Read Hrangkhol 1 THESALONIKA 4 Bible Online

1 THESALONIKA 4 - Hrangkhol bible

1 THESALONIKA 4

¹A mong taka chu urênghaio, Pathian inlôm lama om dân kin kuang ata nin idong ang khan nin oma, khaanga om mai hrangin Rengpa Jisua irhmingin nangni kin ngên.

²Rengpa Jisua irchamneina hmangin i thu mo nangni kin pêk nin inhriat.

³Pathianin irthiangliai hrang le irdit mapai hrangin nangni a inuam a ni.

⁴Mi tinin irthiang tak le mahripom takin mâni bêl vong thiam chit roi.

⁵Pathian inhre loi Jentailhai angin taksa irzukna lût no roi.

⁶Hi thila hin tukhomin a urêng a huangin a chunga thil saloi tho no ri se; khaanga thotuhai chunga khan Rengpa’n phuba la a tih ti nangni kin inhriattir tâk kha.

⁷Pathianin chu porinche taka om hrang ni loiin irthiang taka om hrangin a ni ikoi a ni.

⁸Khasikin, hi thu uksak loi chu mihriam a ipoisak loi ni maka, Irtha Irthiang nangni pêktu Pathian kha a ipoisak loi a ni ual.

⁹Nin kuang chu urênghai irlungthungna thu irziak nang maka, Pathianin nangni ngei lung irthung irhlôm hrangin nangni a irchu a ni.

¹⁰Khaang khan, Makedonia rama nin lei itho ngai tâk a ni. Khasikin, urênghaio, kha lungthungna kha nei nôk ual hrangin nangni ki ngên a ni.

¹¹Nangni ki lei inhril tâk ang khan, dâiriama omin, mâni sintum chit lunghnânga, mâni hnuk chu hlosuak tum seng ngai roi.

¹²Khanchu, iamnotuhaiin mahrip nangni tho an ta, tûte chunga nin irnghat khom nang no nia, ite irsam no chin ni.

¹³Urênghaio, sabeina rêng neiloi mi danghai anga nin beidong loina hrangin, a thi tâkhai thurchi nin inhriat kin inuam a ni.

¹⁴Jisua a thia, a thoi nôk ti ei iama, khaang dênin Jisua sika a thi tâkhai khom Pathianin ama leh hruai sa a ti.

¹⁵Rengpa thu’n hi hi nangni kin ihril a ni: Rengpa zuang nôk tena a hring a dama la om maihai hin, a thi tâkhai kha khêlhai thei viat no ih, iti hi.

¹⁶Rengpa ngei kha thupêk khêk irhai le, vântîrtôn roiinpui tak irhai le, Pathian bekul irhai le irvân ata zuang chum a ti, Kristaa thi tâkhai kha thoi masa an ti.

¹⁷Kha zoi hnungin chu eini hring dama la om maihai hi boiruaka Rengpa nghâk hrangin anni leh irrualin sûm laia khin lâkin om ei ta, Rengpa kuang kumkhua’n om ta ei ti.

¹⁸Khasikin, hi thuhai leh hin irtharngam lei irsak irhlôm roi.