Read Hrangkhol JOSUA 10 Bible Online

JOSUA 10 - Hrangkhol bible

JOSUA 10

¹Kha lai khan Jerusalem khuaa rêng chu Adoni-zedeka a nia, Josua’n Ai khua a lâka, an siat chit thuhai, Jeriko le an rêng a ihrem ang khan Ai khua le an rêng a hrem ti thuhai a lei inhriata; Gibeon mihai khomin Israelhai leh irngeina thuthung an neia, an laia an kop sa ta tihai a lei inhriat sa nôka.

²Khasikin, Jerusalem mihaiin a sân an chia; Gibeon khua len vâng chu rêng khua liantak rêng khopui ang a ni, Ai khua nêk khomin an tama, irdoi khom an thiam tak tak a ni.

³Khasikin, Jerusalem rêng Adoni-zedeka’n Hebron rêng Hohama hai, Jarmut khuaa rêng Pirama hai, Lakis rêng Jafia hai, Eglon rêng Debira hai chu chong an thuana.

⁴“Hong unglân, Gibeon mihai hi doi ei ti, Josua le Israelhai leh hin irngeina an lei isiam zêt tâk kêng,” a tia.

⁵Amor mihai rêng ringa, Jerusalem rênghai, Hebron rênghai, Eglon rênghai chu an irruala, Gibeon khua chu an irhuala an doi tâka.

⁶Gibeon mihaiin Gilgal-a Josua kuang mi an tîra, “Ni siahlo hi ni mâksan no ro, hong inrang latin lân, ni changpui ro, ni hong inzôk ro! tâng rama omhai Amor rênghaiin ni doi hrangin an irbukkhôm zita,” an tia.

⁷Khanchu, Gilgal ata irdoi mi pasal hrâthai chu hruaiin an fe tâka.

⁸RENGPA’N Josua kuang, “Chihai no ro, anni chu nangni ki pêk ta; tûte’n nang lei danh thei no nihai.

⁹Gilgal rengata zân sôtin Gibeon dênin an fea, Amor mihai chu irningloiin an zu doi thuta.

¹⁰Amor mihai chu Israelhai mithmua khan RENGPA’N chitna’n a’rzaltirhai rupa, Gibeona khua khan Israelhaiin tamtak an thathaia, senkhat chu Beth-Horon tâng fena lam dênin a’rzûlhaia, sak tianga Azeka le Makeda dênin an zu irzûlhai pata.

¹¹Amor mihai kha an intân laiin RENGPA’N irial liantak takin an dêngtira, Azeka an tung dênin irialin a dênghaia, Israelhai ithat nêkin irial idênga thi hi an tam ual.

¹²RENGPA’N Israel mihai chu Amor mihai an hnêtir nî khan Josua’n RENGPA chu a koia, Israelhai inhriata: “Misa, Gibeon khua chunga hin inding mai ro, Tha nang khom Aijalon irhôra inding mai ro,” a tia.

¹³An râlhai chunga phuba an lâk mâka chu misa chu an ding maia, tha khom a omna khan a om ngita. Hi thu hi ‘Jasar lekhabu’ an itia khan a’rziak a ni. Vânlaizôla misa chu a ngîra, sûn khat reng chu ta loiin a om ngota.

¹⁴Khaang taka mihriam chong RENGPA’N a zôm ni sûn la om ngai ma. Om khom om nôk ta no ni. RENGPA’N Israelhai chu irdoinaa khan a doipuihaia.

¹⁵Kha zoi chu Josua le a sipaihai chu an riakbuk Gilgal-a an kîr nôk tâka.

¹⁶Amor rêng ringahai kha an intâna, Makeda khura an irbîka.

¹⁷Josua kuang, “Rêng ringahai kha kin hmu ta, Makeda khura an irbîk a ni,” an tia.

¹⁸Josua’n, “Khur mikot chu lung lianpahai leh inhruk unglân, a nghâk hrangin mi senkhat sehai roi.

¹⁹Nangni chu nin râlhai kha khêlhai unglân, an khua kula an intân lûtna hrang khâl khakhai roi, RENGPA, nin pathianin nangni a inhnêtir a ni hi,” a tia.

²⁰Josua le Israelhaiin an râlhai chu an thata, an that infâi zit ang a ni, an ithat mihlia tômte chu an khua kulhaia khan an la lût irmana.

²¹Josua riakbuk khuarna Makeda-a khan irtharngam takin hruaituhai chu an honga, Israelhai chu tûte’n a doi ngam zel om mahaia.

²²Josua’n, “Khur mikot kha inhong unglân, rêng ringa kha hong hruai suak u ta,” a tia.

²³Khanchu, Jerusalem rênghai, Hebron rênghai, Jarmut rênghai, Lakis rênghai le Eglon rênghai chu khur ata an hong hruai suakhaia.

²⁴Hi rêng ringahai hi Josua kuang an hong hruaiin chu Israel mihai chu a koi irbukhaia, a sipai hruaituhai kuang, “Hong unglân, hi rêng ringahai tukburung hi sirbê pehai roi,” a tia. An honga, an tukburung an sirbea.

²⁵Josua’n, chi viat no roi, rot khom rot no roi, hâitakin irnak song roi. RENGPA’N irdoina hmun tina hiang hin nangni a ithopui hrang a ni hi te,” a tia.

²⁶Kha zoia chu rênghai kha Josua’n a thathaia, thing panga an khâihaia; khohloi dênin an ruak chu an khâi ta.

²⁷Misa a tâkin chu an ruak kha an kaithâktirhaia, an lei irbîkna khura ngêt khan an paitirhaia, khur kotbâi chu lunglianpahai leh an inhruka, atûn ten hin a la om.

²⁸Kha nî khan Makeda khua chu Josua’n a doia, a lâka, an rêng khom a chela; kha khuaa om murdi chu a thathai zita, inkhat khom insua mah, Makeda rêng chu Jeriko rêng a ithat ang khan a thata.

²⁹Khan Josua chu Israelhai murdi le Makeda khua rengata Libna khua chu an doia:

³⁰khanchu RENGPA’N kha khua kha an lalna leh Israelhai kuta a pêk nôka, khan kha khua kha doiin a sûnga om murdihai chu khandaiin a thathai vinga; a sûnga mi inkhat khom insua viat ma, khanchu Jeriko khuaa rêng chunga a itho ang khan kha mi rêng chunga khom a thoa.

³¹Libna khua ata Josua le Israelhai chu Lakis khuaa an fea, an irhuala, an doia.

³²Israelhai kuta Lakis khua chu RENGPA’N a pêka, a sûn hni nî chu an lâk tâka. Libna khuaa an itho ang ngêt khan kha khuaa mi murdi chu a sât thathai zita.

³³Gezer khuaa rêng Horama chu Lakis khua changpui hrangin a zuanga, Josua’n ama chu a sipaihai leh a lei inhnêa, inkhat lua irhmâiloiin a lei that zita.

³⁴Josua le Israelhai chu Lakis ata Eglon khuaa an fea, an irhuala an doia.

³⁵Kha nî sûn ngêta khan an lâka, kha nî khan mi om murdi an sât tôlhaia, Lakis khuaa deng an ithei ang tak khan deng an intheitirhaia.

³⁶Josua le Israelhai chu Eglon ata Hebron khuaa an fea, an beia.

³⁷Khua chu an lâka, khataka om murdi chu an rêng leh ile a sât thathaia, a kôlvêla khuaa omhai khom a sât thathaia. Eglon khuaa a itho ang khan Hebron khom an siat zita, tûte hring damin insua mah.

³⁸Josua le Israelhai chu an kîra, Debir khua an doia.

³⁹Khua chu an lâka, an rêng chu an chela; a kôlvêla khuahai khom an lâka. A sûnga om murdi chu a sât thathai zita, Josua’n Debir khua le an rêng chu Libna khua le an rêng chunga a itho ang khan a thoa.

⁴⁰Josua’n ram chu a lâk zit tâka, tâng ramhai, nisua tianga tâng dunghai, nitâk tianga phâizôlhai, thang tianga ramhai leh a lâka, an rênghai chu an hnê zita, tûte insua mah. Israelhai Pathian RENGPA chong pêk angin a itho thei taphot chu a that zita.

⁴¹Kades-barnea rengata Gaza kongkâr ram murdi, Gosen ram khom, Gibeon dênin Josua’n a lâka.

⁴²Kha rama rêng murdi leh an ram chu, Israelhai Pathian RENGPA’N a doipuihai sikin ram kha a mûtpumin Josua’n a lâk ta a ni.

⁴³Josua le Israelhai chu an riakbuk Gilgal-a khan an kîr nôk tâka.