Read Hrangkhol JOSUA 9 Bible Online

JOSUA 9 - Hrangkhol bible

JOSUA 9

¹Jordan thang tianga tâng rama omhai, phâi rama omhai, le Mediteranean tuipui kôla Lebanon tâng dêna om Hit-hai rêng le, Amorhai rêng, Kanaan rêng, Periz-hai rêng, Hiv-hai rêng, Jebus-hai rênghaiin Israelhai hrâtzia an lei inhriata.

²An irkoi khôma, Josua le Israelhai chu doi tumin roi an rêla.

³Gibeon khuaa om Hiv mihaiin Jeriko le Ai khua Josua’n a lâk dân an inhriatin,

⁴vârirlet takin an irsiam tâka. Palâi ang tak takin an irsiama, hmarsa milui tak hi sakuartung an inpêltira, an uain savun kok, milui takhai kha an irbel rup a nia,

⁵kekok miluitak tak siat rep rup an irbuna, songkol miluitak tak an innghâka. An bufûn chôihai chu dâidupin an khirkhaka.

⁶Israelhai riakbuk Gilgal-a khan Josua an hong pana, a kuang, “Ram hlatak rengata kin honga, irngeina thu siam ei ti duah,” an tia.

⁷Israel mihaiin Hiv mihai kuang, “Hi lai vêla nâitaka mihai reng nin ang, itin mo irngeina thu nangni kin ithungpui thei hrang,” an tia.

⁸Josua kuang, “Ni siahlo kin ni hi” an tia. Josua’n, “Tuhai mo nin ini? kho rengata hong mo nin ini?” a tia.

⁹Khan, anni’n Josua kuang, “Ni siahlohai hi ram hlatak ata hong kin ni, ni Pathian RENGPA thurchi kin lei inhriata, Aigupta rama a sintho inthangtak takhai,

¹⁰Jordan râla Amor rêng Sihona, Hesbon rêng chunga le Basan rêng Astarot khuaa Oga chunga a sinthohai kin lei inhriata.

¹¹Kin upahai le kin rama mihaiin, ‘Zâna riakna cholam bufûn chôi unglân, anni chu va hmu unglân, nin siahlo kin nia, irngeina thu ni thungpui roi, va ti roi, an ni tia.

¹²Kin cholam bufûn chôihai hi, kin hong suak phuta khan chu a la lum hlianga, khannisian, atûn hin chu hei en u ta, a châr tâka, a ap zuak ta.

¹³Kin savun kok tharhai khom a chet zoi tâka, kin songkolhai, kin kekokhai khom kin hong inzin sôt tâk sikin a ichet fer fur tâk a ni hi,” an tia.

¹⁴Israel mihaiinan cholam bufûn chu an lei nêk pehaia. Khannisian, RENGPA kha irdon mahaia.

¹⁵Josua’n Gibeon mihai le ileh khan hmang hrangin irngeina thu a thungpuia, thathai loi hrangin chong an kunga, Israel mipui hruaituhai khom chong an inkung sa.

¹⁶Irngeina thuthung an siam zoi sûn thum hnunga chu kha mihai kha an kôl vêla omhai an nih ti an inhriat tâka.

¹⁷Khanchu, Israelhai chu an irsona, sûn thum an fea; kha mihai omna khua Gibeon hai, Kafira hai, Kiriath-jearim hai chu an va tunga.

¹⁸Kha mihai kha Israel mihai le irlût irsuak irthiang ma, Israelhai Pathian RENGPA irhmingin an hruaituhaiin chong an lei inkung hlat tâk sikin.

¹⁹Hruaituhaiin mipuihai kuanga, “Israelhai Pathian RENGPA irhming sâmin chong kin lei inkung tâka, kin irtôn irthiang ta ma.

²⁰Chong kin lei inkung tâk sikin an hringna kin inzôk hrang a ni. khano’nchu, Pathian hremna kin ituang hrang a ni.

²¹Inzôkhai unglân, kin thing pêl hrang le kin tui chôi hrangin an iom hrang a ni,” an tia.

²²Gibeon mihai chu Josua’n a koihaia, “Kin kôl vêl nâitaka om chakin, ram hlatak ata hong kin nih tiin itho sika mo nin ni ihuang?

²³Hianga nin ti sikin Pathian khomâksâm nin dong ta, Pathian ina tua hrang thing pêltu le tui chôitu hrangin siahlo nin ini mai hrang a ni,” a tia.

²⁴Josua chu an sâma, “RENGPA nin Pathianin a siahlo Mosia chu ram pumpui hi pe hrang a tia, nin fena mi om murdi chu that zit hrangin a ti ngeia. kha kha kin lei inhriata, kin chi tak taka, khaang khan kin iti mai a ni kha, kin chi sika a ni.

²⁵Atûn hin nin kuta om kin nia, sa nin iti lam ang takin ni ti ta roi,” an tia.

²⁶Josua’n hiang hin a ti tâka: anni chu a hrunghaia, Israelhai that hrang a khapa,

²⁷Suaka an changhaia, Israel mipuihai le RENGPA maichâm hranga thing pêltu le tui chôitua a hmanghai tâka. A vuan ten hin ama an biakna hrang RENGPA hmun inkunga khan, kha sin kha an tho tâka.