Read Hrangkhol JOSUA 3 Bible Online

JOSUA 3 - Hrangkhol bible

JOSUA 3

¹A tûka Josua le Israelhai chu zînga an thoia, Sitim zôl ata Jordan dung kôla an irsona, ivadung an irkân mânin an riaka.

²Sûn thum pêna chu hruaituhaiin an riakna buk chu an irfanga,

³“RENGPA nin Pathian Thuthung Bôm kha ochaihaiin an irzôn nin hmu tena chu, nin omna hmun ata irson unglân, zui zêl roi.

⁴Nin fena ngai loina hmuna fe hrang nin nia, an hnung nin izui zêl hrang a ni. Aniachu, thuthung bôm kha nâi hrai no roi, mêl khat vêl nin kâra irhla ni ri se,” an tia.

⁵Josua’n mipuihai kuang, “Irthiang roi, nangtûk hin RENGPA’N ei laia sinirkhêl tak a itho hrang kêng,” a tia.

⁶Josua’n ochaihai kuang, “Thuthung Bôm chu irzôn unglân, fe masa roi,” a tia. Khanchu, Thuthung Bôm kha an irzôna, mipuihai matona fein mâ an hruai tâka.

⁷RENGPA’N Josua kuang, “A vuan hin Israelhai mithmua nang chôiirsâng ki ti, Mosia kuanga ki iom ang khan ni kuanga khom ki om mai, ti lei inhriat an ti.

⁸Khan thuthung bôm irzôntu ochai chu Jordan vadung pang nin tungin chu ngîr mai ri sehai, tiin thu pe ro,” a tia.

⁹Josua’n Israel mihai kuang, “Hong unglân, RENGPA nin Pathian thu hi irngai roi,” a tia.

¹⁰Josua’n, “Pathian hring chu nin laia a oma, nin matona Kanaan mihai, Periz mihai, Girgas mihai, Amor mihai, Jebus mihai hi an hnotsuak ngêt hrang a nih ti inhre ngêt nin ti.

¹¹Jordan vadunga nangni hruaiin rammual pumpuia RENGPA thuthung bôm chu fe masa a ti.

¹²Israel nam tin laia, mi sômkhat inhni inthang suak unglân,

¹³rammual pumpui RENGPA thuthung bôm irzôntu ochaihai kezapha Jordan tuidung an sir laiin, Jordan vadunga tui luang chu chat a ta, sak tiang ata tui hong luang murdi chu hmun khata irchunkhôm a ti,” a tia.

¹⁴Mipuihai chu Jordan tuidung kâi hrangin an puan in ata an suaka; thuthung bôm irzôntu ochaihai chu an fe masaa.

¹⁵Kha lai khan bu ât zoro a nia, Jordan vadung lian lai a nia, a kuang kha tui a sip mata. Thuthung bôm irzôntuhaiin Jordan tuidung an va sirin chu,

¹⁶sak tiang ata tui zuang luang chu a chata, a hnâr tianga Zarethan bul Adama khopui dênin tui chu irbukkhômin a’rngama. Araba tianga tuipui thia luang lût ngai chu a kanga, a chat zita; mipuihai chu Jeriko khua kôl irdîn taka khan an irkân kâi tâka.

¹⁷Israel mihai chu an rêngin irnêng châra Jordan vadung chu an irkâna; thuthung bôm irzôntuhai chu li laia khan irnêng châra mipuihai kâi zoi mâka chu an indinga.