Read Hrangkhol JOSUA 7 Bible Online

JOSUA 7 - Hrangkhol bible

JOSUA 7

¹Israelhaiin thil ser tak kha ngaisak mahaia: Juda irchi Zera nâi, Karmia nâipa Akana’n thilser tak senkhat chu a va lâka, Israelhai chunga RENGPA chu a sân a ning an mur tâka.

²Bethel sak tiang Bethavan kôla om Ai khua envêl hrangin Josua’n Jeriko ata mi a tîra. Anni chu an fea, Ai khua chu an envêla.

³An hong kîr nôka, Josua kuang, “Mi murdi fea doi ual nang ma, mi sânghni sângthum vêl dôr fehai sian, Ai khua chu hong doi ri sehai, an tômte kêng; mi murdi fe nang no ni,” an tia.

⁴Khanchu, mi sângthum vêlin an hong doia, khannisianlân Ai khua mihai doi ngam loiin an intân zoi tâka.

⁵Ai khua mihaiin kul ata Sebarim dênin an irzûlhaia, an tânhai chu mi sômthum kiruk an thata. Israelhai milung chu a’rhniama, an chia an rot zit tâk.

⁶Josua le Israel upahaiin an puan an inpot thêra, RENGPA Thuthung Bôm mân tiang an inboka, an lua vâiphin an phula, khohloi dênin an oma.

⁷Josua’n, ‘A poi okna, RENGPA Pathian, Amor mihai kuta soisak hrang le irhmang zoi hrangin, i sik kher mo Jordan dung hi ni ni inkâitir hi te? Jordan sak tianga om kha lei lungni tôk mai inlân a isa hrang a ni.

⁸O RENGPA, Israelhai chu an râlhaiin an doi mai tâk sikin, chongna hrang khom nei ta loi kin ni hi.

⁹Kanaan mihai le hi rama omhaiin an inhriatin ni’rhual an ta, ni that zit an ti! khanchu, a mihai khom hualsûng zoihai mah ni ti ngêt an ti,” a tia.

¹⁰RENGPA’N Josua kuang, “Thoiin lân, irnênga inbok mai ta no ro.

¹¹Israelhaiin thil an insual a ni hi te. Ki Thuthung zôm hranga ki iti kha an insiata, thilser khak ata lâk an nei, an inrûka, kha kha an ni huanga, an neinun kâra an thup inrûk nôka.

¹²Khasika khan a ni Israelhai hin an râlhai an ingam loia, an intân irhmang a ni; khomâksâmna an idong a ni. Lâk loi hrang nin ilâk kha nin pai mâka chu, nin kuang om no ning.

¹³Thoiin lân, mipuihai chu irthiangtirhai ro, an kuang, ‘Nangtûk hin irthiang infâi roi, Israelhai Pathianin hiang hin a ti, “Israelhaio, nin laia khomâksâm an iom a ni, kha nin lai ata nin thonpai no’n chu, nin râlhai doi ngam no chin ni.

¹⁴Khasikin, zîng tiang a nam namin honghai sian, RENGPA hong inthang nam chu a nam namin an ihong nôk hrang a ni; RENGPA’N kha mi nam ata a inthang tâka khan a insûngkua insûngkuain a inthang nôk hrang a ni. Khan, RENGPA’N kha mi insûng ata an inthang tak kha a bing bingin nin ihong inthang nôk hrang a ni.

¹⁵Thilser khak lâktu chu ama leh a nei murdi le meiin hâl zit hrang a ni. RENGPA Thuthung an siata, Israelhai ta hrangin thil inzakpuiom tak a ni,” a tia.

¹⁶Josua chu zîng taka a thoia, a nam namin Israelhai chu an honga, Juda irchihai chu chel an ni tâka.

¹⁷Juda irchi laia Zer chi chel an ni nôka, Zer-hai lai ata Zabdia insûngkua chel an ni nôka.

¹⁸Kha mi insûnghai lai ata khan Karmia nâipa Akana, Zabdia tupa chu chel a ni tâka.

¹⁹Josua’n Akana kuanga, “Ki nâipa, Israelhai Pathian RENGPA makunga thu diktak hril ro duah. Sual thupha chôi mai roi, imo ni itho, thup loiin nin hril ro,” a tia.

²⁰Akana’n Josua chu a sâma, “Israelhai Pathian RENGPA chunga thilsual ki lei itho a ni.

²¹Ei thil man laia Babulon puan satak, sumru sekel irza vêla rik le sekel sômringa vêla rik rângachak le ileh ki hmua, a sân ki’rzuka, ki ilâk zel a ni ta. Ki puan in sûnga irnênga ki ithupinrûk a ni, a hnuai taka sumru chu ki sia,” a tia.

²²Josua’n mi a tîra, riakbuk puan ina an fea, a lei ithup inrûk ngei chu a nia, a hnuai taka sumru chu a lei oma.

²³Riakbuk puan in ata chu an lâka, Josua leh Israelhai makunga khan an hong chôia, RENGPA makunga khan an siaa.

²⁴Josua le Israelhaiin Zera nâipa Akana chu puanhai, sumruhai, rângachakhai le a dôngma leh a nâihai, a sehrâthai, a sakuartung hai, a belrahai leh a nei murdihai le Akor irhôra an hruaia.

²⁵Josua’n, itho mo ni nin kamangtir bâka? RENGPA’N a vuan hin ni nin kamangtir tâk a ni hi,” a tia. Mi murdi’n Akana le a insûnghai chu lungin an dênga, an nei murdi le ileh khan an hâl tâka.

²⁶Lungin an dêng mur mura, RENGPA ningmur chu a dâi tâka. A vuan sûn ten hin kha irhôr kha Akor irhôr ti a la ni mai.