Read Hrangkhol KOLOSA 2 Bible Online

KOLOSA 2 - Hrangkhol bible

KOLOSA 2

¹Nangni le Laodikei khua mi le taksaa ki hmêl hmu loihai khomin idôr tena irnak songin mo nin ta hrangin ki isin ngai nin inhriat ki inuam a ni.

²An milung irtha a’rngam theina hrangin lungthungnaa an irsuikhôma, lam tinrênga milunga inhriat felna a sipa, Pathian thu’rthup, Krista kha, an inhriat thei ki inuam a ni.

³Kristaa khan vârna le inhriat thiamna irchon hlu murdi kha a’rphûma.

⁴Tukhomin, thudik ni le irhoi taka inlang dik ual loia nangni an huang chian loina hrangin ki lei insîr a ni.

⁵Taksa’n nin kuang om no khom inlân irtha’n nin laia ki oma, nin irvong infelzia le Krista iamnaa nin detzia ki hmu’n ki râi a ifân a ni.

⁶Khanchu, Krista Jisua kha Rengpaa nin pom tâk sikin ama leh irzomin om mai roi.

⁷Amaa khan irzung kaiin irzom unglân, irchuin nin om ang khan iamnaa khan ngîr indet unglân, lômthu insîr uar roi.

⁸Irdîn roi, Kristaa suak ni loi, rammual irchutirna dikloi ramkhohri ata suak, rammual vârna an iti mihriam irchu nôk mai mai khan tu mo khatin nangni an huang itinin.

⁹Krista takpuma khan Pathian famirkipna tinrêng kha a om.

¹⁰Ama chu inlalna le irchamneina murdi lu a nia, amaa khan nangni khom famirkiptir nin ni.

¹¹Kristaa khan sertan nin ni tâk, mihriam kuta tan ni loiin, sual sinthotheina ata kêlsuana hrangin Kristaa sertan nin ni ta.

¹²Baptismaa khan a kuang phûm sa nin nia, mithi lai ata ama kaithoitu Pathian sinthotheina iam sikin amaa khan kaithoi sa nin ni.

¹³Nin porinchenahai le taksaa sertan loi nin ni sikin thi nin nia, khannisianlân, Krista leh nangni an hringtir tâka, ei porinchenahai murdi ngaidam a ni ta.

¹⁴Thupêk kuta irziak, ni khâl ngaitu, zôm hrang hmabâk chu, a kâtpaia, Krosa khan hembe’n an boitir ta.

¹⁵Kha Krosa khan Krista’n irtha roirêltuhai le irchamneinahai, sinthotheinahai ata suak paiin, khahai an hnêna kha mi tin hmu hrangin a siam ta.

¹⁶Khanchu, fâk le nêk thua mani, in thua mani, nikho irthiang hmang thua mani, tha thar kût hmangna thua mani, Sabat ni thua mani, tukhomin ircham nangni nei pe no ri sehai.

¹⁷Kha kha thil la om hrang irhlîm a ni, a tak chu Krista hi a ni.

¹⁸Takpum irngainêp hrang, vântîrtônhai khom biak hrang tia inlârna danglam bîk hmua irbe, taksa lungrîl tak irputa, ite ni loia irpâkhai hi nin chunga ircham inneitirhai no roi.

¹⁹A lu tak Krista chu chel ta mahaia, Amaa khan takpumpui hi irnak le irzung khitphiara infa a nia, Pathian nuamlam angin takpumpui kha a irsôn ngai a ni.

²⁰Rammual irchutirna dikloihai kha Kristaa nin thisan tâkin te, itho sika mo rammual mihai angin hi thupêkhai

²¹“Intôk no roh,” “irtem no roh,” “Tôn no roh,” itihai hi nin izôm mai?

²²Khaang thilhai kha mihriamhai isiam dân le irchutirnahai a nia, voikhat hmang zoi hnungin chu a irhmang nôk zit ngai kêng a ni.

²³Hi vântîrtôn biak tihai mani, takpum irngaiinêp tihai hi mani, sa zap le chu ar hoia, khannisian taksa irzuknahai inhnê hrangin chu ite ar fêna om mah.