Read Hrangkhol ROM 13 Bible Online

ROM 13 - Hrangkhol bible

ROM 13

¹Mi tinin an chunga roirêltuhai thu an izôm hrang a ni. Pathian inkung ni loiin roirêltu om thei mahai; atûna roirêltuhai khom hi Pathian inkung kêng an ini.

²Khanchu, roirêltu doi chu Pathian inkung a idoi a ni; a doitu chu ama chunga hremna intungtir a ti.

³Roirêltu chu thil sa thopu hrangin chu ichiom ma, thil sual thotu hrangin chu ichi a iom a ni. Roirêltu chi loia om mo ni nuam? Thil sa tho’n lân, inpâk hlo ni ti.

⁴Ni satna hranga Pathian sinthopu a ni. Thil sual ni tho’n chu chi ro, khandai kha an ichôi pai pai ni ma. Pathian sinthotuhai an nia, thil sual thotuhai chunga Pathian hremna irlektuhai an ni.

⁵Khasikin, hremna chi ringot vai ni loiin ni sia le sa inhriatna sika khom an thu ni izôm hrang a ni.

⁶Khaang khan a ni sikin khâzana khom nin chôi ngai; irchamneituhaiin an sin sataka an tho’n chu Pathian sin an itho a ni.

⁷Pe hranga an inkunghai murdi kuang pe unglân, irnêng man a niin chu pe unglân, khâzana chôi hrang a ni le chôi unglân, chi hrang chu chi unglân, mahrip hrang chu mahrip roi.

⁸Lungirthung irhlômna ringot no chu tûte kuang intâng no roi; mâni mihriam chanpui lungthungtu chu dân zôm irkip tak a ni.

⁹Dân thupêkhai, “Uire no ro, mi that no ro, inru no ro, irzuk no ro,” tihai le thupêk danghai rêng rêng hi “Nangma lung ni irthung ang hin ni bômhai lungthung ro,” tih hin a kaikhôm zit a ni.

¹⁰Lungthungna’n mâni bômhai insiat ngai maka; khasikin lungthungna hi dân zôm irkipna a ni.

¹¹Atûnlai thil omzia nin inhriat sikin le a inhai thoi zoro a ni tak tak tâk tih nin inhriat sikin, kha kha ki insîr a ni; atûn chu ei iam phut laia nêkin chu ei saninhringna chu anâi ual tâk a ni.

¹²Zân hi a boi vâng vâng tâka, khua a ivâr hrang a ni ta; khasikin izînga sintho chu pai inlân, vâr irbelin irbel ta ei ti.

¹³Sûna om angin satakin om ta ei ti, zu inbuai le zun ruia om loiin, hur le irdit songa om loiin.

¹⁴Rengpa Jisua Kristaa khan irbel lem unglân, nin taksa irzukna puiinhling hrangin ite irsiam no roi.