Read Hrangkhol JOSUA 21 Bible Online

JOSUA 21 - Hrangkhol bible

JOSUA 21

¹Levi irchi hruaituhai chu Ochai Eleazara hai Nuna nâipa Josua hai le Israel nam hruaituhai kuanga,

²Kanaan rama Silo khuaa khan an va fea, “RENGPA’N kin omna hrang, khopuihai le a kôl vêla insûng sahai lêngna hranga ram ôl pe hrangin Mosia a inhril kha,” an hong tia.

³Khanchu, Israel mihaiin an ram chang sai sûnga hin hi khopuihai le a kôl vêla ram ôl insûng sa lêngna hrangin RENGPA chong angin Levi irchihai chu an pêka.

⁴Levi irchihai laia Kohatha irchihai chu khopui an sem masataka, Arona irchi ochaihai chu Juda irchihai, Simeona irchihai le Benjamina irchihai ram dongtum sûng ata khopui sômkhat inthum an pêka.

⁵Kohatha irchihai chu Efraima hai, Dan hai leh nitâk tianga Manasea irchi chimriphai ram sûng ata khopui sômkhat an pêka.

⁶Gersona irchihai chu Isakara hai, Naftalia hai, nitâk tianga Manasea hai ram dongtum sûng ata khopui sômkhat inthum an pêka.

⁷Meraria irchihai chu Reubena hai, Gada hai le Zebulun ram sûng ata khopui sômkhat inhni an pêka.

⁸Mosia kuanga RENGPA thupêk angin Israel mihaiin tasânin hi khuahai le an kôl vêla ram ôl, insûng sa lêngna hranga ram leh ile Levi irchihai chu an pêka.

⁹Juda le Manasea irchihai ram sûng ata hi khopuihai hi,

¹⁰Levia irchi Kohatha panam Arona irchihai kuanga an pêk chu a ni, anni hi khua an sema, a dong masatak an ni.

¹¹Juda rama tâng ram khopui Anaka pa, Arba khua, Hebron an ti ngai le a kôl vêla ram ôlhai leh ile an pêka.

¹²Khopui sîr vêl le a kôl vêla khuahai chu Jefunea nâipa Kaleba kuang pêk a lei ni tâk kha.

¹³Khan zôkna hranga khua inkung Hebron khua bâka hi khopuihai hi ochai Arona irchihai ta hranga pêk a ni: Libna,

¹⁴Jatir, Estemoa,

¹⁵Holon, Debir,

¹⁶Ain, Juta, Beth-Semes, an kôl vêla ram ôlhai leh ile Juda le Simeona irchihai ram chang sûng ata khopui kuak an pêka.

¹⁷Benjamina ram sûng ata hi khopui minlihai hi an pêk sa: Gibeon, Geba,

¹⁸Anathot, Almond, le an kôl vêla ram ôlhai.

¹⁹An rêngin khopui sômkhat inthum, an kôl vêla ram ôl, insûng sa lêngna hmun hrang leh ile ochai Arona irchihai chu an pêka.

²⁰Levia nâipa Kohatha irchi danghai kuanga Efraimahai ram ata khua senkhat an pêk saa.

²¹Khopui minli an pêk, zôkna hranga inkung Efraima tâng rama khopui Sekem hai, Gezer hai,

²²Kibzaim hai, Beth Horon hai le a kôl vêla ram ôlhai a ni.

²³Dan ram sûng ata khua minli an pêk sa: Elteke hai, Gibethon hai,

²⁴Aijalon hai, Gath-rimon hai le an kôl vêla ram ôlhai a ni.

²⁵Nitâk tianga om Manasea irchihai ram sûng ata khopui inhni an pêk, Taanak le Gath-rimon, an kôl vêla ram ôlhai a ni.

²⁶Kohatha irchi danghai kuanga hi khua sômhai le an kôl vêla ram ôl, insûng sa lêngna hmun hranghai leh ile an pêka.

²⁷Levia nam senkhat, Gersona irchihai chu nisua tiang Manasea irchihai ram sûnga khopui inhni an pêka; zôkna hranga inkung Basan biala Golan le Beestera an kôl vêla ram ôl, insûng sa lêngna hranga ram hoi pêk an ni.

²⁸Isakara irchihai ram sûng ata khopui minli: Kision, Daberet,

²⁹Jarmut, En-ganim hai le an kôl vêla ram ôl insûng sa lêngna hmun hranga ram leh ile an pêka.

³⁰Asera-hai ram sûng ata khopui minli: Misal, Abdona,

³¹Helkat, Rehob le an kôl vêla ram ôl insûng sa omna hrang leh ile an pêka.

³²Naftalihai ram sûng ata khopui inthum, zôkna hranga inkung Galili rama Kedes, Hamoth Dor, Kartan le a kôl vêla ram ôl insûng sa lêngna hranga hmun leh ile an pêka.

³³Gersona irchi insûngkua mihaiin khopui sômkhat inthum le an kôl vêla ram ôl insûng sa lêngna hmun hrang leh ile an chang a ni.

³⁴Levi irchia mi la omhai, Meraria irchihai chu Zebulun-hai ram sûng ata khopui minli Jokneam, Karta,

³⁵Dimna, Nahalal le an kôl vêla ram ôl insûng sa lêngna hmun hrang leh ile an pêka.

³⁶Reubena-hai ram sûng ata khopui minli: Bezer, Jahaz,

³⁷Kedemot, Mefaat le an kôl vêla ram ôl insûng sa lêngna hmun hrang leh ile an pêka.

³⁸Gad-hai ram sûng ata khopui minli zôkna hranga inkung Gilead biala Ramot, Mahanaim,

³⁹Hesbon, Jazer le an kôl vêla ram ôl insûng sa lêngna hmun hrang leh ile an pêka.

⁴⁰Khanchu, Mararia irchihai chu a rêngin khopui sômkhat inhni an pêkhai a ni.

⁴¹Israel mihai ram sûnga Levi irchihai khopui hranga inkung sai chu khua sômminli kiriat a ni, an kôl vêla ram ôl insûng sa lêngna hmun hrang leh ile pêk an ni.

⁴²RENGPA’N an irchibul pi le pu kuanga ram pêk a inkung tâk ram murdi chu Israel mihai kuanga a pêk ta. An lâk zoiin chu an lua tâka.

⁴³An irchibul pi le puhai kuanga pêk a lei inkung sai tâk ram chu RENGPA’N Israelhai chu a pêk tâka. An lâk zoiin chu om hmun an khuar tâka.

⁴⁴RENGPA’N a lei inkung diam tâk angin ram pumpui chu irngeina a inlêngtira. An râlhai inkhat lua’n inhnê mahai, RENGPA’N an hnêtir zit ngai a ni.

⁴⁵Israelhai kuanga chong a inkung tâk sai rêng rêng chu RENGPA’N a tho pe zit ngai a ni.