Read Hrangkhol 2 KORINTH 10 Bible Online

2 KORINTH 10 - Hrangkhol bible

2 KORINTH 10

¹Keima, Paula, nin laia ki oma nin chunga irngaiintôm le dâiriama oma, nin kuanga ki om no le nin chunga lum raka om ngaitu an iti hin Krista thuhnuairôlna le nunhoina songin nangni ki ngên a ni.

²Ni kuanga ki hong zoro hin rammual mihai lunginchong anga sin thoa ni’rngaituhai chunga ngar ngit hrang ki ni, nangni chunga chu ngar ngit hranga nin phût loi hrangin nangni ki ngên.

³Rammuala om chu ei ni, khannisian rammual mihai lungrîl irput anga bei ni mak meh.

⁴Kin râlhai doinaa kin ihmang râlthuamhai chu rammual râlthuam ni maka, Pathian râlthuam irnak nei a ni ual; ama kha kulpui det takhai siana’n kin hmang ngai. Irsêlna dik loihai kin inboia;

⁵Pathian inhriatna dân hranga lârirpâkna lamchâina tinrênghai kha kin seta, ngaituana tinrêng suaka hruaiin Krista thu kin zôm ngai.

⁶Iam nin om tak tak tih nin fia zoiin chu iamom loihai denginthei hrangin irsiam zel kin ti.

⁷Thilhai hi a chungphuaa an inlang dân nin ien a ni. Kha khan tu mo khat Krista mia irbe a iom ma ni? A sa, a omin chu, a bingin a chungchâng ngaitua nôk ri se, ama a ini ang takin keini khom Krista ta kin ni sikin.

⁸Nangni setna hrang ni loia nangni indingna hranga Rengpa’n irchamneina a ni ipêk hi song ual viat khom inlân, inzak ma ung.

⁹Ki lekha thona nangni insi tum anga inlang chu ki inuam loi a ni.

¹⁰Mi senkhatin, “Paula lekha thonhai hi a ngarin a naa, khannisian, ei kuang a omin chu a taksa a’rzala, a thuhai khom ite ni mah,” ti an ti.

¹¹Khaanga mihai khan, hmun danga kin oma kin lekha thonhai le nin kuanga kin oma kin sintho hrang kha a danglamna om mah, iti an inhriat ngêt hrang a ni.

¹²A dik takin, mânia irpâka irsâng oka irbêhai laia khan chu irtepin anni leh irkhî ngam ma ung. An invêt bâka! Mâni le mâni an irkhîna hrang le an irrêlna hrangin anni na nâkin dân an siama.

¹³Khannisianlân, keini chu, kin irsongna kha a ten om kêng; Pathianin sin a ni iten pe sûnga khan a ni ngêt ngai, khan, hi hin nin laia kin sin kha a huap sa.

¹⁴Kha ten sûnga om nin ni sikin Krista Thurchi Sa chôia nin kuang kin zuang khoma kha ten ban chu fe ma ung.

¹⁵Khasikin Pathianin a ni iten pe bial bana mi danghaiin an isin kha song ma ung. Kha nêkin, nin iamna hong irsôn a ta, Pathianin a ni iten pe sûnga zoro tin nin laia sinna lian ual ok tho thei kin ti, ti kin itûng ual a ni.

¹⁶Khanchu, Thurchi Sa hi nin kuang bana ram danga khom insîr thei kin ta, hmun danga mi sin lei tho tâk kha song no ni ung.

¹⁷Khannisianlân, Pathian Thu’n a iti angin, “Tukhomin a song nuam murdi’n chu Rengpa sintho kha song ri se,” ti a ni.

¹⁸Mânia sa irtia irpâktu chu inpâk hlo no nia, Rengpa’n an pâkin kêng inpâkna a ihlo ngai.