Read Hrangkhol 2 KORINTH 8 Bible Online

2 KORINTH 8 - Hrangkhol bible

2 KORINTH 8

¹Urênghaio, Makedonia rama Koiindanghai laia Pathian lungkhamna sintho kha nin inhriat hrangin kin inuam a ni.

²Buaina an tonga khan fia tak takin an oma, khannisianlân, an raifânna a lian tak tak sikin inriang tak ni khomhai sian, tikhoina tak neiin pêkna an inei a ni.

³An thei dôr chu, an thei dôr nêka tam khom, an ipêk a nih ti nangni kin hriatpui a ni.

⁴An binga lungdo’n Judai rama Pathian mihai changpuina lama sintum nei sa hrangin an ni ingên a ni.

⁵Kha kha kin itûng ban a ni! A masa takin Rengpa kuang an irpêk baka, kha hnung chu Rengpa lungdo’n ki kuang an irpêk nôk a ni.

⁶Khasikin hi sin phutpu Tita kha, kin ngên, hi lungthungna sin sa bîk hi sunzom maia nangni zoipui hrangin.

⁷Nin inei murdi iamna hai, thu’nsîr theina hai le inhriatna hai, ni changpui hranga nin irzukna hai le lung nin ni thungna haia khan nin irchong ok sikin hi lungthungna sin khoma hin tikhoi sa hrangin nangni kin nuam a ni.

⁸Ite dân nangni khang pe ma ung. Khannisianlân, mi danghaiin ni changpui an irzukzia hai nangni hmu’n lung nin ni thungna hi a dik ta tak mani iti inhriattir ki tum a ni.

⁹Ei Rengpa Jisua Krista lungkhamna nei intamzia chu nin inhriat; inriangna sikin nin hong irchong theina hrangin irchong ok khomsian, nangni sikin a lei inriang tâk a ni.

¹⁰Mini kuma nin iphut kha atûn hin zoi unglân nin ta hrangin sa a ti, ti hi keima irngaidân a ni. Sin hranga a phut masa vai ni mak chêia, sin hranga an milung masa khom nin ni sa.

¹¹Khaang khan, kha chunga irnghat maiin nin sin kha zoi ta roi! Nin lei itum tâk ang khan zoi hrangin irzuk unglân, atûna nin nei lam ang tak khan tho roi.

¹²Pe hrangin nin irzukin chu, nin inei loi chunga ni loiin, nin inei chunga nin thilpêk kha Pathianin inham a ti.

¹³Nangni puak nangni inpêlin mi danghai inzôk tum ma ung; khannisianlân, hi zoroa hin nin nei intam sikin ar samhai nin ichangpui chu a sa ok a ni. Khanchu, nangni nin irsama anni an nei intam khomin nangni changpui an ti. Khaang khan irangna om a ti.

¹⁵Pathian Thubu’n, “A hrût intam khan nei intam ual maka, a hrût intom khan nei intôm ual mah,” a iti ang khan.

¹⁶Nangni changpui hranga kin irzuk lam ang taka Tita khom irzukna inneitu Pathian chunga kin lôm tak tak.

¹⁷Kin ngênna a inham vai ni loiin, ama lung suaka nangni changpui irzukna nin kuang a hong ichuk a ni.

¹⁸Ama le a urêng, Thurchi Sa insîrna sin a ithôna sika Koiindang murdi’n an imahriptu kha kin zu tîr sa.

¹⁹Khabana, ama hi, hi lungthungna sin Pathian roiinpuina hrang le nangni changpui kin nuamna inlangna hrang kin sinnaa ni zui hranga Koiindanghaiin an inthanga an iphun a ni.

²⁰Hi thilpêk tam kin sem dâna hin tûte’n an ni sêl loina hrangin kin irdîn a ni.

²¹Kin thil tum chu Rengpa mithmu vaia ni loiin mihriam mit hmu khoma dikna sin hi a ni.

²²Khasikin anni leh khan kin urêng inkhat kin zu itîr a ni; voi iza kin fiaa, nangni changpui a’rzuk tak tak iti kin inhriat. Atûn vâng chu tak nangni a sôn tak taka, nangni changpui a’rzuk ual ual tâk.

²³Tita hi chu ki rualpa, nangni ki changpuina lama sin ni thopui ngaitu a nia; urêng dang a changpuihai hi chu Koiindanghai irthûla Krista kuanga roiinpuina intungtu an ni.

²⁴Khahai kuanga khan nin lungthungna inlang roi, nangni kin songna chungchâng thua hin kin idik ti Koiindanghai murdi’n an inhriat infel theina hrangin.