Read Hrangkhol 2 KORINTH 9 Bible Online

2 KORINTH 9 - Hrangkhol bible

2 KORINTH 9

¹Judai rama Pathian mihai changpuina inpêl chungchâng thu kha chu nangni kuanga irziak nang ual mah.

²Changpui nin peiziahai kin hriata. Makedonia rama mihai kuang khan “Akaia rama urênghaiin chu mini kum ata changpui hranga an irsiam tâk kêng,” tiin nangni ki song a ni. Nin irzukna khan an laia mi tamtak an thora.

³Khannisian, kha thua khan nangni ki songna kha a korong a ni loina hrangin, urênghai hi ki hong itîr a ni, ki ihril lam ang taka nin lei irsiam theina hrangin.

⁴Makedonia rama mihai ngânin kin pâla ni zuang zuiin, nin irsiam loi zuang hmu ta duaihai sian, nangni kin iiam lia le te, nangni vai ni loiin, keini hi mualinphoiin kin iom hrang kêng.

⁵Khasikin, inrenna thilpêk nin lei intak kha nin lei irsiam diam theina hrangin, hi urênghai hi ki matona nangni lei zuang sir bak hrangin ngên an nang niin kin hriata. Khanchu, ki zuang tung tena chu lei irfûk diam ta nin ta, nin nei sika ni loiin, nin nuam sika nin ipêk a nih ti inlang a ti.

⁶Inhre roi, hiang lama hin chîmu a tû intômin chu inlût intôm a ta, a tû intamin chu ât intam a ti.

⁷Mi tinin inpâm pum le pêk loi theiloi anga irngaia pêk ni loiin, an lungsuak lam ang taka pêk ni ri se; lôm taka pêkpu kha kêng Pathianin a lôm ngai.

⁸Pathian chu nin innang thil sa tinrêng nangni a pêk theia. Khabana nin innang nêka tam khom thil sa nin tho theina hrangin nangni a pêk belsa thei a ni.

⁹Pathian Thu bu’n, “A sem indara irsamhai a pêka, A khonzâna chu kumkhua’n a pangai a ni,” ti irziak ang khan.

¹⁰Khan, an thektu kuang chîmu petu leh fa hrang bai pêktu Pathian khan chîmu nin innang murdi nangni pêkin nangni irsôntir a ti, nin tikhoi irthoka khan ra tamtak nangni insua pe a ti.

¹¹Nin tik nin inhoi mai theina hrangin Pathianin nangni irchongtir mai a ta, mi tam takin nin thilpêk keima irthoka an hmu sika khan Pathian kuang lômthu insîr an ti.

¹²Hi nin sintho hin Pathian mihai irsamna vai irfûk pe maka, Pathian kuang lômthu insîrna lian tak nghi sain a lêt mai a ni.

¹³Hi nin sintho’n fiana a intung sika khan mi tam takin Pathian kuang roiinpuina pe an ti. Krista Thurchi Sa nin inpuang ngaia iam nin om sik le anni ta hrang le mi tin ta hranga nin tikhoi sika khan.

¹⁴Khasikin lungthungna inthûk tak neiin nangni chongchai pe an ti, Pathianin lungkhamna bîk nangni ar hmutir sika khan.

¹⁵A thilmanboi pêk sika khan Pathian kuang lômthu insîr ei ti.