Read Hrangkhol GALATIA 6 Bible Online

GALATIA 6 - Hrangkhol bible

GALATIA 6

¹Urênghaio, mi tu mo khatin sual a tho lai takin tong ta unglân, nangni irtha mihaiin nin indik hrang a ni; khannisianlân, irngaiintôm takin ni tho hrang a ni. Nangni khom thêmnaa nin lût sa loina hrangin irdîn dêkin om roi.

²Puakrik irsan irhlôm ngai unglân, khanchu Krista dân kha nin izôm ni a ti.

³Mi ite ni loia mi lian tak nia irbe chu mâni a irhuang chian a ni.

⁴Mi tinin mâni sintho enfiah seng bak ri se, kha hnung chu mi dang chunga ni loiin mâni chung ngeia song hrang nei a ti.

⁵Mi tinin mâni hrang puak ei nei seng.

⁶Kristian thu irchutirna dongpu khan thil sa murdi chu ama irchutirtu kuang a ipêk sa hrang a ni.

⁷Ihuangin om no roi, Pathian chu hmusit zât ni mah. Mi’n a itû chu, a i-ât nôk ngêt hrang a ni.

⁸Mâni taksa tianga tûtu chu taksaa siatna ât a ti. Irtha tianga tûtu chu Irthaa hringna ât a ti.

⁹Thil sa tho hnông no idua, ei irtha ei inboi no’n chu a zoro taka ei la i-ât ngêt hrang a ni.

¹⁰Khanchu zoro inchum ei inei ang lam takin mi tin kuang sin sa tho inlân, iamnaa ei in sûnghai chunga lenvâng chu tho uar ual ei ti.

¹¹En u ta, horop inhrol tak taka ki irziak hi keima irziak ngei a ni.

¹²Taksa tianga, ser tan hranga nangni inphût ngaihai kha a chungphua tiang ringot inlanga, irpâk nuamhai kha an ni. Kha kha an tho ngai, nikhomsianlân, Krista Kros sika dengtheina an zôkna hranga paia an itho ngai a ni.

¹³Sertanhai khom hin Dân kha zôm irkip bîk ngai mahai. Nin taksaa irsinsiana om kha an irsongpui theina hrangin, ser nangni intantir an itum a ni.

¹⁴Kei chu ei Rengpa Jisua Krista Kros vaino chu song hrang dang rêng nei ma ung, kha krosa khan rammual hi ki ta hrangin hembe a nia, kei khom rammual ta hrangin hembe ki ni.

¹⁵Mi’n ser an itan le tanloi ite poimo mah, Siamtharna hi a poimo tak chu a ni.

¹⁶Hi thu zômtu murdi chunga irngeina le za’rngaina om ri se, Pathian Israelhai chunga khom.

¹⁷Ki chong khârna’n: Atûn ata chu tukhomin nin buai ta no ri se, ki takpuma sâbe omhai hin Jisua Krista suak ki ni tih irsinsiana a inlang a ni.

¹⁸Urênghaio, ei Rengpa Jisua Krista lungkhamna kha nin kuang om ri se. Amen.