Read Hrangkhol 1 THESALONIKA 2 Bible Online

1 THESALONIKA 2 - Hrangkhol bible

1 THESALONIKA 2

¹Urênghaio, nin kuang kin ihong kha a korong ni mah ti nangni khomin nin inhriat.

²Nin inhriat angin Filipi khuaa khan inzakom taka soisak tuang khom inlân, irdoina tamtak kâra nin kuang Thurchi Sa hril hrangin ei Pathianin hâina a ni pêk a ni.

³Kin thuhril hi thu dikloi mani, thu porinche mani, irhuangna thu mani ni maka.

⁴Thurchi Sa inkoltir inruka Pathianin a ni inkung ang dênin, mihriam inlôm hrang ni loiin ei lungrîl fiatu Pathian inlôm hrangin thu kin ihril ngai a ni.

⁵Itiklai khom mi inpâk pa pai ngai ma unga, huatirham irkhûna hrang thu insîr sa ngai ma ung tih nin inhriat, Pathian khomin an hriat.

⁶Mi ni inpâk zong ngai ma unga, nangni’n mo mi dangin mo, mi ni inpâk khom irzûl ual ma ung.

⁷Krista tirtôn kin ni sikin mihai ta hranga intak ni tuangpui ngai khomin lân, nu’n a nâihai a indot angin nangni kin indot a ni.

⁸Khaang dôra nangni kin irngaiinnat hi, lung nangni kin thung sikin. Pathian Thurchi Sa vai ni loiin kin hringna ten khom nangni kin ipêk ngam a ni.

⁹Urênghaio, kin sin sôlzia le intakzia kha nin inhriata, nin laia tukhom kin intaktir loina hrangin a sûn a zânin sin tho’n Thurchi Sa kin insîr ngai a ni, kha te!

¹⁰Irthiang le fel le demom loi takin iamtuhai ata kin om ngai ti Pathian le nangni khom, nin hriatpuituhai nin ni.

¹¹Pa’n a nâihai chunga a itho angin nin rênga chunga kin tho ngai ti nin inhriat.

¹²A ram le a roiinpuina chang sa hranga nangni koitu Pathian mi irphuaa om hranga ngênin, inthorin, nangni kin inhriatir ngai a ni.

¹³Hi sika hin mong loiin Pathian kuang lômthu kin insîr ngai, kin thu hong insîr nin pom lai khan, mihriam thu anga pom loiin Pathian thu ngêt chu a nia, nangni iamtuhai chunga sintho ngai kha a ni.

¹⁴Urênghaio, nangni khom Judai rama Pathian koiindanghai Krista Jisuaa omhai irchutirtu nin lei nia, anni’n Judahai ata an ituang angin nangni khomin nin mihai ata nin itûng kha.

¹⁵Kha Judahai khan Rengpa Jisua le deipuhai an thata, keini khom an nin buaia Pathian inlômtir mahaia, mi dang khom irdoipui loi nei mahai.

¹⁶Saninhringna an ni theina hranga thuhril khom an ni khapa, sual chungirchuan thoa, a hnungkhôn taka chu Pathian ningmurna an chunga a itung tâk a ni.

¹⁷Urênghaio, lungrîl tiang ni loiin taksa tiang zoro i ten sûng mani ei irsena, khasikin nin hmêl hmu nôk kin irzuka, hmu tumin a sân kinibei a ni.

¹⁸Nangni hong pan kin tum ngaia, keima Paula ngêt hin voihni voithum ki tum tâka, khannisian setana’n a ni khâl ngai a ni.

¹⁹Kin sabeina mani, ki raifânna mani, ei inhnêna chôiindômna rênglukhum isong hrang hi i ma ni? Ei Rengpa Jisua a zuang tika, a makunga chu nangni ngei hi nin ini loi hrang ma ni?

²⁰Nangni hi kin roiinpuina hrang le kin raifânna hrang chu nin ini kêng.