Read Hrangkhol ROM 14 Bible Online

ROM 14 - Hrangkhol bible

ROM 14

¹Iamnaa mi hrât loi chu, a lunghlânahai kha sêl loiin lôm roh.

²Mi inkhatin thil itinrêng fa thei hrangin a iama, mi hrât no’n chu chîmu (an sûlhloihna) vai a fâk ngai.

³Itinrêng fa thei mi khan a fâk loi mi kha hmusit no ri se; a fâk loitu khom khan a fâktu kha sêl no ri se; Pathianin ama kha chu a ilôm tâk kêng.

⁴Mi dang siahlo sêltu chu tu mo ni ini? A ngîr indet mo, a tûk mo, a ngaituah hrang chu a pu ircham cham a ni. Ngîr indet ngêt a ti, Rengpa khan a ngîr indet suaktir thei a ni.

⁵Khan, mi dangin sûn khat hi sûn dang nêkin a’rngaiinhlu bîka, mi dangin chu nikhua murdi hi irang chitin a bêa. Mi tinin mâni lungrîla inhriat infel ri se.

⁶Sûn khat ser bîktu chu Rengpa chôiindômna hrangin a iser a ni; itinrêng fâktu chu, Pathian kuang lômthu insîr baka a ifâk a ni sikin, Rengpa a ichôiindôm a ni. A fâk loitu khom khan Pathian kuang lômthu an sîr sa dên sikin Rengpa chôiindômna hrangin a inghei a ni.

⁷Tûte mâni hranga hring ni mak me, tûte mâni hranga thi ni ual mak me;

⁸ei hring khomin Rengpa ta hrangin ei ihring a nia, ei thi khomin Rengpa ta hrang ei ithi a ni; khasikin ei hring khomin ei thi khomin Rengpa ta ei ni.

⁹Khanchu mi hring le mithi Rengpa a ni theina hrangin Krista chu a thia a ihring nôk tâk a ni.

¹⁰Itho sika mo nangin ni urêngpa ni isêl mai? Itho sika mo nang khomin ni urêngpa ni ihmusit mai? Pathian roirêlna toihmun makunga khan ei la ingîr seng hrang kêng a ni.

¹¹“A hringpu kha ki ni kêng, Mi tinrêng ki makunga khûksadelin om an ti. Irnêng murdi’n Pathian ki ini inpuang an ti, Rengpa’n a ti,” ti irziak a ni.

¹²Khanchu, ei rêngin Pathian makunga mâni thurchi insîr seng hrang ei ni.

¹³Khanchu, irsêl irhlôm uar no roi, tukhomin mâni urêng tûkna hrang mani, lunghoiloina hrang mani, siam tum no roi.

¹⁴Ama khât ringotin chu a’rthiang loi ite om mah ti Rengpa Jisuaa khan kin hriat infel a ni. Nikhomsianlân, thil senkhat a’rthiang loia irngaipu ta hrangin chu a irthiang loi a ni.

¹⁵Ni thil fâk sikin ni urêng lungrîl a nain chu lungthungna lampui ni ihro ta loi a ni. A thi irthûl Krista’n a thi pe kha, ni thil fâkin inboi no roh.

¹⁶Khasikin nin ta hranga satna kha insîr insiatin om no ri se.

¹⁷Pathian Ram thu chu fâk le nêk lampang ni mah; Irtha Irthiang zâra thiam changna hai, irngeina hai lômna hai a ni ual.

¹⁸Khaanga Krista sinthotu murdi chu Pathian nuamlam mi a nia, mihriam inpâk khom a hlo ngai.

¹⁹Khanchu irngeina hrang le inlâptir irhlômna hrang thilhai kha ei irzûl ngêt hrang a ni.

²⁰Ni thil fâk sikin Pathian sintho insiat no roh. Thil itinrêng fâk hi a’rthiang, khannisian, mi dang tûkna thil chu fâk sa mah.

²¹Ni urêng tûkna hrang a niin chu hme hai, uain hai le thil tinrêng nghei a sa.

²²Ni iam lam kha iam chian roh, Pathian leh nin kâr thu a ni. Mâni iam dân lama thiam loina nei loi chu a vânnei e.

²³Khannisian, tukhomin thiam irti loi puma fâk chu Pathianin thiamno a an chang chian tâk a ni; a iam lam ang ni mah ti a ni sikin. I khom, dika inhre loi puma tho chu sual a ni.