Read Hrangkhol 1 KORINTH 1 Bible Online

1 KORINTH 1 - Hrangkhol bible

1 KORINTH 1

¹Paula, Krista Jisua tirtôn ni hranga Pathian nuamlam anga koi le ei urêngpa Sosthena khan,

²Korinth khuaa Pathian Koiindang om, mi irthiang ni hranga koi, Krista Jisuaa irthiangtir le hmun tina ei Rengpa Jisua Krista, (anni le eini Rengpa) irhming irlam murdihai chubai kin mûkhai.

³Pathian ei Pa le Rengpa Jisua Krista kuang ata lungkhamna le irngeina nin kuang om ri se.

⁴Pathianin Krista Jisuaa lungkhamna nangni a ipêk ang hin nin chungchânga ki Pathian kuang itiklai khomin lômthu kin sîr ngai a ni.

⁵Amaa khan lam tinrêngin irchongtir ni nia, thua le inhriatna tinrênga nin irsôn maia,

⁶Krista thu kha nangnia indet ngitin a oma;

⁷ei Rengpa Jisua Krista inlârna nin inghâk angin satvurna tinrêng hmu loiin om mak chêi.

⁸Ei Rengpa Jisua Krista Nikhuaa khan khom sêlna boia nin omna hrangin ama khan a mong dênin nangni indet a ti.

⁹Pathian, a Nâipa Jisua Krista, ei Rengpa leh irpôlna nei hranga nangni koitu kha iiam a iom a ni:

¹⁰Urênghaio, ei Rengpa Jisua Krista irhmingin nangni ki ngên, nin laia irsenna om loiin thukhatin om unglân, lungrîl hmunkhat le ngaidân hmunkhat le tumna hmunkhata, fel taka irzom ngotin om roi.

¹¹Ki urênghaio, nin laia irngeiloina a om tih Kloii in sûng mihaiin an ni hril.

¹²Hi hi a ni ki iti chu: Mi tinin, “Kei Paula pôl ki ni, kei Apolova pôl ki ni, kei Kifa pôl ki ni, kei Krista pôl ki ni,” nin irti chita.

¹³Krista chu senin a iom ma ni? Nin ta hrangin Krosa hembe kha Paula ma ni? A ninole Paula irhmingin baptisma nin ichang ma ni?

¹⁴Krispa le Gaia no chu tûte nin laia ki baptis no sikin Pathian kuang lômthu ki ihril a ni.

¹⁵Khaang khan, tûte’n Paula irhmingin baptisma ki chang ti thei no chin ni.

¹⁶(Stefana le a in sûng mihai kha chu ki baptis sa; mi dang ki baptis sa mo chu inhre ma ung).

¹⁷Krista’n baptis hrangin ni tîr maka, Thurchi Sa insîra, kha Thurchi Sa kha mihriam vârna hmang loia insîr hrangin a ni tîr ual a ni; Krosa Krista thina kha chanlamboi a chang loina hrangin.

¹⁸Kros thu chu a’rhmang thiaihai ta hrangin chu invêtna a nia, eini saninhring thiaihai ta hrangin chu Pathian sinthotheina a ni.

¹⁹Pathian Thu Bu’n, “Mi vâr vârna chu inboi ki ta, Mi thiam thiamna hnôl sa ki ti,” ti irziak a ni.

²⁰Mi vâr kha khôn mo a iom? Mi thiam kha khôn mo a iom? Hi rammuala irsêl thiam kha khôn mo a iom? Pathianin rammual vârna hi invêtna a nih ti an lang ta.

²¹Pathian vâr dân chu hi hi a ni, Rammualin vârna hmanga Pathian an inhriat theiloi hnungin, kin thuhril invêt hmanga iamtuhai saninhring hi: Kha kha Pathian nuamlam tak a ni.

²²Judahaiin chu irsinsiana thilirkhêl an inphûta, Grikhai lakin kha vârna ringot kha an zonga;

²³Keini’n chu Krista hembe thu kin ihril a ni, kha kha Judahai ta hrangin chu khâltu a nia, Jentailhai ta hrangin chu thil invêtom a ni.

²⁴Juda khom ni sian, Grik khom ni sian, koihai ta hrangin chu Krista kha Pathian vârna le sinthotheina a ni.

²⁵Pathian invêtna chu mihriam vârna nêkin a vâr uala. A hrât loina khom mihriam hrâtna nêkin a hrât ual a ni.

²⁶Urênghaio, nangni a ikoi lam hi irngaitua u ta, taksa tianga mi vâr tam takhai, mi hrât tam takhai, mi sa tam takhai ikoi an ni loizia hi.

²⁷Pathianin chu rammual mihai irngaia thil invêthai kha mi vârhai mualinphoina hrangin an thanga, rammuala thil hrât loihai kha thil hrâthai mualinphoina hrangin an thang saa.

²⁸Rammual thil môl le hmusitomhai, thil om loihai ten khom, Pathianin an thanga; thil om saihai pai thâkna hrangin Pathianin ite ni loia an irngai kha an thang tâk a ni.

²⁹Khasikin Pathian makunga khan tûte irsor thei om mahai.

³⁰Nangni chu, Krista Jisuaa khan nin om tâka; ama chu Pathian kuang ata, eini ta hrangin chu vârna hai, thiam inchangtirna hai, irthiangna hai le irtanna hai a lei ni tâka.

³¹Khanchu an irziak angin, “Song hrang nuamhaiin Rengpa kha song ri sehai”.