Read Hrangkhol EFESI 5 Bible Online

EFESI 5 - Hrangkhol bible

EFESI 5

¹Khanchu, Pathian nâi inditom takhai nin ni sikin, a om dân latuhai ni roi.

²Krista’n lung a ni thunga, Pathian lôm lam thilpêk le thilinhlan mirimhoi ni hrangin ei ta hrangin a irpêk ang khan lungthungna nei seng roi.

³Pathian mihai nin ni tâk sikin, nin laia: irditna hai, Porinchena hai, huatirhamna hai rêng rêng nin laia sâm khom sâm ni no ri se.

⁴Bâi nghalhai, chonghoi loi le tufiam porinche insîr hai, nin ta hrangin sa mah, lômthu insîr uar ual roi.

⁵Irdit uar hai, mi porinche hai, mi huatirham (Kha kha millim biak tihna a ni); kha mihai khan Krista le Pathian Rama khan dongtum nei viat mahai ti inhre fel roi.

⁶A nêp ang tianga kha thil insîrtuhai khan nangni huang no ri sehai, kha thil sika khan Pathian ningmurna kha taksônloi mihai chunga a itung hrang a ni!

⁷Khasikin, anni chu irkômpuihai viat no roi.

⁸Tiana khan chu inthim nin nia, atûn chu Rengpaa vâr nin hong ni ta, ivâra omhai angin nin iom ngêt hrang a ni.

⁹Vâr chu satna hai, felna hai, le thutak tinrêngin a ra suak ngai.

¹⁰Rengpa lômlam chu i mani ti inhre fel tum ual roi.

¹¹Khan, inthim hnuaia omhai sintho inlâp loia khan kop viat no roi, a dikloizia inlangtir ual ngai roi.

¹²Inrûka om thil tho ngaihai kha insîr khom inzak a om a ni.

¹³Aniachu, thil tinrêng a thiamnozia inhriattira om hi vâr inlangtir a ni ngai, inlangtira om ka chu vâr a ni.

¹⁴Khasikin Pathian thua khom: “Nang inmusu, harin lân, Mithi lai ata thoi roh, Krista khan nang êl invâr a ti,” ti a ni kha.

¹⁵Khanchu nin om dâna a sân irdîn roi, mi’nvêthai anga om loiin mi vârhai angin om ual roi.

¹⁶Zoro sano taka om ei ni sikin nin zoro kha hmang insa roi.

¹⁷Khasikin, invêt takin om no unglân, Rengpa nuamlam i mani tih inhriat tum ual roi.

¹⁸Uain inrui uar ta no roi, siatna bul a ni, Irtha sip ual roi.

¹⁹Inpâkna hla hai, Pathian hla hai le irtha tianga hla hai leh khan irdon irhlôm ngai unglân, nin milung takin Rengpa inpâkna hla sakin inpâk roi.

²⁰Ei Rengpa Jisua Krista irhmingin itiklai khomin itinrênga Pa, Pathian kuang lômthu hril roi.

²¹Krista chituhai nin ni sikin irpelût irhlôm roi.

²²Nuhai khomin Rengpa thu an izôm angin, mâni pasalhai thu an izôm hrang a ni.

²³Krista chu ama takpum Koiindang saninhringtu a nia, Koiindang lu a ini angin pasal chu dôngma lu a ni.

²⁴Krista kuang Koiindang a irpelût angin, dôngmahaiin an pasalhai thu, lam tinrênga zôm ri sehai.

²⁵Pahaio, Krista’n Koiindang lung a ithung ang hin nin dôngmahai lungthung roi.

²⁶Koiindang chu thu le tuia irsûkinfâia irthianginfai hrangin Krista chu ama a irpêka,

²⁷Koiindang roiinpui tak, chuai loi, innimna koploi le khaang thil porinche koploi, irthiang le chukloina dang rêng rêng om loi, ama ta hranga inding hrangin a irpêk a ni.

²⁸Pasalhai khan mâni takpum lung an ithung angin mâni dôngmahai lung an ithung hrang a ni. Mâni dôngma lungthungtu chu ama lung a irthung a ni.

²⁹Tukhomin mâni takpum khôkmâk ngai mahai, Krista’n Koiindang an fâa, a indot angin an indot ngai a ni;

³⁰eini khom a takpum ônhai ei ni.

³¹Pathian Lekha thua, “Khasika khan pasalin a nu le a pa rotsan a ta, a dôngma chel a ta, khanchu an inhniin taksa pumkhat hong ni ta an ti,” ti a ni.

³²Hi hi thurîl inthûk tak a ni, keima’n chu Krista le Koiindang thu a insîrna niin kin hriat.

³³I khom nisian, nin laia tukhomin mâni lung a irthung angin mâni dôngma lungthung seng ri se, dôngma khomin a pasal chi lam dân inhre ri se.