Read Hrangkhol 2 KORINTH 6 Bible Online

2 KORINTH 6 - Hrangkhol bible

2 KORINTH 6

¹Pathian lungkhamna nin idong kha chanlamboia nin hmang inhek loina hrangin keini a sinthopuihaiin nangni kin ngên.

²Pathianin, “Nangni ki ngaitua zoro a hong tungin, Nangni ki ngaituaa; Nangni ki saninhring zoro a hong tungin, Nangni ki changpui ngai,” a ti. Irngai roi! Atûn hin zoro lômom tak a nia, atûn hin saninhringna ni chu a ni.

³Kin sinthôna hin tûte’n an ni demna hmu nohai sian ki nuam a ni, khasikin tûte lampuia khom lam chaninvâitir tum ma ung.

⁴Kha nêkin, kin sinthôna tinrênga buainahai, dengtheinahai le intaknahai diar taka tuangin, Pathian sinthotuhai kin nih ti kin inlang ual ngai.

⁵Zêm bitin, intângna ina khumin le mipui zêmin kin oma; sinsôlin, inmu inhnâiin le bu ngheiin kin om ngai.

⁶Kin irthiangna hai, inhriatna hai, tuangna hai le khonzana hai sikin Pathian sinthohai kin nih ti kin inlang ngai. Irtha Irthiang sikin, kin lungthungna dik sikin,

⁷thutak kin insîrna sikin le Pathian irtha sikin. Mi doina hrang le keini ir-enkolna hrangin felna kha tukfamin kin nei ngai.

⁸Chôiirsângin le mualphoi sakin kin om ngaia; irkôkinsia le inpâkin kin om ngai. Milakhaia bê kin nia, khan khomin thutak kin insîr ngai;

⁹mi inhriatloi angin kin oma, khan khoma mi tinin an nin hriat; ithi ang dôra omin, khannisian, nin ni ihmu ang khan kin ihring a ni. Hremin kin tuang khomin, that chu ni ma ung;

¹⁰Lungdûk irsak ni khom unglân, ki lôm mai; inriang kin ang, khannisian, mi tamtak kin irchong; ite neiloi kin ang, khan khoma thil tinrêng kin nei zit.

¹¹O Korinth rual lungthunghai! Nin kuang fel takin kin iti tâk a ni; kin lungrîl kin inhong irzattir tâk.

¹²Keini chu kin lungrîl nangni tiang khâr ma unga, nangni chu nin lungrîl keini tiang nin ikhâr a ni.

¹³Ki nâihai anga nangni bê’n atûna hin kin iti a ni; Nin ta hranga ngaituana kin nei lam takin nangni khom nei roi. Nin lungrîl inhong irzat roi.

¹⁴Iamno mihai inthurualpui no roi. Felna le sualna’n imo irhlopna an nei? Vâr le inthim khom ar kop thei moa?

¹⁵Krista le Beliara khomin irnaina imo an nei? Iamtu le iamloi imo kopirkâina an nei?

¹⁶Pathian tempil le millimhai khomin imo irzomna an inei? Eini chu Pathian hring tempil kêng ei ni. Pathianin, “Ki mihai kuang in sin ki ta, an kuang om ki ti; Keima an Pathian ni ki ti,” a iti ang khan.

¹⁷Khasikin, “Anni laia irthokin hong suak unglân, A bingin om roi, Thil porinche rêng rêng tôn no roi, Rengpa’n a ti. Khanchu, nangni pom ki ti.

¹⁸Keima nin Pathian ni ki ta, nangni ki nâipahai le ki nâinuhai ni nin ti, Rengpa Itinrêngthothei khan a ti,” a iti a ni.