Read Hrangkhol GALATIA 1 Bible Online

GALATIA 1 - Hrangkhol bible

GALATIA 1

¹Kei Paula, tirtôn, mihriam itîr ni loi, mihriam inkung khom ni loi Jisua Krista le mithi lai ata ama kaithoitu Pa Pathian inkungtu hin,

²Ki kuanga urêng om murdihai leh hin, Galatia rama koiindanghai chubai nangni kin mûk.

³Pathian, ei Pa le Rengpa Jisua Krista kuang ata lungkhamna le irngeina nin kuang om ri se.

⁴Pathian, ei Pa nuamlam zômin atûn zoro saloi ata ni sansuak hrang le ei sualhai ni’rsunfâi pe hrangin Krista kha a’rpêk tâka.

⁵Pathian kuang khan roiinpuina kumtuangin om ri se. Amen.

⁶Krista lungkhamnaa koitu kha rotsanin Thurchi Sa chi dang nin pom nôk thut hi, irkhêl ki ti.

⁷Thurchi Sa chi dang om mah, nangni inbuaipuihai khan Krista Thurchi Sa indanglam an itum kêng.

⁸Eini khom ni inlân, irvân ata zuang chum vântîrtônhai khom ni sianlân, ei ihril tak ni loi “Thurchi Sa” nangni an hrilin chu, khosâl tongin om ri sehai!

⁹Nangni ki hril tâka, atûn khom nangni ki hril nôk. Nin ipom tak ni loi “Thurchi Sa” dang, nangni hong hril murdi chu khosâl tongin om ri se.

¹⁰Khante! mihriam inlômtir mo ki itum Pathian inlômtir mo? Mihriam lôm lam insîr tumin ki ihong ma ni? Mihriam inlômtir tum ni inlân Krista suak ni no ning.

¹¹Urênghaio, nangni ki hril, Thurchi Sa nangni ki ihril hi mihriam ata suak ni mah.

¹²Tu kuanga dong khom ni ma ung, tukhomin nir chu ual mahai, Jisua Krista ngei khan ki kuang a inpuang a ni.

¹³Juda sakhuaa ki’rpêk laia ki om lam kha nin inhriat; Pathian koiindanghai laia hong lûta deng kin theitirhaia, inram chithai ki itum ngai kha.

¹⁴Ei sakhua biakna tianga irchibulhai thumâk vong chungchânga khom, ki rual tamtak Judahai ki khêl ngai.

¹⁵Khannisianlân Pathian lungkhamna’n ka nu pum sûng ata a ni lei inkunga, a ni ikoi tâk a ni.

¹⁶Jentailhai laia Thurchi Sa ki hril theina hrangin a Nâipa kha ki kuang an lâr lai khan, tûte ni san hrangin irdon ma ung.

¹⁷Ki ni mân daiha tirtôn lei ni tâk Jerusalem mihai kuang fe ual ma ung. Arabia rama ki fe pat tâka; khan, Damaska kho tiang ki hong ikîr nôk lik tâk a ni.

¹⁸Kum thum hnunga chu Jerusalema Kifa hmêl inhriat hrangin ki hong fea, a kuang sûn sômhleihni ki châma.

¹⁹Khannisianlân, Rengpa urêng Jakoba ti no chu tirtôn danghai tûte hmu ma ung.

²⁰Nin kuanga ki thu irziak hi a dik a ni. Milak tho ma ung, Pathianin an hriat.

²¹Kha zoiin chu Suria le Kilikia ramhaia ki fe nôk tâka.

²²Judai rama Kristian koiindanghai len vâng chu ki hmêl lan hre irman mahai,

²³“Tiana deng nin theitu khan inrampai a itum iamna thu a hril lik ta,” ti irhâi vai an inhriata;

²⁴Khaang khan, keima sikin Pathian an inpâk ta.