Read Hrangkhol ROM 4 Bible Online

ROM 4 - Hrangkhol bible

ROM 4

¹Khano’nte, taksa tianga ei irchibul Abrahama thu kha itin mo ei insîr hrang tâk?

²Abrahama khan sintho sika thiam a changin chu song hrang a inei a ni; aniachu, Pathian makunga song hrang nei viat mah.

³Pathian lekha thu’n imo a insîr kha? “Abrahama khan Pathian a iama, kha a iamna khan thiam inchangtir a ni,” a tia.

⁴Sinthotu hlo chu lungkham thilpêk ni mah, lâkai anga bê a ni ual.

⁵Aniachu sintho loia, Pathian ngaisak loi, thiam inchangtirtu iam uala iamna kha, ama felnaa inkung a ni.

⁶Sintho sika ni loia Pathianin thiam a inchangtirhai vânneizia Davida khom hiang hin an sîr:

⁷“An itho’nchâinahai ngaidama oma, An sualhai irkhupaia omhai chu. Vân an nei bâk na!

⁸Rengpa’n sual neia a ibe loi chu vân an nei e,” tiin.

⁹Kha satvurna kha sertanhai hrang vai mo sertan loihai hrang khom? “Abrahama’n a iamna sikin thiam a chang,” ei tia.

¹⁰A sertan mâna thu mo a tan zoia thu? Itina irngai hrang ma ni? A sertan hnunga ni maka, a sertan mâna a ni ual.

¹¹A sertan mâna a iamna ngeiin Pathianin thiam an changtir tih entîr hrangin ser a itan kêng a ini. Khanchu sertan no khomsian iamna sika Pathianin thiam a inchangtirhai hrangin chu Abrahama chu an irtha tianga pa a ni.

¹²Sertanhai pa khom a ni, sertan an ini vai sika ni loiin ei pa Abrahama’n ser a tan mâna a iam ang dêna iamna an nei sika a ni.

¹³Dan zôm sika ni loiin iamnaa thiam inchangtir a ni sik uala, Pathian khan Abrahama kuang ama le ar chihai khan rammual hi an la ilua hrang a nih ti thu a inkung a ni.

¹⁴Dan zôm hi irchon luatu nina ni sian, iamna hi a korong chian ni a ta, chonginkung khom ite ni ma tihna ni a ti.

¹⁵Dânin chu ningmurna an suaktira, Dân om no sian inchâina khom a iom hrang ni mah.

¹⁶Abrahama irchi murdihai hrangin, dân zômtuhai vai ni loiin, ama iam anga iamtuhai hrangin Pathian thilmanboi pêk a nizia inlang hrangin iamna sikin kêng Abrahama kuang thu a inkung a ni.

¹⁷“Chi tamtak paa nang siam ki ti,” ti irziak ang khan, a iiam Pathian, mithihai inhring nôktu, thil om loihai inomtirtu a iiam Pathian mithmua khan; Abrahama chu ei renga pa a ni.

¹⁸Sabei hrang a om no khomin a sabeiin a iam ngita, khanchu chi tamtak pa a hong ni ta, “Ni’rchihai chu khi irvâna ârsi tam ang dôr khi la ni an ti,” ti irziak ang khan.

¹⁹Kum irzakhat ang dôra mi a ni tâka, a takpum ngaitua’n chu mithi ang dên a ni tâka, Sari khom kha nâi nei zât ni ta mah ti an hriat chian pumin a iamna kha chuai ual hliak mah,

²⁰iamna irsamin Pathian thu’nkung kha lunghla loia, a iamna kha a hrât tîr tîra, khanchu Pathianin a chôiindôm ual ta a ni.

²¹Thu’nkung khan a inkung tak chu hlen thei ngêt a ti a iam ngita.

²²Khasikin a lôma, “A iamna sika thiam inchangtir a ni,” an iti a ni.

²³Khanchu, hi chongbâi, “Ama chu mi fela pom a ni,” iti hi, ama chungchâng insîr hrang ringota irziak ni mah.

²⁴Keinihai, ei Rengpa Jisua mithi lai ata kaithoitu iamtuhai, iamna sika thiamchang tâkhai hrang khoma irziak a ni.

²⁵Jisua chu thil sual ei ithohai sika ithatpai a nia, Pathian kuang thiam ei changna hranga kaithoi a ni sa.