Read Hrangkhol 1 THESALONIKA 5 Bible Online

1 THESALONIKA 5 - Hrangkhol bible

1 THESALONIKA 5

¹Aniachu, urênghaio, a zoro le a nikhua thuhai irziak pe nang mak chêi.

²Rengpa Nikhua chu zâna inru angin a itung hrang ti nangni ngeiin fel takin nin inhriat.

³“Ningbeina le zôkna,” zoroa an ti lai takin nupang nâiha ise angin voikhat rengin an chunga irhmangna zuang tung a ta, lôi thei no nihai.

⁴Urênghaio, nangni chu inthima om mak chêia, kha nikhua chu inru angin nangni de no ni.

⁵Nin rêngin ivâra mi le sûna mi nin ni. Zâna mi le inthima mi ni mak me.

⁶Khasikin mi danghai angin in no idua; har ei ta, irngaitua zui ei ti.

⁷Mi’n zâna kêng an i-in ngai, zu khom zâna kêng an inrui ngai.

⁸Eini chu sûna mi ei ni sika hin iamna le lungthungna rôppho kha innghâkin, saninhring sabeina kha lukhuma hmangin irtûng chianin om ei ti.

⁹Pathian ningmurna tuang hrang ni loiin ei Rengpa Jisua Krista zâra saninhring ni hrangin a ni inkung ual a ni.

¹⁰Ei dam khoma, ei thi khoma ama leh hmun khata ei om theina hrangin ei irthûlin a ithi a ni.

¹¹Khasikin, irtharngam irsak irhlôm roi, nin lei itho ngai angin.

¹²Urênghaio, nin ta hrangin intak taka sintuhai le hriltuhai kha inhre mai hrangin nangni kin ngên.

¹³Anni chu an sintho sika ngaisâng tak takin lungthung unglân, irngei siam siam roi.

¹⁴Khan, urênghaio, nangni ki ngên, mi thaboihai kha ngo unglân, mi beidonghai kha irtharngam sakhai unglân, mi hrât loihai changpui unglân, mi tin chunga nin lungrîl insôt roi.

¹⁵Tukhomin tu sual khom suala thuan loi hrangin irdîn unglân, itiklai khomin thil sa tho’rhlômin mi murdi chunga thil sa tho mai roi.

¹⁶Lôm mai unglân,

¹⁷mongloiin chongchai unglân,

¹⁸itinrênga lômthu hril mai roi. Hi hi Krista Jisuaa khan Pathianin nin tho hranga a inuam chu a ni.

¹⁹Irtha kha that no roi.

²⁰Thuhrilhai khom hmusit no roi.

²¹Itinrêng fia ual unglân, a sa kha pom khak unglân,

²²a saloi kha masan roi.

²³Irngeina Pathian ngêt khan nin pumin irthiangtir sianlân, ei Rengpa Jisua Krista zuang nôk tika chu nin irtha le lungrîl le nin taksa a puma sêlna boiin inomtir ri se.

²⁴Nangni a koitu chu iam a oma, tho khom tho ngêt a ti.

²⁵Urênghaio, ni chongchai pe ngai roi.

²⁶Urêng murdi kha kut chelin chubai ni mûk pe seng roi.

²⁷Hi lekha hi urêng murdi inhriata tep hrangin Rengpa irhmingin nangni ki ngên.

²⁸Ei Rengpa Jisua Krista lungkhamna kha nin kuang om ri se.