Read Hrangkhol JOSUA 18 Bible Online

JOSUA 18 - Hrangkhol bible

JOSUA 18

¹Israel mihai chu Silo-ah an irbukkhôma, RENGPA omna biakbuk puanzâr kha an zâra, ram chu an lâk tâka.

²Israel laia nam sari ram dongtum la pehai loi an oma.

³Josua’n an kuang, “RENGPA, nin pahai Pathianin ram a ipêk tâk hi va lua hrangin idôr mo nin la inghâk?

⁴Nam tinin mi pasal thum inthangsuak unglân, anni chu ram va’rfangsuak hrangin tîrhai ki ta; nam tin changtum hrang inkunghai sianlân, ki kuang hong intung nôk ri sehai.

⁵Ram chu hmun sari’n thêr ni sianlân, Juda le Josefa irchihai chu an idongtum ram sûnga khan om an ti.

⁶Ram hmun saria irsen dân hrang chu irziak an ta, hong chôi an ta, keiin RENGPA ei Pathian kuanga tasân pehai ki ti.

⁷Levia irchihai hrang chu sem no roi, RENGPA Ochai an inina hi an changtum hrang chu a ni. Reubena hai Gada hai le Manasea irchi chimriphai lakin Jordan nisua tianga Pathian siahlo Mosia khan an dongtum hrang chu a pêk tâk kha,” a tia.

⁸Josua ihril ang taka tho hrangin mihai chu an fe suaka, an kuang, “Ram pumpui irfangsuak unglân, irsinsia zit roi; ki kuang nin hong ikîr nôk hrang a ni. Keiin hitaka Silo khuaa hin RENGPA kuanga tasân pehai ki ti,” a tia.

⁹Khan, kha mihai kha an suaka, ram chu an irfang zita, khopui omhai chu irsia zitin hmun sari’n an sema, an irziaka. Silo khuaa an riak hmuna Josua kuanga an irziakna lekhabu chu an hong chôia.

¹⁰Silo khuaa khan Josua’n RENGPA kuanga tâ a sâna, Israel mihai chu a nam namin ram chu a sem tâka.

¹¹Benjamina irchihai ram dongtum, an insûngkua kuaa irsem hrang chu inkung masa tak a nia, Juda le Josefa irchihai kâra an om tâka.

¹²Hmâr tianga an ramri chu Jordan vadung rengata Jeriko sîra tâng panga a fe zêla; nitâk tiang panin Bethaven ramchâr a tunga.

¹³Luz khua (Bethel an ti sa ngai) a fe zêla, sim tiang panin a fea, Atarot-adar, Beth-Horon tâng dung hnuaia khua chu a dêna.

¹⁴Ramri chu nitâk tianga tâng dung rengata sim tiang panin a kôia, Kiriath-baal khua, Kiriath-jearim an ti sa ngai chu a dêna; hi khua hi Juda irchihai khopui a ni. Hi hi nitâk tianga ramri chu a ni.

¹⁵Sim tianga ramri chu Kiriath-jearim rengata a’rphuta, nisua tiang panin Nefto tuikhura a fea.

¹⁶Hinom-a suak tâng dunga fein Refaim phâi lûtnaa khan a suna, Hinom irhôr a pana, Jebus-hai khua sim tiang panin a fea, Enrogel a dêna.

¹⁷Ramri chu hmâr tiang a kôia, En-semes a dêna, Adumin hong fena sîra Gilot khuaa a fea, Bohana lunga (Bohana chu Reubena nâipa a ni) a fe zêla.

¹⁸Jordan dung sîra tâng hmâr tianga fe’n irhôra a fe thala,

¹⁹Beth Hogla tâng dung hmâr tiang a fe zêla, Jordan dung suakna Tuipui Thia a fe lût a ni.

²⁰Jordan chu nisua tiang rama ramri mongna a ni. Hi hi Benjamina irchihai insûngkua tina ram changtum hrang ramri chu a ni.

²¹Benjamina irchi, an insûngkua kuaa izir ang zêla khua an irsem chu hi hi a ni: Jeriko, Beth-Hogla, Emek-keziz;

²²Beth-Araba, Zemaraim, Bethel;

²³Avim, Para, Ofra;

²⁴Kefaramoni, Ofni, Geba le an kôlvêla khua omhai leh khopui sômhleihni a ni.

²⁵Gibeon hai, Rama hai, Beerot hai,

²⁶Mizpa hai, Kafira hai, Moza hai,

²⁷Rekem hai, Irpeel hai, Tarala hai,

²⁸Zela Haelef hai, Jebus hai (Jerusalem an ti sa), Gibea hai, Kiriath-jearim hai, an kôlvêla khua omhai leh khopui sômkhat minli a ni. Hi hi Benjamina irchi insûngkua tina dongtum khuahai chu a ni.