Read Hrangkhol ROM 12 Bible Online

ROM 12 - Hrangkhol bible

ROM 12

¹Khasikin urênghaio, Pathian lungkhamna sika hin irbôlna hring le irthiang le Pathian lôm inruk ni hrangin nin takpum kha inhlan hrangin nangni ki ngên a ni; khaang kha nin sintho hrang lam tak a ni.

²Hi rammual om lam ang hin om no unglân, Pathian nuamlam, a sa le lôm inruk le satirkip kha nin inhriat infel theina hrangin, nin lungrîl a thara omin hong danglam ta roi.

³Pathian ni ipêk lungkhamna sika hin nin laia tukhom irngaiinhlu hrai loi hrangin nangni ki ingên a ni. Pathianin mi tin kuang iamna a ipêk ang takin, mâni irphu tôk lungrîl irput roi.

⁴Takpum inkhata ôn tamtak ei neia, ôn murdi’n tho tum an nei seng;

⁵khaang dênin eini khom tamtak ni inlân khom Kristaa khan takpum ôn anga irzom irhlôm seng ei ni.

⁶Lungkhamna a ni ipêk ang dênin thilmanboi pêk dang dang ei nei seng, thuhrilna tiang a ni’n chu, ei iam lam ang takin insîrin lân,

⁷sinthôna tiang a ni’n chu, sathnem irngai takin sinin lân, irchutirna tiang a ni’n chu irchutirin lân;

⁸mi irtharngamtir hrang a ni’n chu thei tôp insua’n lân; pêktu’n chu phal takin pe sianlân, roirêltu’n chu takirtâi takin rêl sianlân, changpui innanghai changpuitu’n chu raifân takin changpui ri se.

⁹Lungthungna chu vârillekna kop loiin ni ri se. Sual chu khôkmâk unglân, a sa kha pom khak roi.

¹⁰Urêng angin ir-en irhlôm unglân, irchôiindôm irhlôm uar roi.

¹¹Irtha inboi viat loiin lungrîl irthor takin Rengpa sin kha tho roi.

¹²Sabeina khan nangni inlômtir sianlân, dengintheina nin tuang khomin dorôi takin tuang unglân, itiklai khomin chongchai roi,

¹³urêng irsamhai kha irchangpui irhlôm unglân, mikhual lôm uar roi.

¹⁴Deng nangni intheituhai chu satvurhai unglân, khua sâlhai no roi.

¹⁵Lômhai chu lômpuihai unglân, chaphai chu chappui roi.

¹⁶Ngaitua hmunkhatin om seng unglân, irngaitua irsâng hrai no unglân, mi chînhai irrualpui roi, Vâr irti no roi.

¹⁷Sual chu suala ngêt thuan no unglân, mi murdi irngaia a sa ngaitua roi.

¹⁸Nangni chu mi murdi leh irngei tum roi.

¹⁹Inditom takhaio, “Phuba la no unglân, Pathian ningmurna inkian ual roi; phuba rêng rêng keima lâk hrang a ni, keima’n thuan ki ti Rengpa’n a ti,” ti irziak a nia.

²⁰Khasikin ni râl a phîng a châmin chu fa hrang pe ro; a tui an hrâlin chu in hrang pe roh, khaang khan ni tho’n chu a sân a inzak hrang a ni.

²¹Sual nang inhnêin om no’n lân, satna’n sual chu inhnê ual roh.