Read Hrangkhol 1 KORINTH 10 Bible Online

1 KORINTH 10 - Hrangkhol bible

1 KORINTH 10

¹Urênghaio, ei irchibulhai Mosia zuihai chunga thil tung kha nin inhriat mai hrangin ki nuam. An rêngin sûm thupna hnuaia an om chita, hoi riamin Tuipui sen râl an kâi.

²Sûma le tuipuia khan Mosia zuihai ni theina hrangin an rêngin baptis-in an iom a ni.

³An rêngin hmunkhatin irtha bu an fâka,

⁴hmunkhatin irtha tui an ina, anni zuitu irtha lungpuia irthokin irtha tui an i-in a ni; kha lungpui kha Krista a ni.

⁵Khan khomin an laia mi tam ual chunga chu Pathian milung hoi maka, ramchâra khan an ruak a irthek chit a ni.

⁶Khahai kha eini ta hranga enirkhîna a ni, thil sa loi an irzuk angin ei irzuk loina hrang le,

⁷an laia mi senkhat millim an ibiak angin ei biak loina hrangin. Pathian Thubu’n, “Mipuihai hruaithe fa hrangin an toia, khannisian, zu in le irdita hoihôkna an irlet nôk,” a iti angin.

⁸An laia mi senkhat irdit saloi an uara sûn khat sûnga mi sînghni le sâng thum an ithi anga khan, eini chu irditna sa loi uar no ih.

⁹An laia mi senkhat Rengpa an ifia ang khan fia no roi, mirûlin an chuk thathai ok kha. Rengpa chu fia no roi.

¹⁰An laia senkhat Pathian ata an ichiar ang khan chiar no roi, inboipaitu’n an boipaihai kha.

¹¹Kha an thil tonghai kha mi dang halirchu a nia; eini zoro hnungkhôna omhai nir chutirtu hrangin irziak a ni sa.

¹²Khanchu, tukhom ngîr indeta irhriat chu, a tûk loina hrangin irdîn ri se.

¹³Fiana nin itong hen hi mi tong ban om ual mah. Pathian chu iam a oma, ni tuang thei bana irkhêl fiana nin chunga intungtir no ni, nin doi zoi theina hrangin fiana hong tung laiin lôitheina lampui nangni siam pe a ti.

¹⁴Khasikin inditom takhaio, millim biak hi irheisan roi.

¹⁵Mi vârhai kuanga insîr ang khan ki insîr a ni; ki thu’nsîr hi ngaitua u ta.

¹⁶Satvur khilât chunga lômthu ei insîr hi Krista thisen irzompuina a ini loi ma ni? Bai ei ikhoi ngai khom hi Krista takpum irzompuina a ini loi ma ni?

¹⁷Eini mi tamtakhai hi, bai tiam inkhata irthokin ei dong seng sikin.

¹⁸Israel mihai kha en u ta, irbôlna sa fâkhai khan maichâma Pathian sin kha an irzompui ni ma mo?

¹⁹Millim le a kuanga fâk inhlan kha thil kâmom a ni ki itihna ma ni?

²⁰Ni mak e! ki iti chu sonong maichâma irbôlna kha Pathian kuanga ni loiin ramilhlihai kuang an inhlan a ni ual. Ramilhlihai leh irzom hrangin chu nangni ki inuam viat loi a ni.

²¹Rengpa khilât le ramilhli khilât irkop thei no chin ni; Rengpa maichâm le ramilhli maichâm fâk irkop thei no chin ni.

²²Rengpa chu ning ei inmurtir hrang ma ni? Ama nêkin ei ihrât ma ni?

²³Thil tinrêng tho a’rthianga, khannisian, thil tinrêng chu sa zit mah. Thil tinrêng tho a’rthianga, khannisian, thil tinrêng tho’n mi siam insa ual mah.

²⁴Tukhomin mâni satna hrang vai zong loiin mi dang satna hrang zong ual ri se.

²⁵Hmê dukana an izuar ka chu ite irdon viat loiin ni sia le sa inhriatna sikin fa zel roi.

²⁶Pathian Thubu’n, “Irnêng le a sûnga thil tinrênghai hi Rengpa ta a ni,” a ti sikin.

²⁷Sonong inkhatin nangni fialin fe ta unglân, nangni an ido ka chu irdon viat loiin nin sia le sa inhriatna sikin fa zel roi.

²⁸Khannisian, t’un mani, “Hi fâk hi millim kuanga inhlan a ni,” tiin nangni a hrilin chu, nangni hriltu sik le ama sia le sa inhriatna sikin fa no roi;

²⁹nangni sia le sa inhriatna ki iti ni mah, mi dang sia le sa inhriatna ki ti ual a ni. I hranga mi dang sia le sa inhriatna khan ki zalênna a isêl ma ni?

³⁰Ki fâk chunga Pathian kuang lômthu ki insîr tâk pial teh i hrang mo mi’n an ni la isêl ngai hi?

³¹Khaang khan, nin isin murdi, nin ifâk le nin i-in murdi Pathian roiinpuina hrangin tho roi.

³²Judahai, Grikhai le Pathian Koiindanghai ta hranga buaina nin ni no hrang lam takin om roi.

³³Ki itho ang taka hin tho roi. Kei chu mâni ta hranga satna zong loiin saninhring an ni theina hranga mi murdi satna hrang zong ualin ki sinthôna tina mi murdi inlômtir ki itum ngai a ni.