Read Hrangkhol GALATIA 3 Bible Online

GALATIA 3 - Hrangkhol bible

GALATIA 3

¹O Galatia rama mi’nvêthaio, tu’n mo nangni an dôi? Nin mit hmu ngeia Jisua Krista kha Krosa hembe a nih ti fel taka inlangtir a ni kha te!

²Ni hril u ta, Irtha nin idong kha Dân nin zôm sika ma ni, Thurchi Sa nin inhriata nin iam tâk sika ma ni?

³Khaang dôra invêt mo nin ini! Irtha song tâk hnunga taksa thila nin imong hrang ma ni?

⁴Nin chunga thil tunghai kha ite a ini loi ma ni? Ni loia irhoi tak!

⁵Phal taka Irtha nangni pêka, nin laia thilirkhêl tho ngaitu Pathian khan, Dân nin zôm sika mani, Thurchi Sa nin inhriat nin pom tâk sika tho ma ni?

⁶Pathian Thubu’n a ti angin, “Abrahama’n chu Pathian a iama, thiamchanga pom kêng a ni ta,” ti a irziak ang khan.

⁷Abrahama nâi dik takhai kha chu iamtuhai hi an nih ti inhre roi ba.

⁸Khan, Lekha Thu khan Jentailhai khom iamna sikin Pathian khan thiam inchangtir hrang a nih ti a lei hmua; khanchu Abrahama kuang, “Nangmaa khan nam tin satvurin om an ti,” tiin Thurchi Sa kha a lei hril diam tâk a ni.

⁹Khanchu, Abrahama’n a iiam anga iam murdi’n satvurna kha an idong tâk a ni.

¹⁰Dân zôm irnghatnaa hmanghai chu khosâl tong chian an ni; “Dân lekha Thu a chuang murdi zôm loia tho zit loi chu khosâl tong an ni,” ti irziak a ni.

¹¹Dân zôm sikin Pathian makunga tûte thiamchang zoi om mahai ti a fel a ni. “Iamna sika thiamchang kha hring a ta,” ti a ni.

¹²Dânin chu, “Thupêk zôm zittu chu hring a ta a ti maia, iamna insîr sa mah.

¹³Thinga inkhâi chu khosâl tong a ni,” ti irziak ang khan. Krista khan ei ta hrangin khua isâlna kha pêlin Dân khosâlna ata a ni sansuak tâk.

¹⁴Khanchu, Pathianin Abrahama sat a vurna kha Jentailhai kuang Kristaa khan a zuang tung tâka, eini hin Irtha pêk inkung kha iamna sikin ei lei dong tâk a ni.

¹⁵Urênghaio, entîrna hrangin mihriam tho dân hong insîr ta inlân, mihaiin Thu an hong intung infel tâkin chu, mihriam thuthung chian a ni sikin, tûte’n khoi nôk ngai mah, bôk khom bôk ngai mahai.

¹⁶Abrahama le ar chihai kôla vai a ni, Pathianin Thu a inkung kha: mi tamtak chungchâng insîr mah, “Irchihai” ti loiin mi inkhat hrilna angin, “Chi” a iti a ni; kha mi kha Krista hi a ni.

¹⁷Ki insîr tum chu hi hi a ni. Kum irzaminli le kum sômthum zoia Dân lei om tâk khan Pathian Thuthung kha insiat ual mah, a thu’nkung khom kha indanglamtir ual mah.

¹⁸Dân zôm sika irchon luatu ni thei sian, Pathian thu’nkung sika ni no nia; irchon luatu hrang a ipêk tâk a ni.

¹⁹Khaang kha ni sian, Dân hi itho sikin mo pêk a ini? Tho’nsualna hi i ang tak mani ti, inlang hranga vântîrtônhai palaia hmangin pêk a ni; Abrahama kuang Nâi a inkung kha a hong inlang mâna hrang vai a ni.

²⁰Mi inkhat hrangin palai om nang maka, Pathian chu inkhat vai a ni.

²¹Khaang kha ni sian, Pathian Thu’nkung hi Dân hin a irkal ma ni? Irkal mak e! A nin hring thei Dân pêk ni sianlân, kha Dân zôm sika khan Pathian makunga tukhom thiamchang thei ni a ti.

²²Khannisianlân, Pathian Lekha thu khan, “Itinrêng hi sual thuhnuaia a om ta,” a tia; khanchu Jisua Krista iam sika dong hrang thil inkung kha a iam murdi kuang pêk a ni.

²³Iamna thu a hong tung mâka chu Dânin mi a khitphiara;

²⁴Iamna sika thiam ei chang theina hrangin, Dân chu Krista tianga ni kaihruaitu a nia.

²⁵Khannisian atûn chu iamna thu kha a hong tung tâk sikin, Dân kaihruaitu hnuaia om ta mak me.

²⁶Khanchu Krista Jisua nin iamna sikin nin rêngin Pathian nâihai nin ni ta;

²⁷Kristaa baptisma chang murdi’n chu Kristaa khan nin irvô tâk a ni.

²⁸Juda le Jentail, suak le suakloi, pasal le nupang om ual ta mah, Jisua Krista leh irzomin nin rêngin pumkhat nin ni.

²⁹Khanchu, Krista mi nin ni tâkin chu Abrahama irchihai nin nia; Pathianin thilpêk a inkung kha nin ihmu hrang a ni.