Read Hrangkhol 1 KORINTH 12 Bible Online

1 KORINTH 12 - Hrangkhol bible

1 KORINTH 12

¹Urênghaio, Irtha tianga thilpêk thu kha nin inhriat loi nuam ma ung.

²Jentail mi nin ni lai khan millim chongtheiloi tiang nangni an hruai irhmang ngai ti nin inhriat.

³Khasikin hi hi nangni kin hriattir: Pathian Irtha’n chu tukhomin, “Jisua kha vânnisalin om ri se,” ti thei mahaia, Irtha Irthianga no’n chu, Jisua kha Rengpa; ti thei sa mahai.

⁴Khan, thilpêk chi dang dang a oma, Irtha inkhata om a ni.

⁵Sinthôna chi dang dang a oma, Rengpa inkhat a ni;

⁶sinthotheina khom chi dang dang a oma, Pathian inkhat kuanga om a ni, mi tin kuang sinthotheina pe ngaitu kha.

⁷Inlâp seng hrangin mi tin kuang Irtha inhriattirna kha a zuang tung senga.

⁸Irtha zâra mi senkhat kuang thuvâr insîr theina pêk a nia, mi dang kuang chu Irtha ngêta khan thu inhriat theina pêk a nia;

⁹mi dang kuang chu Irthaa dên khan iamna pêk a nia, kha Irtha ngêt khan mi dang kuang indam theina pêk a nia,

¹⁰mi dang kuang thuhril theina pêk a nia, mi dang kuang Irtha dik le dikloi inhriat theina pêk a nia, mi dang kuang chong inhriat loi chi dang dang pêk a ni, mi dang kuang chong inhriatloi hrilfiah theina pêk a ni.

¹¹Hihai murdi hi Irtha inkhata sintho zit a nia, a inuam ang takin mi tin kuang chi dang dang a ipêk a ni.

¹²Takpum hi inkhat a nia, ôn tamtak a neia; takpum ônhai murdi kha tam ok khom sian takpum inkhat a ini angin; Krista khom khaang kha a ni.

¹³Ei rêngin Juda mo ei ni, Grik mo ei ni, suak mo ei ni ni loi mo, taksa pumkhata om hrangin Irtha inkhata baptis ei nia, Irtha inkhat vai a ni inneitir chit a ni.

¹⁴Takpum hi ôn khat vai ni loiin, ôn tamtak ei ni.

¹⁵Ke hin “Kut ki ni no sikin takpuma kop ni ma ung,” ti ta sianlân, khasika khan takpuma kop loi ni ual mah.

¹⁶Mikuar hin “Mit ki ni no sikin takpuma kop ma ung,” ti ta sianlân, khasika khan takpuma kop loi ni ual mah.

¹⁷Takpumpui hi mit ni zit ta sian itin mo irhâi ei inhriat hrang? Mikuar ni zit ta sianlân, itin mo mirim ei inhriat hrang?

¹⁸Pathianin ôn dang dang hi takpuma hin a nang a itihna hmun tina a isia a ni.

¹⁹An rêngin ôn khat vai ni ta sianlân, takpuma a iom thei hrang ma ni?

²⁰Ôn dang dang tam ok khom sian, takpum chu inkhat a ni.

²¹Khanchu mit hin kut kuang, “Nang innang ma ung,” ti thei mah; lu khomin ke kuang, “Nang innang ma ung,” ti thei ual mah.

²²Takpum ôn hrât loi ual anga inlanghai hi a poimo ual.

²³Ei takpum ôn hmusitom anga ei ibehai hi, kha ngêt kha ei ngaipoimoa, a sate’n ei irvôtir ngaia, a inlang saloihai kha ei irvô insatir ngai a ni.

²⁴Ei takpum ôn sa ualhai chu irvôtir mo a nanga. Pathianin taksa hi a siam irfûka, insitomhai kha a chôiindômtira.

²⁵Khasikin, takpuma hin irsenna om maka, a ôn dang danghai an irngaitua irhlôm theina hrangin a isia irfûktirhai a ni.

²⁶Ôn inkhatin a tuangin chu ôn dang dangin an tuang zit a ni, ôn inkhat chôiindôm a ni’n chu ôn dang murdi’n an lôm sa zit ngai a ni.

²⁷Nangnihai hi Krista takpum chu nin ni, a ônhai nin ni seng sa a ni.

²⁸Pathianin a Koiindanga hi mihai hi a siaa: inkhatnaa tirtônhai, an hninaa deipuhai, an thumnaa Irchûtirtuhai, thilirkhêl thohai, indam theina thilpêk hai, mi changpui nuamhai, roirêl thiamhai, chong inhriat loia thu’nsîr theina thilpêk donghai kha an ni.

²⁹An rêngin tirtôn an ni zit mo? An rêngin deipu mo an ni zita? An rêngin irchutirtu mo an nia? An rêngin thilirkhêl thothei mo an nia?

³⁰Indam theina thilpêk dong zit mahaia, chong inhriat loiin chong zit mahai, a hrilfia theina dong zit ual mahai.

³¹Irtha thilpêk poimo ual dong a sân irzuk roi. Lam satak nangni inentir ki ti.