Read Hrangkhol 1 KORINTH 6 Bible Online

1 KORINTH 6 - Hrangkhol bible

1 KORINTH 6

¹Nin laia mi’n iamtu dang ata thubuai a neiin iamtuhai kuang tung loiin, itho sika mo iamloihai kuang a itung ngam?

²Iamtuhaiin rammual roi la rêl an ti, ti nin inhriat mo ni ma? rammual roirêl petu hranghai nin ni’n chu, thil chînte lua ngaitua rukloi nin ini ma ni?

³Atûn dam sûng thil chu ti loiin, vântîrtônhai chungchâng thu khom kin la irêl hrang tih nin inhriat loi ma ni?

⁴Dam sûng thil rêl hrang ni neiin koiindanga ite irngeiloihai nin inrêltir hrang ma ni?

⁵Inzak a om bâka! Urêng kâra thu irfûk thei mi vâr inkhat lua nin laia nin iom loi ma ni?

⁶Urêngin a urêng leh an thubuai roirêlnaa intungin, sononghai a inrêl ngai hi!

⁷Thubuai nin nei ngai sika hin chukloina tak nin neih ti chu a inlang a ni. Nin ta hrangin tho’nsuala om kha a isa mo ni ma? Nin ta hrangin tuang ual nih khom itho sika mo nin inuam loi?

⁸Nangni rengin nin tho’nsual irhlôma. nin inrûk irhlôm ngai, nin urênghai ta tak leh khom?

⁹Mi felloihaiin Pathian Ram lua no nihai ti nin inhriat loi ma ni? Ihuangin om no roi; irdit songhai, millim biakhai, uirehai, hurhai, mongkohurhai,

¹⁰inrûhai, huatirhamhai, zu’nruihai, irkhal songhai, hleprûkhai hin Pathian Ram lua viat no nihai.

¹¹Nangni khom senkhat chu khaanga mi nin lei ni ngai. Khannisianlân, sualna ata infâiin Pathian kuanga inhlan nin ni tâka, ei Rengpa Jisua Krista le ei Pathian Irtha sikin Pathian kuang thiam nin chang ta.

¹²Thil tinrêng tho hi ki ta hrangin a’rthianga, khannisian, inlâp zit ual ma, ki ta hrangin irthiang khomnian, i suaka khom irphal ma ung.

¹³Fâknêk chu phîng ta hrang a nia, phîng chu fâknêk ta hrang a ni; khannisian, Pathianin inboi seng seng a ti. Takpum hi irditna sanoa hmang hrang ni maka, Rengpa ta hrang a ni ual; Rengpa khom takpum ta hrang a ni.

¹⁴Pathianin Rengpa chu thina irthokin a kaithoia, eini khom a sinthotheina’n ni kaithoi sa a ti.

¹⁵Nin takpumhai kha Krista takpum ônhai a nih ti nin inhriat loi ma ni? Krista takpum ônhai kha la pêkin notizuar takpum ônhaiin ki isiam hrang ma ni? Nâisâi mak e!

¹⁶Notizuar irzompui mi kha a notizuar leh takpum inkhat a nih ti nin inhriat no ma ni? Pathian Thubu’n fel takin, “An ruaiin takpum inkhat ni ta an ti,” a iti a ni.

¹⁷Khannisianlân, Rengpa irzompui mi kha chu irtha pumkhat an ni.

¹⁸Irdit hi mong ta roi. Mihriamin sualna dang a isin tinrêng chu a takpum pên tiang a ni; irdit song mi rêk kha chu ama takpum chunga a isual a ni.

¹⁹Nin takpum kha nin sûnga om Pathian nangni ipêk Irtha Irthiang in a nih ti nin inhriat loi ma ni? Mâni ta ni ta mak chêia,

²⁰mana irchôk kêng nin ini tâk, khasikin nin takpum kha Pathian roiinpuina hrangin hmang roi.