Read Hrangkhol ROM 9 Bible Online

ROM 9 - Hrangkhol bible

ROM 9

¹Kristaa khan thu dik tak ki insîr a ni; milak ma ung: Irtha Irthiang zâra ki sia le sa inhriatna khomin an hriat infel a ni.

²Ki lungrîl intak lam irkhêlzia le ki chardongna a iboi thei loizia hi!

³Ki urênghai, taksa tianga ki chipuihai irthûla hin khosâl tongin Krista kuang ata indang ni inlân, ki ti rak ngai a ni.

⁴Israel mi an nia, nâi nina hai, roiinpuina hai, thuthung hai, dân hai, sin thôna sin hai, Pathian thu’nkung hai an changa;

⁵irchibulhai kha an puhai an nia, taksa tianga suiin chu Krista ngei khom kha an irchi a ni; itinrêng chunga om Pathian chu kumtuanga inpâkin om ri se! Amen.

⁶Pathian thu chu mâkana a ni ta tihna chu ni viat mah; Israel irchi murdi Israel mi ni zit mahai.

⁷Abrahama irchi murdi khom a nâihai ni zit ual mahai. “Isaka hin nir chihai sui ni a ti,” Pathianin a iti ual kha.

⁸Khanchu taksa tianga a nâihai chu Pathian nâihai ni ual hliak mahai, Pathian thu’nkung sika a nâihai chu Abrahama irchi dik taka bê an ni.

⁹“Atûn zoro anga hin zuang a ta, Sari’n chu nâipasal nei a ti,” tia inkung a ni kha.

¹⁰Kha vai kha ni maka, Rebeki khan nâipasal inkhat, ei irchibul Isaka ata inphîr a vonga,

¹¹nâite suak mân a sia mo a sa mo an ti thei mân khan Pathianin a nuamlam angin inkhat kha a inthang a nih ti an lang:

¹²sintho sika ni loiin, a koitu nuamlamin Rebeki kuang, “A ulian ualin a nâipang ual sintho a ti,” Pathianin a ti kha.

¹³Pathian Thu bu’n, “Jakoba lung ki thunga, Esaua chu ki khôkmâk,” ti irziak a ni sa.

¹⁴Khaang kha a niin chu imo ei insîr hrang tâk? Pathiana felloina a iom ma ni? Om mak e!

¹⁵Ama khan, “Lung ki inkham murdi chu lung ki inkham ni a ta, za ki irngaiina murdi chunga za irngai ki ti,” tia Mosia kuanga a insîr kha.

¹⁶Khasikin, mihriam nuam lama mâni sinthoa ni loiin, Pathian lungkhamnaa a irnghat ual a ni.

¹⁷Pathian Lekha Thu’n Faroa kuang, “Hi mi sika ringot hin nang kin dingtir nôk a ni, nangmaa ki sinthotheina nang kin entir theina hrang le rammual pumpuia ki’rhming an thang theina hrangin,” a tia.

¹⁸Khanchu Pathian khan a inuam murdi lung an kham ngaia, a inuam murdi khom an tukulliantir ngai a ni.

¹⁹Khaang khan a ni’n teh ithoa mo Pathianin mi a la idem hrang? A inuamlam kha tu mo khâl theia? nin iti a ni thei.

²⁰Khannisian, o mihriam, Pathian sêltu kha tu mo ni ini? Thil siam khan a siamtu kuang? “I hrang mo hiang hin ni ni isiam?” a iti hrang ma ni?

²¹Bêlpil tang khat ata bêl inkhat hlu ual takin le bêl inkhat hlu loi taka hrangin bêl suktu’n chu pilbêl chunga khan ircham a inei mo ni ma?

²²Khaang khan Pathianin a tho ngai, a ninginmurna le a sinthotheina inlang nuam khomsian, a ninginmurna dongtu bêl irhmang zôi zâthai chu a tuang zâm zâma,

²³Khan, a lunginkhamna bêl, a roiinpuina dong hranga a isinsiam, einihai kuanga hin, a roiinpuina irkhêl tak a zuang inlangtir tâk a ni.

²⁴Judahai lai ata vai ni loiin Jentailhai lai ata a ikoi suakhai hi, khaang bêlhai kha ei ni.

²⁵Hosea lekhabua hiang hin a insîr kha, “Ki mi ni ngai loihai kha ‘Ki mihai’ ti ki ta, Lung ki ithung loinu kha ‘Lungthungnu’ ti ki ti.

²⁶‘Ki mihai ni mak chêi,’ an itihna hmuna ngei khan Pathian ihring nâihai ibe’n om an ti,” tia irziak ang khan.

²⁷Isaia khom khan Israel mihai thu khêkpuiin, “Israel mihai chu tuikhanglian chiai dôrin tam khomhai sianlân, a ihrem ban tômte vai saninhring ni an ti.

²⁸Rengpa khan irnêng chunga a roirêlna hrang kha a hlen lat hrang a ni,” a ti kha.

²⁹Isaia dênin, “Rengpa Itinrêngthothei khan irchi ni lei hôi pe no sian chu, Sodom angin ni ta a ta, Gomora ang dênin ni ta ei ti,” tia a lei insîr ang khan.

³⁰Imo ei insîr hrang tâk? Jentail thiam chang tum ual loihai chu thiam inchangtir an hong ni ta, iamna sika thiam changna kha.

³¹Dân zôma thiamchang tum Israelhai khan kêng dân angin chu thiam chang zoi ta mahai.

³²Itho sikin mo? Iamna’n zong loiin sinthoa hmu an tum sika a ni. Tûkna lunga khan an itûk tâk a ni.

³³Pathian Thu Bu khan, “Irngai ta, Zion-a khan tûkna lung le khâlna lungpui ki siaa, Tukhom ama iam murdi’n chu mualinphoi no ni,” ti irziak ang khan.