Read Hrangkhol JOSUA 4 Bible Online

JOSUA 4 - Hrangkhol bible

JOSUA 4

¹Nam pumpui Jordan dung an kâi zit hnunga chu RENGPA’N Josua kuang,

²“Israel nam tin laia an inthangsuak mi sômkhat inhnihai khan,

³Jordan dunga Ochaihai indingna tak ata lung sômkhat inhni, inkhat zêlin irputhai sianlân, a vuan zâna nin riakna hrang hmuna sia ri sehai,” a tia.

⁴Josua’n nam tin ata Israel mihaiin an inthangsuak mi sômkhat inhni chu a koihaia,

⁵an kuang, “RENGPA nin Pathian thuthung bôm chu va khêlin, lung inkhat zêlin, an rêngin Israel nam zât, Jordan dung laitak ata nin dâra irput unglân,

⁶kha lung kha RENGPA sintho inhriatmaina hrang a ni. Nakana nin nâihaiin, ‘Hi lunghai hi itina mani an ti tena,

⁷‘RENGPA thuthung bômin Jordan tuidung a kâi lai khan Jordan tui luang chu a chata, hi lunghai hi Israel irchihaiin kumkhuaa an inhriatmaina hrang a ni hi,’ la ti nin ti,” a tia.

⁸Josua thu angin Israelhaiin an thoa, RENGPA’N Josua kuanga a ihril ang tak khan, Israelhai nam Jordan laitaka lung sômkhat inhni chu an lâka, an riakna hmuna khan an irput zêla, kha khan an siaa.

⁹Josua’n thuthung bôm irzôntuhai ngîrna Jordan vadung lai taka khan, lung sômkhat inhni a phun saa, kha kha atûn ten hin a la om mai.

¹⁰Mosia’n Josua kuang thu a lei ipêk tâk murdi anga, RENGPA’N mipuihai kuanga ti hranga, Josua thu a ipêk kha an ti zoi mâka chu ochai thuthung bôm irzôntuhai chu Jordan vadung laia khan an inding maia, khanchu mipuihai kha inrang takin an irkân tâka.

¹¹An kâi zit hnunga RENGPA Thuthung Bôm irzôntu ochaihai chu mipui matona an fe tâka.

¹²Reubena namhai, Gada namhai le Manasea nam chimriphaiin râlthuam chôiin, Mosia kuanga thupêk ang khan, mipui matona mâ hruaiin an kâia.

¹³RENGPA kôla irdoi irsiam sai rêng mi sîng minli’n Jeriko kôl zôl an va tung tâka.

¹⁴Kha laia khan Israel murdi mithmua RENGPA’N Josua chu a chôiirsânga, a dam sûng chu Mosia ang takin a’rngaiirsânga.

¹⁵RENGPA’N Josua kuang,

¹⁶“Thuthung bôm irzôntu ochaihai kha Jordan vadung ata hong suak ri sehai,” a tia.

¹⁷Josua’n ochaihai kuang, “Jordan dung ata kha hong suak roi,” a tia.

¹⁸RENGPA thuthung bôm irzôntuhai Jordan dung ata an hong suaka, ivadung pang an sirin chu Jordan tui chu a luang nôk zut zut tâka, matona ang dênin ivadung chu a sip nôk tâka.

¹⁹Jordan tuidung chu tha khatna tarik sôm ni khan an irkân a ni. Jeriko sak tiang ramri kôl Gilgal-a omhmun an siam tâka.

²⁰Jordan dung ata an lung lâk sômkhat inhni Josua’n Gilgal-a khan a phuna.

²¹Israel mihai kuang, “Nakana nin nâihaiin an pahai kuang, ‘Hi lunghai hi i thôna ma ni? tia an irdonhai tena,

²²‘Hi zoroa hin Israelhaiin irnêng châra Jordan tuidung an irkân a ni’ tiin nin irchihai chu lan hriattirhai nin ti.

²³RENGPA’N Tuipui Sen kin irkân mâka tuipui a inchattir ang tak khan, RENGPA’N Jordan tuidung kin irkân zit mâka chu tui luang an chattira.

²⁴Hi thil sika hin mi tukhomin RENGPA sinthotheizia inhriat an ti, kumkhuain nin Pathian RENGPA hi chôiirsâng nin ti,” a tia.