ata an hong suaka, zenginthî le ke’nbâi tamtak khom an damtirhaia.

⁸Kha khuaa mihai kha a sân an lôm tak taka.

⁹Kha khuaa khan mi inkhat, Simona an iti, dôi thei a oma. Mi roiinpui tak niin ar bêa, Samari mihai khan a dôi kha ar khêl an ti tak taka.

¹⁰Mi murdi’n, a lian a chînin a thu kha a sân an irngai. “Hi pa hi Pathian sinthotheina ‘Roiinpui’ an iti kha a ni,” an tia.

¹¹A mitphil thu kha zoro sôt tak a’rkhêl an lei ti tâk sikin a thu kha an irngai ngaia.

¹²Khannisian Pathian Ram Thurchi Sa le Jisua Krista irhminga Filipa’n a ihril kha an iam tâkin chu nupang pasalin baptisma an hong chang tâka.

¹³Simona khomin a iam tâka, baptisma a changa, Filipa kha a kop khak ta, thilirkhêl le sinirkhêl roiinpui tak a ithohai kha a hmua, ar khêl a ti tak taka.

¹⁴Jerusalem-a tîrtôn omhai khan Samari kho mihaiin Pathian thu an pom tah ti an inhriatin chu an kuang Petera le Johana an tîra.

¹⁵Anni chu an zu fea, Irtha Irthiang an dong theina hrangin an chongchai pehaia.

¹⁶An laia tukhomin Irtha Irthiang kha la dong mahaia; Rengpa Jisua irhmingin baptisma an ichang vai a la ni.

¹⁷Khanchu, Petera le Johana’n an lu chunga kut an irnghata, Irtha Irthiang an dong tâka.

¹⁸tîrtônhaiin an chunga kut an irnghatin Irtha Irthiang pêk anni ti Simona khan a hmu’n chu,

¹⁹“Hianga sinthotheina hi ni pe roi, tu chunga khom kut ki’rnghatin Irtha Irthiang an dong sa theina hrangin,” tiin an kuang poisa pêk a tuma.

²⁰Khannisianlân, Petera’n a kuang, “Pathian thil manboi pêk hi suma irchôk ni tum sikin, ni sum leh ni pumpuiin irhmang ni ti.

²¹Ni lungrîl irput lam Pathian mit hmua dik maka, hi thila hin kopna le dongtum nei mak che.

²²Aniachu, ni sual hi irletin lân, Rengpa kuang chongchaiin lân, ni ngaituana sual hi nang ngaidam no ni mo.

²³Irzukna lungrîl siat tak ni’rputa, sualin nang a khit khak ti nang kin hriat,” a tia.

²⁴Simona’n, “Ni thil insîrhai chu ite ki chunga a zuang tung nona hrangin nangin Rengpa kuang ni ngên pe roi,” a tia.

²⁵Khanchu, Rengpa thu kha an inhriattira an insîr hnung chu Petera le Johana kha Jerusalem tiang an kîr nôk tâka. An kîr pum khan Samari rama kho tamtaka Thurchi Sa an hrila.

²⁶Rengpa itîr vântîrtônin Filipa kha a chongpuia, “Thoiin lân, Jerusalem ata Gaza khua zu sun sim tiang ramchâr thengthai tiang khun fe roh,” a tia.

²⁷Khanchu, a thoia, a fe tâka. Khan, Ethiopia rama mi inkhat, an rêngnu Kandaki hnuaia thainuzel inlaltak tak, a sum murdi enkoltu, Jerusalema Pathian biak hrangin a hong fea;

²⁸a kîr nôk tiang chu tâlia toi pumin deipu Isaia lekhabu a tepa.

²⁹Irtha’n Filipa kuang, “Tâli so va panin lân, va nâi roh,” a tia.

³⁰Khanchu, Filipa kha a van tâna, deipu Isaia lekhabu, thainuzel itep kha, ar ngaia, “Ni itep kha a omzia mo nin hriat?” a tia.

³¹Ama khan, “Tûte’n ni hrilfiah pe loiin itin mo ki inhriat thei hrang?” a tia. Filipa kha a kôla a toia chuang sa hrangin a fiala.

³²Pathian lekha thu irchâng a itep lai kha hi hi a ni: “Belra that hrang angin ama kha an hruaia, Belrate a mul eppu makunga a idâihrek angin ama kha a bâi âng mah,

³³Mualinphoitir a nia, dik loi taka rêl pe a ni, A’rchihai thurchi tu’n mo lan sîr hrang? Rammual ata a hringna an lâk pe tâka,” ti hi.

³⁴Khan, thainuzel khan Filipa kuang “Deipu hin tu thu mo a insîr, ama thu mo, mi dang thu mo? Ni hril ta,” a tia.

³⁵Filipa khan Lekha thu ata insîr phut chu Jisua thurchi a hril tâka.

³⁶Khaanga lampuia an fe lai khan tui omna an tunga, thainuzel khan, “En ta, hi hin tui a om, baptisma ki ichang hrang hi, imo ni khâl?” a tia.

³⁷Filipa khan, “Ni milung murdi’n ni iamin chu baptisma chang thei ni ti,” a tia. Ama khan, ‘Ki iam,’ Jisua Krista chu Pathian Nâipa a ni ki iam,” a tia.

³⁸Khanchu, tâli kha an ngîrtira, Filipa le thainuzel kha an inhni’n tuia khan an chuma; Filipa khan a baptis tâka.

³⁹Tui ata an hong suakin chu, Rengpa irtha’n Filipa chu a lâkpai tâka. Thainuzel khan hmu ta maka; khannisianlân, raifân takin a fe tâka.

⁴⁰Filipa kha Azota khuaa an hmua, Kaisari khua a tung mâka chu kho tina a fe tâka, Thurchi Sa a hril thiaia.