Read Hrangkhol JOSUA 16 Bible Online

JOSUA 16 - Hrangkhol bible

JOSUA 16

¹Josefa irchihai ram dongtum, sim tianga ramri chu Jordan vadung rengata Jeriko tui suaknahai bula a’rphuta, Jeriko ata fe patin tâng dung chunga a tungin a fea, ramchâr fe thalin Bethel dênin a fe pata.

²Khan, Bethel ata Luz khua dênin Ark-hai omna Atarot-a a fea.

³Nitâk tiang panin Jafleta-hai omna ram a fe irkâna, Beth-Horon hnuaia a fe pata. Gezer-a fe patin Mediteranean tuipui a suna.

⁴Josefa irchihai, Efraima le Manasea irchihaiin hi ram hi an ram irchon hrangin an chang a ni.

⁵Efraima irchihai, an insûngkua kuain an irsem hranga an dongtum hmâr tianga ramri chu hi hi a ni: Nisuana tianga om Astarot-Adar le Beth-Horon kâra a ni.

⁶Hmâr tianga mongna khua Mikmethat ata nisuana tiang panin ramri chu Tanat-silo tiang a fea, Janoa khuahai, Atarot khuahai, Naara khuahaia a fea, Jeriko a suna, Jordan dung a dêna.

⁷Khan Jona ata kha Atarot le Naara tiang a chum nôka Jeriko sunin Jordan-a a zu monga.

⁸Nitâk tiang Mikmethat khua ata Tapua khua, Kana dunga suakin ivadung chu a zuia, Mediteranean tuipui a zu dêna, kha ramri sûnga ram chu Efraima irchihaiin an insûngkua kua’n irsem hranga an dongtum ram chu a ni.

⁹Manasea irchihai ram dongtum lai ata Efraimahai chu khopui senkhat, an kôlvêla khuahai leh khan an pêk saa.

¹⁰Gezer khuaa om, Kanaan mihai chu inhnotsuak mahai, atûn ten hin kha Kanaan mihai chu Efraima-hai laia an la oma, sinthoa an siahlo ni hrangin an om tâk a ni.