Read Hrangkhol 1 KORINTH 3 Bible Online

1 KORINTH 3 - Hrangkhol bible

1 KORINTH 3

¹Urênghaio, irtha mihai kuanga ki insîr angin nin kuang thu insîr thei ma unga; taksa mi, Krista iamnaa nâitesenhai kuanga insîr angin ki insîr ngai a ni.

²Nin la fâk thei no sikin bu hrum ni loiin irhnutuiin nangni kin fâa; atûn ten khom la fa thei mak chêi.

³Taksa mi nin la ni sikin. Nin laia irhnarsâna le ir-êngna a om kâr ka chu taksa mi, mihriam taka la om nin ni tihna mo ni ma?

⁴Nin laia, “Kei Paula pôl ki ni, kei Apolova pôl ki ni,” tihai nin la om sûng chu a sân nin la taksa mi tihna mo ni ma?

⁵Khano’nte Apolova chu i mani? Paula khom imo a ini? Nin iam theina hranga sinthotu an ini kêng; kha khom kha Rengpa’n a ipêk ang dênin an isin a ni.

⁶Keima’n ki phuna, Apolova’n tuiin an fâa, khannisianlân Pathianin a irsôntir a ni.

⁷A’rsôntirtu Pathian vai no chu a phuntu le tuia infâtu kha ite ni mahai.

⁸A phuntu le tuia infâtu chu sin hmunkhata sin an ni. An sin intam dâna zirin lômman hmu an ti.

⁹Pathian ta hranga sin suam kin ni, nangni hi Pathian loimân nin ni. Pathian in sin nin ni sa.

¹⁰Pathianin thilpêk a ni ipêk hmangin in sintu thiam tak angin keima’n lungphûm ki phûma, mi dangin in an isin a ni. Khannisianlân, mi tinin an sin hrang lam chita irdîn ri sehai.

¹¹Pathianin lungphûm a lei iphûm tâk Jisua Krista bana chu tûte’n lungphûm dang phûm thei no ni.

¹²Kha lungphûm chunga khan senkhatin rângachak mani, sum mani, lung mantam mani hmangin in sin an ta; senkhatin thing mani, hloisûl mani, fapôl mani hmangin sin an ti.

¹³Krista Nikhuaa khan meiin an lâr hrang sikin, mei ngei khan mi tin sintho kha fia ta a ta, a ini tak inlang a ti.

¹⁴Lungphûm chunga sin kha a kâng no’n chu a sintu’n lômman hmu a ti.

¹⁵Tu sintho khom a kângin chu inchân a ti. Khannisian, ama tak chu mei irkân ang dôrin saninhringin om a ti.

¹⁶Pathian in nin nih ti le Pathian irtha nangnia a om tih nin inhriat loi ma ni?

¹⁷Tukhomin Pathian in kha an siatin chu, Pathianin ama kha insiat a ti. Pathian in chu a’rthiang kêng, kha in kha nangnihai nin ni.

¹⁸Tûte a bingin irhuang no ri se. Nin laia tukhomin hi rammual dâna vârin a’rbe’n chu, a vâr ta tak theina hrangin into chang phot bak ri se.

¹⁹Hi rammualin vârna a iti hi Pathian mit hmua chu invêt a ni sikin, Pathian Thu’n, “Pathianin mi vârhai chu an vârillekna khan an inôk ngai,” a iti angin.

²⁰Pathian Thubu dangin, “Rengpa’n chu mi vârhai ngaituana kha a korong a nih ti an hriat,” a iti sa angin.

²¹Khasikin tûte’n mihriamhai song no ri se. Thil tinrêng nin ta a ni.

²²Paula khom, Apolova khom, Petera khom, hi rammual khom, hringna khom, thina khom, thil om saihai le a la hong iom hranghai khom, a rêngin nin ta zit a ni.

²³Nangni khom, Krista ta nin nia, Krista khom Pathian ta a ni.