Read Hrangkhol 1 KORINTH 15 Bible Online

1 KORINTH 15 - Hrangkhol bible

1 KORINTH 15

¹Urênghaio, nin kuanga Thurchi Sa nangni ki lei inhril kha atûna hin nangni inhriattir nôk ki nuam; kha Thurchi Sa kha nin lei poma, kha chunga khan nin iamna a inding indet hrang a ni.

²Thurchi Sa nangni ki ihril kha nin pom maiin chu saninhring ni nin ta, nin pom mai no’n chu nin iamna kha a korong ni a ti.

³Hi hi ki thu dong poimo tak nangni ki ihril nôk chu a ni; Krista chu Pathian Lekha thu ang zêlin ei sualhai sikin a thia,

⁴phûmin a oma, Pathian Lekha thu angin sûn thum nia kaithoi a ni;

⁵Petera kuang an lâra, sômhleihnihai kuang khom an lâra.

⁶Kha hnunga, voikhat urêng irzaringa nêka tamhai kuang an lâr nôka, kha laia a tam ual chu an la dama, senkhat chu an thi ta;

⁷Jakoba kuang an lâr nôka, kha zoi hnunga chu tirtôn murdihai kuang an lâr nôka.

⁸A mong taka chu, kei, a zoro loia suak kuanga khom an lâr nôk.

⁹Kei chu, tirtôn laia a chîn tak ki ni, Pathian Koiindang deng kin theitir sikin tirtôna ibe zât khom ni ta ma ung.

¹⁰Khannisianlân, Pathian lungkhamna sikin ki ini nih ki ni ta. A lungkhamna ni pêk hi a korong ni mak e, tirtôn danghai nêkin ki sin intam kêng, khannisianlân, keima isin ni mah, ki kuanga om Pathian lungkhamna isin a ni ual.

¹¹Khanchu, kei khomin, anni khomin khaang khan kin hril ngaia, nangni khomin kha ngei kha nin iam tâk.

¹²Krista chu mithi lai ata kaithoi a ni thu kin hrila, nin iam hnungin te, nin laia senkhatin ithoa mo mithi thoinôkna om mah nin iti thei?

¹³Mithi thoinôkna a om no’n chu Krista khom kha kaithoi ni no ni.

¹⁴Krista kha kaithoi a ni no’n chu kin thuhril hi milak ni a ti, milak iam nina nin ti.

¹⁵Pathianin Krista chu mithi lai ata a thoi ti kin hrila, mithi thoinôkna a om no’n chu Krista khom kaithoi ni no ni, Pathian chungchâng thua milak kin insîr ni a ti.

¹⁶Mithihai kaithoi an ni no’n chu Krista khom kha kaithoi ni bîk no ni.

¹⁷Krista chu kaithoi a ni no’n chu nin iamna hi ite ni maka, nin sualnaa nin la iom mai ni a ti.

¹⁸Khaang khan a ni’n chu, iamtu Kristaa intakhai khom kha an irhmang ta ni a ti.

¹⁹Kristaa sabei kin nei hi atûn hring laia hrang vai ni no sian, mi murdi nêka lungkhamom tak ni ei ti.

²⁰Khannisian, Krista chu mithi lai ata kaithoi a ni ngêta, mithihai thoinôkna mahruaitu a ni.

²¹Mihriam sikin thina a lei oma, mihriam sika ngêt thoinôkna khom a lei iom a ni.

²²Mi murdi Adama leh an irzomna sika an ithi ang khan mi murdi Krista leh an irzomna sikin kaithoiin om an ti.

²³Aniachu, mâni zoro senga kaithoi ni an ti; a masa taka Krista a nia, Krista tahai chu a zuang nôk tika kaithoiin om an ti.

²⁴Kha hnung chu zoro mong hong tung ta a ti; Krista’n roirêlnahai le irchamneinahai le sinthotheinahai kha inboi zit a ta, Ram kha Pa Pathian kuta bâng ta a ti.

²⁵Pathianin a râlhai an hnê zita, a ke bula a sia mâka chu Krista a inlal mai hrang a ni.

²⁶Râl hnungkhôn tak inhne hrang chu thina hi a ni.

²⁷Pathian Thubu’n, “Pathianin itinrêng a ke hnuaia a sia zit,” a tia. Khasikin “Itinrêng” ti chong hin Pathian, itinrêng Krista ke hnuaia setu chu huap mah ti a inlang a ni.

²⁸Khan, itinrêng Krista’n lalna hnuaia a sia tika chu Nâipa ngei khom Pathian itinrêng a hnuaia setu hnuaia om a ta, Pathian chu itinrênga tinrêng ni ta a ti.

²⁹Khaang khan a ni no’n te, mithi irthûla baptisma changhai kha itin mo an itho hrang? Mithihai chu kaithoiin an om no hrangin te, i hranga anni irthûla baptisma an ichang ngai mo?

³⁰Eini khom itho sikin mo dârkâr tina ichia ei iom ngai ma ni?

³¹Urênghai, ei Rengpa Jisua Kristaa nangni ki songna kha sâmin, “A nitin thina ki tong ngai,” ki ti a ni.

³²Mihriam tho lam ringota Efesi-a sahrânghai irsualpui ki ni’n teh, ki ta hrangin, imo ar fêna om hranga? Mithi kaithoiin an om no hrangin chu senkhathai iti ngai ang khan “Tho fa ei ta, lei in rei, nangtûka ei thi zôi hrang sikin,” an ti ngai.

³³Hruai irhmangin om no roi, “Rual sualin nunchan sa an siat ngai,” ti a ni.

³⁴Fel takin har unglân, sual ta no roi. Nin laia mi senkhat chu Pathian inhriatna zel nin nei no sikin nin inzakna hranga hi hi ki iti a ni.

³⁵Itin mo mithihai kha kaithoi an ini hrang? I ang takpum mo an irput hrang? tiin nin irdon a ni thei.

³⁶Nangma mi’nto! Irnênga chi ni tû khomin a thi bak no’n chu mông ngai mah kha teh.

³⁷Khan, ni chi tu khom kha a takpum la om hrang chu tu mak chea, a’rmal vai ni tû ngaia, bu’rmal chi dang i khôk irmal mani a ni thei.

³⁸Khannisian, Pathianin a nuamlam takin takpum a pêk ngai, chitin an takpum seng kha.

³⁹Taksa murdi hi taksa chi inkhat ni mah; mihriam taksa a danga, sa taksa a danga, va taksa a danga, nga taksa a dang a ni.

⁴⁰Khabana, irvân takpum a oma, irnêng takpum khom a om; irvân takpum roiinpuina a dang a nia, irnêng takpum roiinpuina khom a dang a ni.

⁴¹Misa roiinpuina a danga, tha roiinpuina a danga, ârsihai roiinpuina khom a dang a ni, ârsi le ârsi khom roiinpuinaa chu irang mah.

⁴²Mithi thoinôkna khom hi, khaang khan a ni. Hmon theia phûmin a oma, hmonthei loia kaithoiin om a ti;

⁴³Hmêl setak le hrât loi taka phûmin a oma, enhoi tak le hrât taka kaithoiin om a ti.

⁴⁴Mihriam takpuma phûmin a oma, irtha takpuma kaithoiin om a ti. Mihriam takpum a om sikin irtha takpum khom a iom hrang a ni.

⁴⁵Pathian Thubu’n, “Mihriam masa tak, Adama kha mihriama siam a ni,” a tia. Adama hnungkhôna kha chu hringna pêkpu Irtha a ni.

⁴⁶Irtha kha a zuang iom bak ni maka, taksa kha a zuang om baka, kha hnung irtha a zuang iom a ni.

⁴⁷Adama masa kha chu pila siam, irnênga irthoka hong a nia; Adama inhnina chu irvâna irthoka zuang a ni.

⁴⁸Irnênga siamhai chu irnênga Siamtu ang kha an nia, irvâna mihai chu irvâna Mi ang kha la nih ei ti.

⁴⁹Khan, irnênga siamtu ang kha ei ini angin, irvâna irthoka zuangpu angna khom la nei ei ti.

⁵⁰Urênghaio, “Taksa le thisenin Pathian Ram lua thei no nia, a hmon thei hin hmon theiloi kha lua thei ual no ni,” ti hi a ni.

⁵¹Hi thutak irthup hi irngai roi. Ei rêngin chu thi zit no ih, khannisian, bekul hnungkhôn an ring tena chu voikhat rengin, mitkhapkâr vakin indanglamin om seng ei ti. Bekul an ring tikin chu mithihai khom thi nôk zit loi hrangin kaithoiin om an ta, eini khom indanglamin om seng ta ei ti.

⁵²

⁵³A hmonthei hi hmon theiloia chang a ta; a thi thei khom hi thi theiloia a ichang hrang a ni.

⁵⁴Khasikin hi hmonthei hi hmon theiloia changin a oma, hi thi thei khom hi thi theiloia changin a om tikin chu “Inhnêna’n thina an lem zoi ta!

⁵⁵O thina nin hnêna kha khôn mo a iom tâk? O thina, ni tûr kha khôn mo a iom tâk?” ti thu irziak kha hong tung ta a ti.

⁵⁶Thina tûr chu sual a nia, sual sinthotheina chu Dân thu a ni.

⁵⁷Khannisian, ei Rengpa Jisua Krista zâra inhnêna ni pêktu Pathian kuang lômthu om ri se!

⁵⁸Khasikin urêng lungthunghai, det takin châng viat loiin om roi. Rengpa Sin nin itho rêng rêng chu a korong chang viat mah ti nin inhriat sikin, Rengpa Sin chu sathnem irngai takin sin mai roi.