Read Hrangkhol 1 KORINTH 16 Bible Online

1 KORINTH 16 - Hrangkhol bible

1 KORINTH 16

¹Khan, Judai rama Pathian mihai ta hranga tholôm tho thu kha, Galatia rama Koiindanghai kuang thu ki pêk ang khan nangni khomin lei tho sa roi.

²Pathianni rikipin nin sika nin sum hlo lam ang sengin lei bûm roi, ki hong tika tholôm irfuang a nang loina hrangin.

³Khan, nin thilpêk chôia, Jerusalema fe hranga tukhom a sa nin iti tak lekhahai chôiin ki hong tika tîr ki ti.

⁴Ki ife sâna hrang irhoi a ni len vângin chu keima ni zui an ti.

⁵Makedonia ram ki’rfang a nang sikin, Makedonia ram irfang zoi bak ki ta nin kuang hong ki ti.

⁶Nin kuang chu sôtzan chu om ki ti, phalbi sûng chu a ni thei, khoa khom ki fena taka nin ni intha theina hrangin.

⁷Atûna fe malama nangni hmu chu nuam ma unga, Rengpa’n sa a ti’n chu nin kuang sôtzan cham ki’rtûng a ni.

⁸Efesi khua hin pentikos nî tena chu om ki ti.

⁹Hi khua hin a ni doi tamtak om khomhai sian, sin roiinpuitak le sin kâmnang tak ki sin theina hranga zoro’nchum tak a iom a ni

¹⁰Timothea a hongin chu mâni in ang taka nin kuang a om theina hrangin lei lôm unglân, lunghnâng lei tho roi, keima anga Rengpa sin tho a ni sikin.

¹¹Tûte’n hnuaisia no ri sehai, irtharngam takin ki kuang a hong tung theina hrangin intha ual roi; urênghai leh hmunkhata hong hrangin ki lei itûng kêng.

¹²Ei urêngpa Apolova thu kha chu, urêng danghai leh hmunkhatin nangni hong hro hrangin kin thor maia, khannisian, hi zoroa hong hrangin chu nuam viat mah, zoro’nchum a hmu leh chu hong a ti.

¹³Irtûng chianin om unglân, iamnaa ngîrindet unglân, hâi unglân, hrât takin om roi.

¹⁴Nin sin murdi lungthungna’n sin roi.

¹⁵Stefana le a in mihai thurchi kha nin inhriat, anni kha Akaia rama Kristian chang masa tak an nia, khabana, Pathian mihai sintho hranga irpêk an ni.

¹⁶Khaanga mihai le an isinpuihai le an sin lei tho pe ngaihai irchamneina kha pomin, an thu zôm hrangin nangni ki ngên a ni.

¹⁷Khan, Stefana hai, Fortunata hai, Akaika hai honga hin a sân an nin lôm a ni; anni hin nin omloi khom irdang loiin an ni siama,

¹⁸nin lungrîl nangnia inhartir ang khan kei khom an nin hartira, hiang mihai hi irngaiinhlu roi.

¹⁹Asia ram Koiindanghai hin chubai nangni an mûk. Akuila le Priskili le an ina Koiindang inkhômhai hin Rengpa irhmingin chubai nangni an mûk mur mur a ni.

²⁰Urêng murdihai khom hin chubai nangni an mûk; irtum irthiangin chubai irmûk irhlôm roi.

²¹Hi hi, kei Paula’n, keima kut ngeia irziakin chubai nangni ki imûkna a ni.

²²Tukhom, Rengpa lungthung loi chu vânnisalin om ri se! Maranatha: Ei Rengpa a zuang e!

²³Rengpa Jisua lungkhamna kha nin kuang om ri se.

²⁴Krista Jisuaa lung nangni ki thungna hi nin rênga kuanga om ri se. Amen.