Read Hrangkhol FILIPI 4 Bible Online

FILIPI 4 - Hrangkhol bible

FILIPI 4

¹Khasikin ki urêng inditom takhai le ki irngai tak takhai, ki raifânna le ni roiinpuitirtu hranghai ki indit takhaio, khaang khan Rengpaa ngîr indet roi.

²Rengpaa khan milung hmunkhat irput hrangin Euodii le Suntuki kha ki ngênhai.

³Nang khom, ki ringkol irbunpui iamom tak, kha nupanghai kha changpui hrangin nang ki ngên a ni; anni khan Klemena le Hringna Bua irhming chuang danghai le, Thurchi Sa hrilna sina ni sinpui intam ngai an ni.

⁴Rengpaa khan lôm mai roi, ti nôk ki ti, lôm roi!

⁵Nin tuangtheizia mi murdi inhriat ni ri se. Rengpa kha anai e.

⁶Itea khom lunginzîng no roi, i thila khom chongchaiin nin innanghai Pathian kuang intung unglân, lômthu hril pumin ngên roi.

⁷Khanchu, mihriam inhriat phâk loi, Pathian irtharngamna khan nin milung le nin lungrîlhai kha Krista Jisuaa khan nangni enkol pe a ti.

⁸A mongna taka chu urênghaio, a dik le mahripom murdi, a fel le irthiang murdi, inditom le a thanginsat murdi, satna a oma inpâk ruk a om photin chu, khahai kha ngaitua roi.

⁹Ki kuang nin thil irchu le donghai, nin thil inhriat le hmuhai kha tho ngai roi. Khanchu irtharngamna Pathian khan nangni ompui a ti.

¹⁰Nin ni ngaituazia, hi kâra hin nin hong inlangtir nôk thei tâk sikin, Rengpaa khan ki lôm tak tak a ni. Khaang tho kha nin tum ngeia, zoro’nchum nin la ihmu loi ringot a ni.

¹¹Ki irsamna thu ki insîr ual chu ni ma ung; i ang khomin om inlân milungchuk taka om dân kin hriat tâk sikin.

¹²Inriang taka om dân ki theia, irchong taka om dân ki thei tâka; itinrênga khop le phîngchâma om dân, irchong le inriang om dân thu’rthup ki’rchu ta.

¹³A nin hrâttu sikin i khom tong hrangin hrâtna ki nei tâk a ni.

¹⁴I khom ni sianlân, ki lunginzînghai nin ni inhriatpui ngai hi nin tho’n satak tak.

¹⁵Khan, Thurchi Sa ki hril phut laia Makedonia ki suaksan hnung khan nangni Filipihai vai ni loi chu Koiindang dang inkhat luan sum hmang hrang ni ngaituapui om mahai ti nin inhriat.

¹⁶Thesalonika khuaa ki om lai khomin ki’rsamna ni changpui hrangin voikhat vai ni loiin voihni reng thilpêk nin ni ithon kha.

¹⁷Thilpêk zong ni ma ung, nin ta hranga irtha tianga ra hrang kha ki zong ual a ni.

¹⁸Nin thilpêk murdi ki lei donga, ki nei intam ta. Epafrodita kuta nin thil hong thonhai kha ki lei hmua, ki’rhniang tâk e. Kha kha mirimhoi thilinhlan, pominruk, Pathian nuamlam a ni.

¹⁹Ki Pathian khan Krista Jisuaa ar chongna roiinpui tak ata nin innang tinrêng nangni pe a ti.

²⁰Ei Pathian le ei Pa kha kumtuangin roiinpui ri se! Amen.

²¹Mi irthiang murdi Krista Jisua irhmingin chubai nangni ki mûk. Ki kuanga urêng omhai hin chubai nangni an mûk.

²²Mi irthiang murdi’n chubai nang an mûk, Kaisara ina omhai hin nangni an mûk ual tak a ni.

²³Rengpa Jisua Krista lungkhamna kha nin kuang om ri se.