Read Hrangkhol GALATIA 5 Bible Online

GALATIA 5 - Hrangkhol bible

GALATIA 5

¹Krista khan a nin zalêntir tâka, nin zalênnaa khan ngîr indet khak unglân, suak ringkola intâng nôk ta no roi.

²Irngai u ta, keima Paula ngei hin nangni ki hril, ser nin tanin chu Krista kha inlâppui viat no chin ni.

³Sertan murdi kuang hi hi ki insîr nuam chu a ni. Dânin a inphût murdi chu an itho lele hrang a ni.

⁴Dân zôm sika thiamchang tumhaio, Krista leh nin irsen tâka; lungkhamna kha nin suaksan ta a ni.

⁵Keini chu Irtha zâra iamna sika thiamchangna kha sabeiin kin inghâkhmo a ni.

⁶Jisua Kristaa ei om photin chu sertan mo, tanloi mo danglam ual mah; lungthungnaa irbel iamna hi a poimo a ni.

⁷Mâ nin isôn tia le te, a tu takin mo Thutak kha taksôn loi hrangin nangni hruai irhmang!

⁸Hi hruai kôina hi a koitu Pathian ata suak ni mah.

⁹Chol tômte khomin bai lian tak khom ar fang suak thei ti a ni.

¹⁰Rengpa inkhata om suam ei ni sikin lungrîl dang la’rput mak chêi, keima’n chu ki iam ngit a ni; nangni inbuaitir chu, tukhom ni sian, hrem la tong a ti.

¹¹Urênghaio, keima’n sertan a nang tiin lei hril ngai inlân, itho mo deng an ni intheitir hrang? khaang khan nisian, kros thu kin ihril hin buaina siam no ni.

¹²Nangni inbuai ka chu ser an itan vai ni loiin, kha khan tho li lia ri se; tan sabak ri se ki inuam a ni.

¹³Urênghaio, nangni chu Zalênna nei hranga koi nin ni, nin Zalênna hi taksa ta hranga zoro inchuma hmang viat no roi; lung irthung irhlômin sin irtho irhlôm roi.

¹⁴“Nangma lung ni irthung angin ni bômhai khom lungthung roh,” ti chongbâi khat hi nin zômin chu Dân murdi nin izôm zit ni a ti.

¹⁵Ramsa ang dêna nin irsea, nin irfâk duaiin chu, nin irfâk zit loina hrangin irdîn roi.

¹⁶Ki insîr tum tak chu hi hi a ni: Irthaa om unglân, taksa irzukna chu zôm viat no chin ni.

¹⁷Taksa nuamlam chu irtha lam tianga thil ar kal khaka, Irtha lakin taksa tiang thil chu ar kal khak saa, an irkal irhlôm khak sikin, nin itho nuam tak ite nin itho thei ngai loi a ni.

¹⁸Irtha hruaia nin omin chu Dân hnuaia om mak chêi.

¹⁹Taksa mihai sintho chu an lang infel a ni: irditna hai, porinchena hai, hurna hai,

²⁰millim biakna hai, dôi hai, irkhôkmâkna hai, irngôna hai, hnarsâna hai, milung saloi hai, dohasa hai, irthekindarna hai, irsenna hai,

²¹irhnarsâna hai, zun rui uar hai, zu hmun buala inhoina hai le khaanga a dang dang thôna hai kha. Khaanga tho mihai khan Pathian Ram lua viat no nihai ti nangni ki hril tâk angin nangni hril nôk ki ti.

²²Irtha ra chu: lungthungna hai, raiinfânna hai, irngeina hai, tuangdiarna hai, khonzâna hai, satna hai, iamomna hai,

²³thuhnuairôlna hai insumtheina hai a ni. Khaang tianga Dân irkal om mah.

²⁴Jisua Kristaa omhai khan an taksa irzukna hai le nuamna hai khan an hembe ta a ni.

²⁵Irthaa hringna ei ni tâkin chu Irtha ni ihruai ang dênin om ei ti.

²⁶Lârirpâka, irsual irhlôm le irhnarsa’n ei iom hrang ni viat mah.