Read Hrangkhol 1 KORINTH 11 Bible Online

1 KORINTH 11 - Hrangkhol bible

1 KORINTH 11

¹Ki om dân irchutuhai ni roi, Krista om dân irchutu ki ini ang hin.

²Nin inhriat mai sikin le thumâk nangni ki insîr pe ang taka nin vong ngit sikin nangni kin pâk.

³Khannisian, pasal lu chu Krista a ni, nupang lu chu pasal a ni; Krista lu chu Pathian a nih ti hi nin inhriat hrangin ki nuam.

⁴Pasal, lukhum puma chongchai mani, thuhril mani chu an lu an imualinphoitir a ni.

⁵Aniachu, nupang lukhum khum loia chongchai mani, thuhril mani, khom an lu an imualinphoitir a ni, khaang kha chu ep inkol le hmunkhat a ni.

⁶Nupangin lukhum khum nuam loi chu ep chian ri se. Aniachu, nupang ta hrangin sam ep le voi hi inzak a omin chu lu khum ri se.

⁷Pasal chu Pathian irangpui le roiinpuina inlangtirpu a ni sikin lukhum an ikhum hrang ni mah; nupang chu pasal roiinpuina inlangtirtu a ni.

⁸Pasal hi nupang ata siam ni maka, nupang chu pasal ata siam a ni.

⁹Pasal hi nupang ta hranga siam ni maka, nupang chu pasal ta hranga siam a ni.

¹⁰Khasikin vân vântîrtônhai sika khan nupangin pasal irchamneina hnuaia om a nih ti irdangna hrangin lu an ikhum hrang a ni.

¹¹Khannisianlân, Rengpaa khan nupang hi pasal boiin chu om thei mahaia, pasal khom nupang boiin chu om thei mahai.

¹²Nupang hi pasal ata siam a ni ang dênin pasal hi nupang ata suak a nia; khannisianlân, itinrêng hi Pathian ata suak zit a ni.

¹³Irngaitua u ta, nupang lukhum khum loia Pathian kuang chongchai chu ar hoi mo?

¹⁴Pasal sam insei chu ata hranga thil inzakom a nih ti nin lungrîl irzirpui khomin a inhriat mo ni ma?

¹⁵Nupangin sam insei chu ama roiinpuina a nia, a sam kha ama irkhûna hranga pêk a ni.

¹⁶I khom ni sianlân, hi hi nin hnôl a ni khomin, keini’n mani, Pathian Koiindanghaiin mani, khaang tiang khan dân nei mak meh.

¹⁷Hi nangni ki hrilnahaia hin nangni inpâk ma ung, nin satna hrang ni loia nin siat ualna hrangin nin inkhôm ngai sikin.

¹⁸A masa takin nin laia irsenna a om tih mi’n an ni hrila; dik le khom ki iam a ni.

¹⁹(Mi dikhai kha an inlang theina hrangin nin laia irsenna a om hrang pial a ni.)

²⁰Nin irbûm zoroa nin ifâk ngai kha Rengpa zânbu ni mah.

²¹Nin fâkin nin bu chit nin fâka, senkhat nin inrui laiin senkhat nin phîng a châm ngai sikin.

²²Fâk zongna hrang in nin inei loi ma ni? A ninole, Pathian koiindang enkhûmin intak mihai kha mualphoi nin isak ma ni? Hi chungchânga hin imo ti ri se, ti nin ni itûng? Nangni ki inpâk hrang ma ni? Nangni inpâk zât ni ma ung.

²³Thu nangni ki ihril non nôk hi Rengpa kuang ata kêng: Khaanga ichela a om ni zâna khan Rengpa Jisua’n bai a lâka, lômthu an sîr zoiin a khoia,

²⁴“Hi hi ki takpum a ni, nin ta hranga a ni, nin ni inhriatmaina hrangin tho hen roi,” a iti kha.

²⁵Khaang dênin, an fâk zoia, khilât khom a lâka, “Hi khilât hi ki thisena Thuthung Thar chu a ni, nin in rikipin nin ni inhriatmaina hrangin tho hen roi,” a iti kha.

²⁶Kha bai kha nin fâka, khilât khom nin in rikipin, a zuang nôk mâka chu, Rengpa thina kha nin inpuang ngai a ni.

²⁷Khasikin, tukhom chukloi puma Rengpa bai hi fâka, a khilât hi in ka kaiin Rengpa takpum le thisena thiamno chang an ti.

²⁸Khanchu, mi tin mâni irfia seng sianlân, khaangin bai kha fâkin khilât kha in ri se.

²⁹Bai fâktu le khilâta uain intu khan Rengpa takpum a nih ti an hriat no’n chu mâni chunga roirêlna tung hrangin a ifâkin a i-in a ni.

³⁰Hi pa sika hin nin laia tamtakin hrât loiin nin irzala mi tamtak chu nin inmusu a ni.

³¹Mâni ir-en masa ngai inlân chu roirêl pe’n ei iom loi hrang a ni.

³²Roirêl pea ei om khomin rammual mihai leh thiamloi ei chang loina hrangin Rengpa’n a ni sep ngai a ni.

³³Khanchu urênghaio, Rengpa zânbu ot hranga nin inkhômin irnghâk ngai roi.

³⁴Nin inkhômin Pathian roirêlna hnuaia nin om loina hrangin tukhom a phîng a châmin chu a ina ne ri se. Thil dang chu ki hong tika hong infel ki ti.