Read Hrangkhol 1 THESALONIKA 1 Bible Online

1 THESALONIKA 1 - Hrangkhol bible

1 THESALONIKA 1

¹Paula, Silvana le Timothea khan, Pa Pathian le Rengpa Jisua Kristaa Thesalonika koiindanghai laia: Lungkhamna le irngeina nin chunga om ri se.

²Nangnihai sikin Pathian kuang lômthu kin sîr ngai; kin chongchainahaia khom mong loiin nin irhming kin irlam ngai.

³Iamna sika irnak nin isonghai, lungthungna sika nin sin intamzia haia, ei Rengpa Jisuaa sabeina nin sip indetziahai, ei Pa le Pathian makunga kin inhriat mai ngai a ni.

⁴Urênghaio, Pathianin lung nangni a thunga, ama ta hranga inthang suak nin nih ti kin inhriat.

⁵Nin kuang Thurchi Sa kin hong intung lai khan thu mai mai ni loiin sinthotheina le, Irtha Irthiang iam pumin kin hong insîr a ni; nin laia i angin mo nin ta hrangin kin iom khom nin inhriat.

⁶Kin om lam le Rengpa om lam lâktuhai nin hong ni tâka, intakna tamtak tuang pumin Irtha Irthiang thu kha lâkin nin pom ta.

⁷Khanchu, Makedonia le Akaia rama iamtu murdihai ta hrangin enton nin nia,

⁸Rengpa thu atûn nangni ata Makedonia le Akaia rama vai indarh tâk hi ni loiin hmun tina Pathian nin iiam thu an thang tâka; khasikin keini’n ite kin insîr nang ta mah.

⁹Nangni kin hro laia nin ni lôm lamhai, millim mâksana Pathian hring le dik taka sintho hranga Pathian tiang nin hong irhei tâk thu hai le

¹⁰A Nâipa Jisua, mithi lai ata kaithoi, ningmurna zuang tung hrang ata ni sansuakpu kha, irvân ata zuang nghâka nin omhai an insîr sup sup a ni.