Read Hrangkhol 2 KORINTH 4 Bible Online

2 KORINTH 4 - Hrangkhol bible

2 KORINTH 4

¹Pathianin a lungkhamna’n hi sin hi tho hrangin a ni pêka, khasikin kin zâmirzaltir ma ung.

²Thil irthup le inzakpuiom sinhai kha kin mâka, milakin sin ma unga, Pathian thu huangna khomin hmang sa ma ung. Thutak vârna irkipin Pathian mithmua khan inlêngin mi tin sia le sa inhriatna mit tung kin tum ual ngai.

³Kin Thurchi Sa insîr hi thupin a omin chu, ar hmang chianhaia irthokin ithupin a iom a ni.

⁴Hi rammuala pathian saloi khan an milung inchong inthima a sia pehai sikin an iiam loi a ni. Krista, Pathian angna neitu roiinpuizia Thurchi sa vâr an chunga zuang inlang kha an hmu loina hrangin an mit a incho pehai a ni.

⁵Keini thu insîr ma unga, Jisua Krista chu Rengpa a nih ti kin insîra, keini khom Jisua sikin nangni suakhai kin ni iti kin insîr ual ngai.

⁶“Inthima irthokin vâr hong vâr suak a ti,” tihtu Pathian ngêt khan a ni, Krista hmêla Pathian roiinpuina vâr suak kin inhriatna hrangin kin lungrîl a ivâr tâk a ni.

⁷Khannisianlân, keini, irtha tianga irchon neihai hi pil bêl ang kha kin ni, irtha lian kha kin ta ni loiin Pathian ta a nih ti an lang theina hrangin.

⁸Inbuai maiin kin oma, khannisian, duai ma ung; a kâra chu lunginzîngin kin oma, khannisian, kin beidong viat ngai mah.

⁹Râl tamtak an oma, khannisian, rual nei loiin om ngai ma ung; pop chitin om ngai khom inlân, irhmang ripin chu om ma ung.

¹⁰Itiklai khomin kin takpum thi theia hin Krista thina kin irput mai ngai, a hringna khom kin takpuma hin an lang theina hrangin.

¹¹Kin hring kâr ka chu Krista sika thi hrangin kin irtûng mai ngai, a hringna khom kin takpum thi theia hin an lang theina hrangin.

¹²Kha omzia chu keinia thina’n sin a thoa, nangnia hringna’n sin a itho a ni.

¹³Pathian Thubu’n, “Kin iam sikin thu ki insîr a ni,” a iti ang khan, kha iamna irtha ngêta khan keini khomin thu kin insîr a ni, kin iam sikin.

¹⁴Rengpa Jisua kaithoitu Pathian khan keini khom Jisua pâlin ni kaithoi a ta, nangni leh a makunga ni hruai a tih ti kin inhriat.

¹⁵Hihai tinrêng hi nangni hrang sika a ni; Pathian lungkhamna’n mi tam ual a izo tîr tîr ang khan, khahai khan Pathian roiinpuina hrangin lômthu insîrna chongchai Pathian kuang inhlan ual ual an ti.

¹⁶Khasika khan kin zâmirzal viat ma ung. Kin taksa mihriam hi hong hmon tîr tîr khomsian, kin irtha mihriam chu a nitin siamintharin a iom mai a ni.

¹⁷Sôtnote sûnga kin intakna tuang nêp taka hin kumtuang roiinpuina, tetûk inruk loi dôra irkhêl, a ni siam pe a ni.

¹⁸Thil hmu theihai chu thîr mak mea, thil hmu theiloihai chu ei ithîr ual a ni. Thil hmutheihai chu boi nôk zôi a ta, thil hmu theiloihai chu kumtuangin om a ti.