Read Hrangkhol JOSUA 23 Bible Online

JOSUA 23 - Hrangkhol bible

JOSUA 23

¹RENGPA’N Israelhai chu an râlhai ata zoro sôttak sûnghualin an omtirhai hnungin Josua chu a kum a tamin a tar tâka.

²Khanchu, Israel mi murdi upahai, hruaituhai, roirêltuhai le ulianhai chu a koi bûmhaia, an kuang, “Atûn hin chu a sân ki tar tâka.

³nangni sikin hi namhai chunga nin Pathian RENGPA sinthohai nin hmua; RENGPA nin Pathian chu nin râlhai nangni doi petu a ni.

⁴Kin inhnê tâkhai nam omna ram le kin la inhnê loihai omna ram chu nin irchon hrangin ki sem infel zit tâk a ni; nisua tianga Jordan dung ata nitâk tianga Mediteranean tuipui dênin sem a ni.

⁵RENGPA nin Pathianin nin matona lei inhnotsuakhai zit a ta, nin hmu phâk loina hmuna inhnotsuakhai a ti; RENGPA nin Pathianin a inkung sai tâk angin an ram chu neipai pehai nin ti.

⁶Khasikin, Mosia dân lekhabua irziak murdi irdîn takin zôm tum ngit unglân, inkhat lua irhmâi no roi.

⁷Nin laia nam dang la om leh hin irpôl no roi; an pathianhai hi koi no roi, an irhming sâmin chong inkung no roi, chubai mûkin an makunga kûn viat no roi.

⁸RENGPA chu iamom takin atûn ten nin kop indet ang hin kop indet khak roi.

⁹Nam lian tamtak le hrâttak takhai nin maton zela RENGPA’N an hnotsuak zêla, tûte’n lei khâl thei om mahai.

¹⁰A chonginkung angin RENGPA nin Pathianin nin râlhai nangni a doi pe sikin nin laia mi inkhat lua khom sâng têlin an irzûl a ni kha.

¹¹RENGPA nin Pathian chu lungthung ngei ngei unglân.

¹²Nin irheisana, nin laia nam dang la omhai leh nin irpôlkhôma, nin irneipolin chu,

¹³RENGPA nin Pathianin hi namhai hi nin maton zela inhnotsuak viat no ni. RENGPA nin Pathianin hi ram satak nangni a pêk ata nin irhmang zit mâka chu nin hrangin châng mani châng khur ichiom mani ni an ti, hruihruala vîk mani mita ilhling isun mani an ini hrang ti inhre roi.

¹⁴“Irngai roi, atûn chu, ki thi zoro anai ta. Tukhomin takirtâi takin a sûtin chu RENGPA nin Pathianin thil sa a inkung sai tâk murdi kha nangni a pêk ti inhre roi. A chonginkung ang takin a tho zêla, inkhat lua irhmâi nei mah.

¹⁵RENGPA nin Pathianin thil sa pêk hranga a inkung chu a tho ngai angin thil saloi a inkunga khom a tho ngai.

¹⁶RENGPA nin Pathianin zôm hranga a iti, a thuthung kha nin insiata, Pathian dang nin pana, a sin nin zongin chu, RENGPA nin chunga a ninginmur a ta, ram satak nangni a ipêk rengata irhmang zit nin ti,” a tia.