Read Hrangkhol TÎRTÔNHAI SINTHO 9 Bible Online

TÎRTÔNHAI SINTHO 9 - Hrangkhol bible

TÎRTÔNHAI SINTHO 9

¹Saula chu Rengpa irchutirhai kha that hrangin a lan sîhai thiaia. Ochai inlal tak kuang a fea,

²Rengpa Lampuia zui mihai, nupang pasal, a ihmu murdi chela Jerusalama, a hong hruai theina hrangin Damaska khuaa Sinagok hruaituhai pêk hrang lekha Ochai inlal tak a va ngêna.

³Damaska pana a fe laiin, a tung vâng tâka, voikhat rengin irvân ata ar hîlin a zuang vâr pe phuta,

⁴irnênga a sakor ata a tâk tâka; “Saula, Saula, ithoa mo deng ni ni inthei?” ti hnuk irhâiin a zuang tia.

⁵Ama khan, “Rengpa, tu mo ni ini?” a tia. Hnukirhâi khan, “Jisua, deng ni intheitirtu kha ki ni;

⁶thoiin lân, kho sûnga lûtin lân, ni tho hrang nang lei hril an ti,” a tia.

⁷A ifepuihai kha chamai rakin an ngîra, hnukirhâi kha an inhriata chu tûte hmu mahai.

⁸Saula chu a hong thoia, a hong menga, ite hmu thei ta maka; khanchu, a kuta an kaia Damaska-a khan an hruai lûta.

⁹Sûn thum rammual hmu loiin a oma, ite fâkin in mah.

¹⁰Damaska-a khan irchutir inkhat, Anania a oma. Rengpa chu a kuang an lâra, “Anani” a tia. Ama khan, “Rengpa, hi hin ki om,” a tia.

¹¹Rengpa khan, “Thoiin lân, lamlian ‘intûn’ an itia khan fe’n lân, Juda ina Tarsa khuaa om Saula zong suak roh. Ama kha a chongchai lai tak a ni,

¹²inlârna’n mi inkhat, Anania a hong lûta, a mit invâr pe nôk hrangin a chunga kut irnghatin a hmua,” a tia.

¹³Anania’n, “Rengpa, kha pa khan Jerusalema ni mi irthianghai a sate’n deng an theitir ti mi tamtakin an hrila.

¹⁴Hi hin khom nir hming irlam murdi chel theina hrangin Ochai inlalhai kuang ata irchamneina a hmua hong kêng a ini,” a tia.

¹⁵Rengpa khan, “Fe chian roh, hi pa hi Jentailhai, rênghai le Israelhai kuang ki’rhming pe lûttu hranga ki mi inkung kêng a ini.

¹⁶Ki’rhming sikin intak i anga irkhêl mo a la ituang hrang, ama lan hretir ki ti,” a tia.

¹⁷Khanchu, Anania chu a chuma, ina khan a va lûta, a chunga kut irnghatin, “Urêng Saula, ni mit a vâr nôk theina hrang le Irtha Irthianga ni sip theina hrangin, ni hongna lampuia ni kuanga inlâr Rengpa Jisua khan ni kuang a ni hong itîr a ni,” a tia.

¹⁸Khanchu, irningloi rengin a mit ata hlip anga om a tâk zôia, a mit a hong vâr nôk tâka. Khanchu, a thoia, baptisma a chang ta.

¹⁹Bu anh a fâka, a hong har nôk tâka. Damaska-a khan irchutirhai kuang idôr sûn ten mani a châma.

²⁰Sinagokhaia khan Jisua Pathian Nâipa a nih ti a hril irphut zôi tâka.

²¹A thu’nsîr inhriat murdi’n a sân ar khêl an tia. “Hi mi hi Jerusalema Jisua Irhming irlamtuhai dengintheitirtu kha ni ma mo? Ochai inlalhai kuang hruai hrangin hi Irhming irlamtuhai chel tumin hi hin khom a izuang mo ni ma?” an tia.

²²Saula thu insîra khan mi an hne tîr tîra, Jisua chu Mesia a nih ti fel takin a hrilfiah ngai sikin Damaska-a Judahai kha a sêl indonghaia, an buaitirhai chit ta.

²³Zoro sôt tak hnunga chu Saula that tumin Judahai an chong irhlôma.

²⁴Khannisianlân, ama’n an thiltum kha a lei inhriata. Khan that hrangin kul mikot tina khan a sûn a zânin ama an inruanga.

²⁵Khannisianlân, a irchutirhaiin ama kha an hruaia, zâna kulbang ir-ônga kokin an inthâka.

²⁶Khan, Saula’n Jerusalem a hong tungin chu irchutirhai laia kop a tuma anni khan irchutir a ni sa tih iam thei mahaia, an rêngin a sân an chia.

²⁷Khannisianlân, Barnaba khan tîrtônhai kuang a fepuia; lampuia Rengpa a hmua, Rengpa’n ama a ichongpui lam thuhai, Damaska-a Jisua irhminga hâi takin thu a ihril thurchihai a hrilhaia.

²⁸Khanchu, Saula chu Jerusalema khan an laia a om sa tâka. Rengpa irhmingin hâi takin thu a hril ngai.

²⁹Grik chong hmang Judahai kuang thu an sîra, a sêlhaia, anni khan that an lei tum tâka.

³⁰Urênghaiin kha kha an inhriatin Kaisari khuaa an hruaia, Tarsa khuaa an infetir pat tâka.

³¹Judai rama, Galili rama, Samari ram haia, a ram pumpuia koiindang mihai kha lungngam takin an oma, an det tîr tîra, Rengpa chi pumin an om saa, Irtha Irthianga irtharngamin an hong pung tîr tîra.

³²Petera’n hmun tin ar fang laiin voikhat chu Luda khuaa mi irthianghai a zu hroa.

³³Kha khan mi inkhat, Ainia, zenginthî sika kum riat dên zâlhmuna zâl tâk a hmua.

³⁴Petera khan a kuang, “Aini, Jisua Krista’n nang an dam ta, thoiin lân, ni zâlna kha siam infel roh,” a tia. Khanchu, a thoi zôia.

³⁵Luda le Saron phâia om murdihaiin Aini kha an hmua, Rengpa tiang an hong irlet intam ta.

³⁶Khan, Jopa khuaa irchutir inkhat Tabiti a oma, a Grik irhming chu Dorki a ni, kha kha ‘Sazukilla’ tihna a ni. Thil sa tho le inrianghai changpuina’n a zoro a lei hmang ngai a ni.

³⁷Kha lai khan dam maka, a thi tâka. Tui an irsiltira, chontan chungintaa an inzâltira.

³⁸Luda chu Jopa kho kôla om a nia. Luda khuaa Petera a om ti irchutirhaiin an inhriatin chu, “Lungkham takin hong lat ri se,” tia ngên hrangin a kuang mi inhni an tîra.

³⁹Khanchu, Petera kha a thoia, an pâla khan a fe sa tâka. A va tungin chu chontan chungintaa an hruai kâia, meithâi murdi kha a kôla an ngîra, an chapa. Dorki’n a dam laia songkol le puan diar dang a isiamhai kha inentirin an chapa.

⁴⁰Petera khan an rêngin an suaktirhai zita, khûksadelin a chongchaia ruak tiang a’rheia, “Tabiti, thoi roh,” a tia. Khanchu, Tabiti kha a hong menga, Petera kha a hmua, a hong toi suak tâka.

⁴¹Petera khan an bana, a kaithoia, mi irthianghai le meithâihai kha a koihaia, damin an kuang a hruai tâka.

⁴²Kha kha Jopa kho pumpuiin an inhriata, mi tam takin Rengpa an iam tâka.

⁴³Petera kha Jopa khuaa khan zoro sôt tak, savun siamtu Simona ina a châma.