Read Hrangkhol JOSUA 2 Bible Online

JOSUA 2 - Hrangkhol bible

JOSUA 2

¹Nuna nâipa Josua’n Sitim ram ata va envêl hrangin mi inhni a tîra, “Ram chu inrûkin va envêl u ta, Jeriko khua kha chu va en infel ual roi duah,” a tia. Khua an va tungin chu riak tumin notizuar Rahabi in an pana.

²Jeriko rêngin, Israelhai itîr envêltuhai chu kha nî zâna khan an hong tung ti a lei inhriatin,

³Rahabi kuang, “Ni ina hong tunghai kha ram envêl hranga hong an ni, hong hruaihai ro,” ti hrangin mi a tîra.

⁴Kha nu khan mikhual inhnihai chu a hruaia, a thuphaia, “Mi inhni chu an hong tung ngeia, kho tianga mi mo an inih ti inhre viat ma ung.

⁵Zân a zîng vâng vângin, kul mikot an khâr mân viat khan an suak nôk tâk a ni; kho tiang mo an ife hrang ti inhre ma ung; irzûlhai zel unglân, la zu chel irmanhai nin ti,” a tia.

⁶Kha mihai kha in chunga a hruaihaia, Nâniang kung irbukkhômna kâra khan a thup inrûkhai a ni.

⁷Rêngin mi a itîrhai chu Israelhai irzûl hrangin an intân suaka, kul mikotpui chu an khâr nôka, Jordan dung dênin an irzûlhaia.

⁸An zâl mânin Rahabi chu in chunga a luia,

⁹an kuang, “RENGPA’N ram hi nangni a pêk tâk ti kin hriat.

¹⁰Aigupta ram ata nin hong suak khan RENGPA’N nin matona Tuipui Sen kha nangni an kangtir pea, Jordan dung râla Amor-hai rêng inhni Sihona le Oga nin ithathai khom kha kin inhriata.

¹¹Kha kha kin inhriatin kin rot zoia, nangni chi sikin mi tin mumal nei loiin kin om ta. Nin Pathian RENGPA hi vân chung le hnuaia roirêltu a ni.

¹²Nin chunga sin sa ki itho ang takin, ki insûngkua chunga sin sa tho hrangin Pathian irhming sâmin chonginkung unglân, kha thil inhriatna hrangin irsinsiana ni pe roi duah.

¹³Ka pahai, ka nuhai, ki nuchahai le ki urênghai, kin sûngkuain nin zôk unglân, ni that loi hrangin chonginkung roi duah,” a tia.

¹⁴Kha mihai khan nupangnu kuang, “Kin hril tum hi kin ti no’n chu Pathianin kin hringna hi la ri se! kin hong lam hi tûte nin hril no’n chu, ram hi RENGPA’N a ni pêk tika, satakin ni chunga tho kin ti,” an tia.

¹⁵Rahabi in hi khopui kulbang irnghata om a nia, tukver ata anni chu hruihrualin an thâkhaia.

¹⁶Khan ama’n, “Tâng tiang nin fe no’n chu nin râlhaiin nangni hmu an ti, sûn thum irbîk unglân, nin râl nangni irzûltuhai an hong kîr nôk tika, nin nuam nuamna fe ta nin ti,” a tia.

¹⁷Kha mihai khan, “Ni iti anga tho hrangin chonginkung kin ti, hiang hin ni ti no’n chu keini’n mophur no ni ung.

¹⁸Irngai roh, hi ram kin hong lût tika, hi pat sen hi ni ni inthâkna tukvera khan khit ro. Ni pahai, ni nuhai, ni nuchahai le ni pa insûng mihai kha ni ina koikhômhaiin lân;

¹⁹kholaia tukhom suak no ri sehai, a suak an omin an thisen mô chu anni’n pêl an ti.

²⁰Kin chong hi mi tukhom ni inhril hrang ni ma, nin hrilin chu keini khomin chong ni ni inkungtir ang kha ti no ni ung,” an tia.

²¹Rahabi’n, “Nin thu ang khan ni ri se,” a tia. An fetirhaia, an suak tâka. Pat sen chu tukvera khan a khit tâka.

²²Tâng tianga khan an fea, sûn thum an irbîka. An râlhaiin sûn thum an hong zong vêla, aniachu hmu mahai.

²³Kha mi inhnihai kha tâng ram ata an suaka, tuidung an irkâna, Josua kuang an tunga, an thil va tok murdi chu an hrila.

²⁴Josua kuang khan, “RENGPA’N ram pumpui chu a ni pêk ngêt a ni ta, kha rama mi omhai chu eini ni chi’n, an rot thiai ta,” an tia.