Read Hrangkhol 1 KORINTH 5 Bible Online

1 KORINTH 5 - Hrangkhol bible

1 KORINTH 5

¹Nin laia irditna saloi a om tih mi’n an hong insîr bak ngaia, khaang dôra irditna saloi kha chu Jentailhai laia lua om ngai mah. Mi inkhatin a puinghâksia a zâlpui ngai ti khom ki lei inhriat.

²Khan khomin nin la irsong thei mai? Irsong nêkin, kha mi kha nin lai ata nin inhnot theina hrangin chardongin nin isip ual hrang a ni.

³Nin laia taksa’n chang no khom inlân, irtha’n chu ki ichang a ni; nin laia om ang khan ei Rengpa Jisua irhmingin khaang taka thil ichiom thotu chunga khan roi ki rêl ta.

⁴Nangni le keima irtha Rengpa Jisua sinthotheinaa irbûmin,

⁵Kha mi kha ar tha Rengpa Nikhuaa khan saninhring a ni theina hrangin, a takpum chu irhmang hrangin Setana kuta nin ipêk hrang a ni.

⁶Nin irpâk hi dik mah, chol tômte’n bai tang kha a pumpuiin a thoizit ngai ti nin inhriat mo ni ma?

⁷Chol koploi bai nin ini ang dênin, bai tang thar zek nin ni theina hrangin chol milui kha zen infâi roi. Ei Ferkân kûtna hrang Krista ngêt kha inhlanin a om tâk sikin.

⁸Khasikin, Ferkân kût ei ti, chol miluia kût tho loiin, nunsiat le sualna chola kût tho loiin, takna le dikna bai, chol kop loiin kût nei ei ti.

⁹Ki lekha thona khan irdit hmanghai pôlloi hrangin nangni ki tia.

¹⁰Rammual mi, irdit hmanghai, huatirham hai, inru hai le millim biakhai pôl viat no roi ki iti ni mah, khaang khan ni sianlân rammual nin imâk rak a inang hrang a ni.

¹¹Ki iti tak chu tukhom urêng irhming irputa irdit song mani, huatirham mani, millim biak mani, irngo song mani, zû’nrui mani, inru mani pôl no roi ti hi a ni. Khaanga mi leh khan chu fâk nêk khom hmunkhatin zong no roi.

¹²Pên tianga mihai chu keima’n ki ngaitua hrang mo a oma?

¹³Nangni’n sûng tianga mi nin ngaitua’n, pên tianga mihai chu Pathianin a ingaitua loi ma ni? Kha mi sual kha nangni laia irthokin inhnot suak roi.