Read Hrangkhol JOSUA 11 Bible Online

JOSUA 11 - Hrangkhol bible

JOSUA 11

¹Hi thu hi Hazor rêng Jabina’n a lei inhriatin Madon khuaa rêng Jobaba hai, Simrona khua rênghai, Aksaf khua rêng hai,

²Hmâr tiang sim tianga rênghai, Galili dîl thang Araba khuaa rênghai, Mediteranean tuipui kôla Dor khua rêng hai,

³Nisua tiang le nitâk tianga Kanaan rêng omhai, Amor mihai rêng, Hit mihai rêng, Periz mihai rêng, tâng rama Jebus mihai rêng, Mizpa ram Hermon tâng bula Hiv mihai rênghai chu an irbukkhôma.

⁴An sipaihai leh ile an honga, tuipui kôla chiaiphoi dôrin an tama. Sakorhai, thîr sakorhai khom an hong chôi chita.

⁵Hi rênghai hi an irkop irruala, Israelhai doi hrangin Merom vadung kôla riakbuk an khuara.

⁶RENGPA’N Josua kuang, “Hi mihai hi chihai viat no ro, nangtûk hi zoro vêla hin Israelhai hrangin thathai zit ki ti, an sakorhai chu kholra’n siahai unglân, an thîr sakorhai chu hâl pehai roi,” a tia.

⁷Josua le a ihruai ngai irdoi mihai chu an irsiama, Merom vadunga khan an va doihai thuta.

⁸RENGPA’N Israelhai kuta a pêka, an doia, an that zit zoi mâka chu Misrefotmaim le Sidon dênin an irzûla, nisua tianga Mizpa irhôr dênin an irzûlhai pata.

⁹RENGPA chong pêk angin Josua’n an sakorhai chu kholra’n a siahaia, an thîr sakorhai chu a hâla.

¹⁰Josua chu a kîra, Hazor khua a lâka, an rêng chu a sât thata, (Kha laia khan Hazor khua hi kho lian ual tak a lei ni.)

¹¹Khuaa mi murdi chu a sât that zita; tûte damin insua mah. Hazor khua chu a hâla,

¹²Josua’n hi khua murdi hi a lâk zita, an rênghai khom a chela, RENGPA siahlo Mosia thu ang khan a thathai zêla.

¹³Hazor khua, Josua ihâl ti no chu, Israelhaiin an khua insiata in la indinghai chu hâl mahai.

¹⁴Hi khuaa an râllâk sumpuan le insûng sa chu Israelhaiin mâni ta angin an neia, mihriam rêk chu an sât that zita; an itho thei taphot chu a hringa an irhmâi tûte om mah.

¹⁵A siahlo Mosia kuang RENGPA’N thu a pêka, Mosia’n khaang ngêtin Josua chu thu a pêka; khaang tak khan Josua’n a thoa. RENGPA’N Mosia kuang thu a ipêk murdi chu tho loi rêng rêng nei mah.

¹⁶Josua’n ram murdi chu a lâka, Negeb le tâng ramhai, Gosen ram phâihai, tângdung phâituanhai, Jordan irhôrhai, Israel tâng ramhai, a vêl tâng bul phâituanhai a lâk zita.

¹⁷A ram lâk sim tianga Helak tâng, Seir bul ata sak tiang Baalgad, Lebanon irhôr Hermon tâng bul a dêna; an rênghai chu an hnêa, a chela, a thata.

¹⁸Josua le hi rêng murdihai hi zoro sôttak an irdoi a ni.

¹⁹Gibeon khuaa om Hiv mihai ti no chu Israelhai leh irngeina siam inkhat lua om ma, ilâkin an lâk zit a ni.

²⁰RENGPA’N Israelhai indoitir hrangin hi mihai hi an lungrîl an ngartir pehaia; Mosia kuanga RENGPA thupêk angin inrenna nei viat loiin thatirhmanghai zit hranga lei ti a ni tâk.

²¹Josua chu a fe zêla, tâng rama Hebron khuahai, Debir khuahai, Anab khua hai, milian Anak an ti la omhai chu a that zita. Judai le Israel tâng rama omhai khom, an rêngin an khuahai khom a hâl inram zita.

²²Israel mihai ram chu milian rêng om ta mahai, Gaza khua hai, Gath khua hai, Asdod khua hai vai an la om pher phora.

²³Mosia kuanga RENGPA thupêk angin Josua’n ram a lâka a lâk zit hnungin an ram irchon hrangin Israelhai chu a nam namin a sem tâka. Khanchu kha rama khan irdoina om ta mah.