Read Hrangkhol JOSUA 19 Bible Online

JOSUA 19 - Hrangkhol bible

JOSUA 19

¹Tasân voihnina chu Simeona irchihaiin, an insûngkua an insûngkua’n ram irsem hrangin, an changa. An ram dongtum chu Juda irchihai ram chang sûnga a ni.

²Hi khuahai hi a huam: Beerseba, Seba, Molada;

³Hazar-sual, Bala, Ezem;

⁴Eltolad, Bethul, Horma;

⁵Ziklag, Beth-Markabot, Hazar-Susa;

⁶Beth-Lebaot, Saruhen, an kôlvêla khuahai leh ile, khopui sômkhat inthum a ni.

⁷Hi khuahai khom hi a kop: Ain, Rimon, Esther, Asan le a kôlvêla khopui minli a ni.

⁸Hi hin a kôlvêla khua Baalath Beer (Rama an ti ngai) sim tiang dênin a huam a ni. Simeona irchihaiin hi lai ram hi an dongtum hrang piala inkung a ni.

⁹Juda irchihaiin an innang nêka lian ual ram an nei sikin an ram senkhat chu Simeona irchihai kuang ipêk a ni.

¹⁰Tasân voithumna chu Zebulun irchihai chunga an insûngkua kuaa irsem hrang ram chu an changa, sim tiang a mongna taka Sarid khua a oma.

¹¹Kha rengata nitâk tianga Marala a pana, Debeset va tônin Jokneam nisua tianga tuidunga a suaka.

¹²Sarid nisua tianga Kisloth-tabor ramri a hong suna, Daberat-ah a fe patin ramri Jafia tiang a fea.

¹³A suk tiang fe’n Gath Hefer-a a fe zêla, Ethkazin fe patin Rimon tianga Nea panin a’rkuala.

¹⁴Hmâr tiang panin ramri chu Hanathon tiang a fea, Iftahel irhôra a mong a ni.

¹⁵Kata hai, Nahalal hai, Simrona hai, Idala hai, Bethlehem hai a kôlvêl khuahai leh khopui sômkhat inhni a huam sa a ni.

¹⁶Zebulun-hai chu dongtum rama khan hi khopuihai le a kôlvêl khuahai hi a iom a ni.

¹⁷Tasân voiminlina chu Isakara irchihai chunga an insûngkua kuaa irsem hrangin a chuma.

¹⁸Hihai hi an ram sûnga ihuam chu a ni: Jezreel, Kesulot, Sunem;

¹⁹Haferaim, Sion, Anaharat,

²⁰Rabit, Kision, Ebez;

²¹Remet, En-ganim, Enhada le Beth-pazzez.

²²An ramri chu Tabor tânga a fe thala, Sahazumai le Bet-semes fe patin Jordan a dêna, khopui sômkhat kiruk, an kôl vêla khuahai leh a huama.

²³Isakara irchihaiin an insûngkua tin irsem hrangin khi khopuihai le an kôl vêla khuahai leh ile an ichang a ni.

²⁴Tasân voiringana chu Asera irchihai chunga an insûngkua kuaa ram irsem hrangin a chuma.

²⁵An ram ihuam kai chu hi hi a ni: Helkat, Hali, Beten, Aksaf;

²⁶Alam Melek, Amad, Misal. Nitâk tianga an ramri, Karmel le Sihor Libnat a zu tunga,

²⁷Misa suakna tiang ramri chu a kôia, Bethdagon fe patin Zebulun ram a suna, Iftahel irhôra a lûta, hmâr tiang panin Bethemek le Neiel tiang a pana, Kabul a dêna.

²⁸Ebron hai, Rehoba hai, Hamon hai, Kana haia a fea, Sidon khopui a suna.

²⁹Khan ramri chu a’rkuala, Rama le Tura khopui kul a suna, Hosa-a a kôia, Mediteranean tuipuia a monga, Mahalab hai, Akzib hai,

³⁰Uma hai, Afek hai, Rehob hai a huama, an kôl vêla khuahai leh ile khopui sômhni inhni a ni.

³¹Hi khopuihai le an kôl vêla khuahai hi Asera irchihaiin insûngkua tin irsem hranga an ram dong chu a ni.

³²Tasân voirukna chu Naftalia irchihai chunga an insûngkua kuaa irsem hrangin a chuma.

³³Hmâr tianga ramri chu Helef-ah a’rphuta, nisua tianga Elon-Bazananim fe thengin Adamainekeb-ah a fea, Jabneel lûtin Lakum a dêna, Jordan-ah a monga.

³⁴Nitâk tiang panin Aznot-tabor-ah a fea, Hukok a dêna, sim tianga Zebulun dênin a fea, Asera-hai ram a va suna. Nisua tianga Jordan, nitâk tianga Asera-hai ram le ri an irchôi a ni.

³⁵Kul nei khuahai chu: Zidim, Zer, Hamath, Rakat, Kinereth;

³⁶Adama, Rama, Hazor,

³⁷Kedes, Edrei, Enhazor,

³⁸Iron, Migdalel, Horem, Bethanat, le Beth-Semes, an kôl vêla khuahai leh ile khopui sômkhat kuak a huam saa.

³⁹Hi khopuihai le an kôl vêla khuahai hi Naftalia irchihai insûngkua tin irsem hranga an ichang a ni.

⁴⁰Tasân voisarina chu Dana irchihai chunga an insûngkua kuaa irsem hrangin a chuma.

⁴¹An ramin hi khuahai hi a huam: Zora, Estaol, Irsemes;

⁴²Saalabin, Aijalon, Ithla;

⁴³Elon, Timna, Ekron;

⁴⁴Elteke, Gibethon, Baalath;

⁴⁵Jehud, Beneberaka, Gath-rimon;

⁴⁶Mejarkon, Rakon le Jopa khua vêl ramhai.

⁴⁷Dana irchihai hi an râlhaiin an ram an lâk pehaia, Lus khuaa an fea; an hong doia, an lâka, mihai chu an thata; khan kha ram kha anni’n an nei tâk a ni. A khua irhming hi an irchibul tianga irhming chôiin Dan an tia.

⁴⁸Hi khopui le khuahai hi a ni Dana irchihaiin an sûngkua ang dungzuia an irchon hranga ram an idong sûnga omhai chu.

⁴⁹Ram an irsem zoi zitin chu, Israel mihaiin Nuna nâipa Josua chu a binga hrangin ram an pêka.

⁵⁰RENGPA thupêk angin ama indita inthang tak Timnat-sera khua an pêka. Efraima tâng rama om a ni; khua chu an ding inthara, kha khan a om tâka.

⁵¹Ochai Eleazara hai, Nuna nâipa Josua hai le Israel nam hruaituhaiin hi ramhai hi tasânin Silo khuaa khan biakbuk puan in mikot bula an sem infel tâka.