Read Hrangkhol 1 KORINTH 14 Bible Online

1 KORINTH 14 - Hrangkhol bible

1 KORINTH 14

¹Khan, nin irzûl hrang tak chu lungthungna hi a ni. Irtha thilpêkhai irzuk roi, a bîkin, Pathian thu insîr theina thilpêk kha irzuk roi.

²Chong inhriatloi thu’nsîrtu khan mihriam laia a insîr ni maka, Pathian kuanga a insîr a ni, tûte’n an inhriat loi sikin. Ama khan Irtha sinthotheina’n thutak irthup a insîr a ni.

³Khannisian, Pathian thu’nsîrtu’n chu mihriam laia a insîr a nia, siaminsatna thuhai, inthorna thuhai le irtharngamna thuhai a pêk ngai.

⁴Chong inhriatloi thu’nsîrtu khan chu ama vai a’rsiaminsata, khan, Pathian thunsîrtu khan chu koiindang pumpui a siaminsat ngai.

⁵Nin rêngin chong inhriatloia thu’nsîr hrangin nangni ki nuam; khannisian, Pathian thu’nsîr theina thilpêk nei hrangin nangni ki nuam ual a ni. Chong inhriatloi chu Koiindang pumpuiin siaminsatna an hmûna hranga hrilfiatu a om nôk no ngânin chu, Pathian thu’nsîrtu kha chong inhriatloia thu’nsîrtu nêkin chu a ihlu ok a ni.

⁶Khasikin urênghai, nin kuang hong ta inlân, chong inhriatloiin thu insîr inlân, nin ta hrangin imo a’rfêna ki iom hrang? Pathiana irthoka thuphuang thu mani, inhriatna thu mani, thu sa insîr hrang mani, irchûna thu mani ki hong chôi no zelin chu nin ta hrangin ar fêna ki iom loi hrang a ni.

⁷Hringna neiloi, irhâihoi hmangruahai, theihle mani, perkhuang mani khom hi omze nei loia an tumin chu i hla mo an isak tu mo inhre thei hrang?

⁸Bekul khom mumal neia an tum no’n teh tu mo râl doi hranga irsiam hrang?

⁹Khaang dênin chong inhriatloia nin insîr kha inhre mai thei a ni no’n teh tu mo inhre thiam hrang? Chong pa pai nin ini hrang kêng.

¹⁰Rammuala hin chong chi dang dang a sân a itam khom a ni thei, omze neiloi inkhat lua om mah.

¹¹A thu’nsîr omzia kin hriat no’n chu ama kha ki ta hrangin kha chong hmangpu kha ram dang mi ang ni a ta, kei khom a ta hrangin ram dang mi ni sa ki ti.

¹²Khanchu irtha thilpêk dong irzuk mai unglân, Koiindang indingna hranga siam insatna hrang kha nin nei theina hrangin zong roi.

¹³Khasikin chong inhriatloi neihai chu a hrilfiah theina hrangin chongchai ri se.

¹⁴Chong inhriatloia ki chongchaiin chu ki’rtha kha a chongchai ngeia, ki ngaituana chu hmang ma ung.

¹⁵Itin mo a ini hrang tâk? Irtha’n chongchai ki ta, ngaituana hmangin chongchai ki ta. Inpâkna hla khom irtha’n sak ki ta, ngaituana hmangin sak sa ki ti.

¹⁶Pathian kuanga irtha vaiin lômthu nin sîrin te, inkhôma hong chang mi narânhai khan nin chong kha inhriat no nihaia, nin lômthu insîra khan itin mo “Amen” an iti thei hrang?

¹⁷Ni lômthu insîr chongchaina kha a sân a sa khom a ni thei, khannisian mi dang inlâptir mah.

¹⁸Nangni nêkin chong inhriatloi ki hmang intam ual sikin Pathian chunga a sân ki ilôm a ni.

¹⁹Khannisian koiindang inkhômnaa khan mi dang irchutirna hrangin chong inhriatloia thu 10,000 (sîngkhat) insîr nêkin ngaituana hmanga thu bâi ringa lik insîr ki nuam ual.

²⁰Urênghaio, nâipang angin thil ngaitua no roi; sualna lama chu nâitesen ang ni unglân, ngaituanaa chu puihling takin om roi.

²¹“Chong inhriatloi hmang mihai hmûrin hi mihai kuang hin thu insîr ki ta, Khan khomin mihaiin nir ngaitua pe no nihai,” Rengpa’n a ti, tiin Dân bua a irziak a ni.

²²Khanchu, chong inhriatloi hi iamloi mihai ta hrangin irsinsiana a nia, iamtuhai ta hrangin ni mah; khaang dênin Pathian thuhril hi iamtuhai ta hrangin irsinsiana a nia, iamloihai ta hrangin chu ni mah.

²³Koiindang pumpui inkhômnaa nin rêngin chong inhriatloiin thu insîr ta unglân, lan hre loihai mani iamloihai mani hong lût tahai sianlân, nin invêt mani nangni ti no nihai mo?

²⁴Nin rêngin thu lei insîr ta unglân, iamloi mani, inhreloi mani hong lûthai kha nin thu khan sun a ta, an sualzia inhriattir a ti.

²⁵An lungrîla thu’rthuphai kha inlangtir ni a ta, Pathian chubai mûkin inbok an ta, “Nin laia Pathian a om ngai a ni,” tiin irpuang ual an ti.

²⁶Urênghaio, inkhômnaa hla nei mani, thu inpuang hrang nei mani, chong inhriatloia chong nang mani, hrilfiana neihai nin omin chu, itina tho hrang mani? Koiindang siaminsat lam tianga tho hrang a ni.

²⁷Mi tukhomin chong inhriatloia thu nin insîrin, mi inhni inthum bana thu insîr no ri sehai, a dônte’n insîr sianlân, inkhatin hrilfia roi,

²⁸hrilfiatu an om no’n chu Koiindang inkhômnaa khan dâihrek sianlân, a bîkin mâni le Pathian kuang insîr ri se.

²⁹Thuhriltuhai khom mi inhni mani inthum mani vaiin hrilhai sianlân, mi dangin a sate’n lei irngai ri sehai.

³⁰A’rngaituhai laia thu inpuang hrang a omin chu an sîr masatu kha dâihrek ri se.

³¹A dônte’n thuhril ngai unglân, khanchu mi tinin irchu hrang nei thei nin ti, mi tin irtharngamin om thei nin ti.

³²Thuhriltuhai thuhril theina irtha thilpêk khan, an thu hnuaia a iom hrang a ni;

³³Pathian chu buaina Pathian ni maka, irngeina Pathian kêng a ini. Koiindang tina mi irthianghai tholam angin.

³⁴Koiindang inkhômnaa nupanghai chu dâihrek ri sehai, thu an insîr phal ni mah. Dân bu’n a insîr angin thu an izôm ual hrang a ni.

³⁵Thil inhriat nuam an neiin chu in sûng tiang an pasalhai irdon ri sehai. Nupang ta hrangin chu Pathian Koiindang inkhômnaa thu’nsîr hi inzak a om.

³⁶Pathian thu hi nangni ata suak ma ni? khano’nte, nin kuang vai mo a zuang itung?

³⁷Tukhomin deipu mani, irtha mi mani, niin a’rbê’n chu, nin kuanga ki lekha hi Rengpa thupêk a nih ti lei inhre ri se.

³⁸Khannisian, tukhomin a ngaisak no’n chu ama khom ngaisak no roi.

³⁹Khanchu, ki urênghaio, thuhril hi a sân irzuk unglân, chong inhriatloia thu’nsîr khom khap no roi.

⁴⁰Aniachu, itinrêng fel tak le mumal nei taka tho hrang a ni.